shadow
Diocese de Dili > NOTÍCIAS > HOMILIA DO BISPO > Abertura Ano Escolar 2019

Abertura Ano Escolar 2019

Ohin ita halibur hamutuk iha ne’e atu reza hamutuk, atu hatudu ita nia fiar nudar foinsae escolante Cristo ninian, liu-liu hakarak agradece iha dader ida nee ho finalidade ida, objetivo ida, katak ho Eucaristia ho missa ida nee mak marca hodi loke ita nia Ano Escolar ba escola hotu iha Timor tomak. Iha festa Converção São Paulo ninian ne’e ita hakarak loke  ano escolar.

Ita sarani ita toman tiha ona hader halo sinal da Cruz, bainhira ita han halo sinal da cruz, wainhira ita halo viagem ita halo sinal da Cruz no wainhira ita halo serviço sempre hahu ho sinal da cruz ne’e atu dehan sinal da Cruz hodi fo hanoin mai ita atu Maromak nia presença lao hamutuk ho ita. Sa tan ba iha educação ninian.

Escola katak Instituição ida atu transforma ou atu forma ema ida sai ema liu tan. Oinsa ita nia educação ne’e bele educa ita, forma ita tuir duni Maromak nia hakarak. Tan ne’e ohin ita mai iha ne’e bele harohan ba Nai Maromak atu tinan ida ne’e ita uza hodi forma ita, educa ita nia oan sira buka atu lao tuir Maromak nia hakarak.

Ohin ita mai hotu iha ne’e liu-liu ba alin doben sira ita mai iha ne’e ho sentimento ida deit uluk nanain ita atu dehan Obrigado Na’i tanba fo mai ha’u moris, obrigado Maromak tanba fo mai ha’u biban atu estuda, obrigado Maromak tanba fo mai ha’u nia papa no mama atu ha’u nia Papa no mama fo nafatin apoiu atu estuda tanba iha labarik barak iha Timor no iha mundo hakarak atu escola, maibe tanba inan aman nia capasidade la to’o oan sira labele atu escola. Ema barak hakarak atu escola, maibe tanba saúde la permite moris mai ho condição la completo hanesan ho ita ou tanba saúde ladiak labele escola.

Obrigado ba Maromak tanba ami nia rain iha hakmatek no iha paz. Iha fatin barak labarik sira labele escola tanba laiha paz tanba ukun nain sira funu hela deit no labarik sira sai vítima no foin sae sira labele ba  escola.

Liafuan converção katak mudansa ida nebe atu muda ema nia moris. Iha nebe mak iha Vontade, iha nebe mak iha hakarak sempre iha dalan, maibe o laiha vontade, tanba inan aman mak haruka, professor sira mak obriga no o lakohi atu estuda o bele ba escola deit mos la apreende buat ida. Tan ida ne’e ita mos precisa iha vontade. Dalaruma inan aman sira buka osan hodi oan sira ba escola maibe oan sira laiha vontade no la halo ninia dever didiak dalabarak la fo ksolok ba inan aman sira.

Converção ne’e atu mosu laos vontade deit maibe tanba encontro ida. Amo lulik lori foin sae ba hasoru Maromak liu husi sacramento confesa no comunga. Liu husi Sacramento nee mak bele muda foin sae ida ne’e moris lolos. Sacramento confessa ne’e atu hamos uluk ita nia sala, hamoos ita nia consiensaia mak ita bele forma ita nia an. Atu  hetan formasaun diak ita precisa hamoos nafatin ita nia laran, ita nia consiencia atu forma ita nia an ne’e tuir Na’i Maromak nia hakarak.

Tan nee mak ohin ita rona iha primeira leitura milagre boot ida mosu ba São Paulo. Paulo mos uluk lori ninia sabraut, oho sarani sira, duni apóstolo sira, hewai Jesus nia escolante sira, maibe Paul wainhira hasoru malu ho Jesus iha encontro ida, vizão ida iha Damascos, muda kedas Paul nia moris sai fali radical atu defende escolante sira no defende Jesus ninia liafuan. Tanba ida nee mak ita bolu converção.

Alin doben sira, ohin ita mai halibur iha ne’e atu ita loke ita nia ano escolar ho missa ida ne’e, nebe ita hanaran missa Espírito Santo ninian. Ita hakarak hahu ita nia processo apreendezagem husu Maromak nia tulun, Espírito Santo nebe fo moris ba Creda, Espírito Santo nebe hanorin Apóstolo sira koalia ho lian  oin-oin, Espírito Santo nebe lao hamutuk ho Uma Creda husi kedas tempo uluk to’o mai agora, Espírito Santo nebe transforma Saul ba Paul, transformação radical nee mak sai razaun fundamental ba ita nia missa ohin dader ninian.

Ita harohan atu Maromak Espírito Santo atu hamahan escola hot-hotu iha ita nia rain, atu escola sai duni ambiente ida família ninian, nune’e bele haburas confiança fiar entre professor ho alunos, atu professor sira la sente deit sira nia dever atu hanorin, maibe ida ne’e vocação ida nebe exige  duni Espírito de Sacrifício, Espírito dedicação, laran maus no matenek hodi acompanha kiik oan sira, alunos ba transformação ida ba integrável, nune’e alunos sira hatene fo aan duni atu aprende, rona, disciplina, vontade no transforma sira nia aan. Escola mak fatin ida atu muda ita nia-an, diverte ita nia-an, converte ita nia valor sira no transforma ita nia-an.

Leave a Reply

Your email address will not be published. Required fields are marked *