shadow
Diocese de Dili > NOTÍCIAS > REFLEXÃO > BUAT NEBE IMI FOIN RONA SAI TUIR LOLOS ONA

BUAT NEBE IMI FOIN RONA SAI TUIR LOLOS ONA

Maun alin sarani doben sira, buat saida mak ita foin rona? Ita Nain Jesus Cristo ninia pergunta ida nee refere ba Maksoin nebe Maromak haklaken iha Evangelho ohin nian. Loron Maksoin nian too mai ita ona, Nai Maromak halo concretamente ninia maksoin iha ninia povo sira leet.

 

Primeira leitura haktuir  mai ita katak iha loron maksoin nian nee ita sira be Maromak ninia povo tem que moris ksolok, labele neon sala, labele neon kraik basa iha loron nee Maromak hatudu ninia laran luak ba ninia povo sira. Nai Maromak halo maksoin sai concreto iha ema sira nia moris tamba Maromak hadomi ema sira, tamba ema sira hamtauk no lao tuir Maromak ninia ukun fuan moris nian. Ukun fuan ida kona ba moris iha domin no liberdade nia laran, laos moris iha tauk, ka iha klot, ka iha sem esperança nia laran ou iha dadur nia laran. Maromak ninia ukun fuan domin no liberdade ninian nee fo ksolok tebes ba ema basa ukun fuan nee soi ema, ukun fuan nee halo ema moris iha domin no liberdade lolos nian.

 

Segunda leitura hanorin ita katak ksolok ida nee ita simu husi Espírito ida deit, Espirito Maromak ninian nebe hamoris buat hotu hotu. Ida nee katak maksoin no ksolok moris nian nee so mai deit husi Maromak, laos mai husi ema ida ninia esforço mesak. São Paulo dehan iha ninia carta ba sarani sira iha Corinto “Ita hotu hotu simu ksolok husi Espirito ida mesak, Espirito ida nebe horik mos iha ita nain Jesus Cristo”. Espirito nee halo ita hetan Maksoin, hetan ksolok. Espirito ida nee mak halo ita nebe la hanesan sai ida deit iha moris ida nundar Maromak ninia povo. Moris nundar Maromak ninia povo nee la lao mesak maibe kesian metimetin ba iha Jesus Cristo be sai ulun boot ba Maromak ninia povo ne’e. Hamutuk ho Cristo mak ita bele hetan maksoin, ksolok no liberdade lolos nundar Maromak ninia oan sira, la hamutuk ho Cristo ita sei la hetan basa ita hasai an husi ema hotu nebe simu Espirito ida deit Espirito Maromak ninian ne’e.

 

Maromak ninia Maksoin so liu husi Cristo deit, la liu tan husi ema se se deit, tamba nee wainhira Cristo halao hela ninia missão salvívica nee loron ida iha ninia rain Nazare Nia dehan ba ninia conteraneo sira katak LIAFUAN NEBE IMI FOIN MAK RONA SAI TUIR LOLOS ONA. Afirmação ida nebe naturalmente halo ema sira buka hatene katak saida mak sai tuir lolos ona nee? Buat nebe Cristo hakarak dehan mak katak Maksoin sai tuir lolos ona iha Maromak ninia povo sira leet hanesan Maromak promete nanis ba ninia povo, katak Maromak liu husi Ita nain Jesus Cristo fo liberdade ba ema sira nebe dadur, ema sira nebe hela iha kloot laran, matan diak ba ema matan delek sira, no seluk seluk tan.Wainhira ita reflete klean liu tan ba iha ita ninia moris ita descobre katak maksoin ne’e Maromak la halo mai ita dala ida deit maibe halo mai ita nafatin ba nafatin no loron ba loron iha tempo hotu hotu. Pessoalmente ita experimenta Maksoin nee iha ita nia moras sira hetan isin diak, ita nia terus no susar sira hetan consolação, ita nia esforço sira hetan sucesso, ita nia hamlaha sira hetan hahan, ita iha desesperadu ka laran susar nia laran hetan laran metin no coragem. Nai Maromak sei halo nafatin maksoin nee mai ita liu husi ita nain Jesus Cristo nebe sai ulun ba ita sira be sai ninia liman ho ain.

 

Maun alin sira Ita nain Jesus Cristo mak sai ulun ba ita no ita sira nee mak ninia liman ain be opera ka realiza nafatin Maromak ninia maksoin iha ninia povo nia leet. Ita halo ida nee ho dalan nebe la hanesan tuir ita ida idak ninia dalan moris nian nundar Maromak haraik mai ita, balun hanesan funcionario, condutor, agricultor, estudante, negociante, professores, dirigentes, membro no sira seluk seluk tan. Ita halao moris nune hodi tidin an iha Cristo mak nundar centro ba ita nia atividade sira. Ida nee katak sa ba ita? Katak iha buta hotu nebe ita halao, halo ho Cristo, halo hamutuk ho Cristo, no lori to rohan mos hamutuk ho Cristo. Hodi hamutuk ho Cristo ita bele ona lori duni maksoin ka salvação nee sai concreto mai iha ita nia moris no ba maun alin sira hanesan ita rona iha evangelho ohin nian.

 

Nune maun alin sira, hanesan ponto de partida mai ita atu halao moris iha semana ida nee tuir Nai Maromak ninia hakarak ita bele hare fila fali ba ita ida idak ninia an hodi identifica ita ninia an ho fontes Maromak ninia maksoin ne hanesan:

Too momento ida nee dadaun, oinsa hau nia consideração, relação, compreendeção no atualização ka concretização kona ba Maromak ninia ukun fuan sira iha hau nia moris loro loron?

oinsa hau nia consideração, relação, compreendeção no atualização ka concretização kona ba hau nia relação ho Maromak ninia Espírito, Espirito Santo nebe sai we matan moris no maksoin ninian nee?

oinsa hau nia consideração, relação, compreendeção no atualização ka concretização kona ba hau nia relação ho Jesus Cristo be sai ulun ba Maromak ninia obra salvação nee hodi hau bele sai duni coperante ativa ba Maromak ninia hahalok maksoin?

 

Ita reza husu Maromak ninia tulun atu iha ita nia moris loro loron buka moris ksolok nee keta haluhan katak ksolok nee ninia fonte mak Maromak nia futar liafuan, Maromak ninia Espirito Santo no Maromak ninia Oan Mane Mesak Jesus Cristo Ita nia Maksoin. Mai ita hakbesik an nafatin ba we matan maksoin nian nee nebe bele fo ksolok lolos no rohan laek mai ita. Amen.

 

III Domingo Comum, Ano C, Bidau, 27 de Janeiro de 2019, Pb.

Leave a Reply

Your email address will not be published. Required fields are marked *