shadow
Diocese de Dili > NOTÍCIAS > LETURA DIÁRIA > Sexta-Feira, II Semana Tempo Comum (ANO C)

Sexta-Feira, II Semana Tempo Comum (ANO C)

Conversão De São Paulo, Apóstolo

Primeira Leitura          Heb. 22. 3. 16

Lia housi Apóstolo sira nia hahalok:

Iha loron hirak neba, Paulo hateten ba povo: “Ha’u ema Judeu, moris iha Tarso Cilícia nian, maibe ha’u simu matenek housi cidade Jerusalém ne’e’ ha’u estuda iha escola Gamaliel nian, tuir lei maka’as ami aman sira nian; ha’u badinas tebes iha Maromak nia serbisu, hanesan mós imi iha oras ne’e daudaun. Ha’u buka atu halo mate doutrina foun ida ne’e, káer kesi ho besi, hatama iha kalabosu ema mane no feto ua’in, hanesan ulun sacerdote no na’in ulun sira dehan sai. Housi sira, ha’u simu mós surat atu ba maun-alin sira, hodi la’o ba Damasco, atu káer ema sira nebe hela iha neba hodi lori mai Jerusalém, atu simu castigo.

Maibe, mosu tiha iha dalan, uainhira besik Damasco besik loron fahe ba rua, naroman boot ida nabilan housi Lalehan mai, hale’u tiha ha’u. Ha’u monu ba rai no rona lia ida be dehan mai ha’u: ‘Saulo, Saulo, tan sá ó hakarak oho Ha’u?’. Nune’e, ha’u husu: ‘Na’i sé lós mak Ita?’. Na’i hatan: ‘Ha’u mak Jesus Nazaré, Ida nebe ó hakarak oho!’.

Ha’u maluk sira haré naroman, maibe sira la rona lia nebe ko’alia mai ha’u. Tuir mai ha’u dehan: ‘Na’i, ha’u sei halo sá lós?’. Na’i hatan mai ha’u: ‘Ó hamriik, ba Damasco, iha neba, sira sei hato’o ba ó buat nebe hatudu nanis atu ó bele hala’o’.  Tan naroman ne’e, ha’u matan sai delek tiha; ha’u maluk sira mak káer ha’u liman hodi lori ha’u ba to’o Damasco.

Tuir mai, ema ida naran Ananias, harohan na’in, moris tuir lei no nia naran boot tebes iha Judeu sira leet, nia mai hasouru ha’u. Uainhira to’o, nia dehan mai ha’u: ‘Saulo, ha’u maun, haré fali ba. Iha oras ne’e duni ha’u haré fali. Nia dehan teni: ‘Ita bei-ala sira nia Maromak bolu nanis ona ó atu bele hatene Nia hakaran, atu ó bele haré Nia no rona Nia liafuan. Basá, ó sei sai Nia sasin iha ema hotu nia oin kona ba buat nebe ó haré no rona. Oras ne’e, tan sá ó hein? Hamriik ba, simu baptismo, hamos ó salan hotu hodi hahi Nia naran’’.

Maromak Futar Lia.

 

Salmo Responsorial                                                                                         Sal. 116(117). 1bc-2 (R. Mc. 16, 15)

Refrão : Imi ba mundo tomak haklaken Evangelho!!! Repete-se

  • Nação tomak, hana’i Maromak,

          Povo rai-klaran, haklaken Maromak. Refrão

 

  • Maromak domin tahan ita,

          Tahan nafatin tuir lia menon. Refrão

 

Aclamação                                                                                                                                                           Jo. 15. 16

Refrão : Aleluia, Aleluia!! Repete-se

                  La’o imi mak hili Ha’u, Ha’u mak hili imi hodi haruka imi ba atu bele

                  Fó fuan  no imi nia fuan bele hela ba nafatin, Na’i dehan. Refrão

 

Evangelho                                                                                                                                                    Mc. 16. 15-18

Na’i Jesus Cristo nia Evangelho nu’udar São Marcos haktuir:

Iha tempo neba, Jesus mosu ba Apóstolo sanulu resin ida hodi hateten ba sira: “Imi ba mundo tomak hodi haklaken Lia-foun-di’ak ba ema hot-hotu. Ida nebe fiar hodi simu baptismo sei hetan salvação, maibe ida nebe la fiar sei hetan castigo. Sira nebe fiar sei halo mós milagre sira ne’e: hosi Ha’u Nia naran, sei duni sai demónio sira, sei ko’alia lia oi-oin, no sei káer samea sira, to’o, sira hemu karik veneno, sira sei la mate. Sira sei tau liman ba ema moras sira hodi fó fali isin di’ak ba sira”.

Lia Maksoyn.

Leave a Reply

Your email address will not be published. Required fields are marked *