shadow
Diocese de Dili > NOTÍCIAS > LETURA DIÁRIA > Segunda-Feira, II Semana iha Tempo Comum (ANO C)

Segunda-Feira, II Semana iha Tempo Comum (ANO C)

Santa Inés

Primeira Leitura                    Heb. 5. 1-10

Lia housi surat ba Hebreu sira:

Na’ilulik boot hot-hotu, tan mai housi ema sira leet, sira serbisu ba Maromak, tan ema sira nia di’ak. Tan ne’e, sira hasa’e ba Maromak buat-karan sacrificio nian atu kasu salan. Nia hatene ema beik no maksalak  sira nia susar, basá, nia mós hetan terus. Tan ne’e, mak nia sei hasa’e sacrificio atu kasu nia salan rasik, no kasu mós jpovo nia salan. Maibe, ema ida la bele simu nar-naran knaar ne’e; ema nebe Maromak bolu, hanesan Aarão mak bele simu knaar ne’e. Cristo mos la foti Nia-An rasik atu sai na’ilulik sira nia Ulun. Ida nebe dehan: “Ó Ha’u Nia Oan, Ha’u hahoris Ó ohin”, Nia mak haraik knaar ne’e ba Nia. Iha fatin seluk Escritura nian mós hateten: “Tinan-ba-tinan, Ó Na’ilulik nafatin, hanesan Melquisedec”. Cristo, uainhira sei moris iha rai, Nia harohan  ho lian maka’as ba Ida nebe bele soi Nia housi mate. Tan Nia harohan, Nia simu duni tulun. Maski Oan, ho terus oin-oin, Nia hatene duni oinsá mak sei halo tuir de’it. To’o Nia loron, Nia sai Hun maksoyn rohan laek nian ba ema hot-hotu be halo tuir Nia hanourin, basá, Maromak foti Nia ba Na’ilulik boot, hanesan Melquisedec.

Maromak Futar Lia.

 

Salmo Responsorial                                                                                              Sal. 109(110). 1, 2, 3, 4 (R. 4bc)

Refrão : Na’i mak Na’ilulik ba nafatin!!! Repete-se

  • Maromak Nia liafuan ba ha’u Na’i:

          “Ó tur iha Ha’u sorin kuana.

          Ha’u sei tau ó funu baluk sira

          Iha ó ain okos”. Refrão

 

  • Housi Sião, Na’i sei fó sai

          Ó óe nia kbiit;

          Ó sei ukun iha ó funu baluk sira klaran. Refrão

 

  • “Ó mak liurai oan,

          Housi ó moris nia loron.

          Ha’u rasik hahoris ó

           Hanesan maha-uen iha rai-hun mutin!” Refrão

 

  • Na’i hakotu tiha ona lia, sei la hakribi:

          ”Ó na’ilulik ba nafatin,

          Tuir lisan Melquisedec nian.” Refrão

 

Aclamação                                                                                                                                                         Heb. 4. 12

Refrão : Aleluia, Aleluia!! Repete-se

                  Maromak Nia liafuan moris no bo’ok maka’as,

                  bele hatene lolós buat nebe ema hanoin no hakarak iha nia fuan. Refrão

 

Evangelho                                                                                                                                                      Mc. 2. 18-22

Na’i Jesus Cristo nia Evangelho nu’udar São Marcus haktuir:

Iha tempo neba, João nia escolante sira ho fariseu sira halo daudaun jejum. Sira mai dehan ba Jesus: “Tansá João ho fariseu sira nia escolante  halo jejum, Jesus hatan ba sira: “Belun sira noivo nian bele halo jejum, uainhira noivo sei hamutuk ho sira? Uainhira noivo sei hamutuk nafatin ho sira, sira la bele halo jejum. Loron sei to’o, uainhira ema sei hasai tiha noivo; iha loron ne’e, maka sira sei halo jejum. Ema ida la suku hena tuan nia baluk halo kuak nakles liu tan. Ema ida la fui tua foun iha kusi tuan. Lae, tua halo nakfera kusi, lakon tua, lakon kusi. Tua foun taun iha kusi foun!”.

Lia Maksoyn.

Leave a Reply

Your email address will not be published. Required fields are marked *