shadow
Diocese de Dili > NOTÍCIAS > LETURA DIÁRIA > III DOMINGO TEMPO COMUM (ANO C)

III DOMINGO TEMPO COMUM (ANO C)

Primeira Leitura        Ne. 8, 2-4ª, 5-6, 8-10

Lia housi Livro Profeta Neemias:

Iha loron hirak neba, sacerdote Esdras lori livro ukun-fuan nian mai ema lubun boot, feto no mane, no sira nebe neon iha atu hatene. Ne’e, loron uluk fulan hitu nian. Esdras lê livro dadersán  to’o loron aas, iha odamatan wé nian, nia oin, ba ema lubun boot, feto no mane, no sira nebe neon iha atu hatene. Ema tomak sée tilun hodi rona didi’ak. Escrivão Esdras sa’e tiha ba hadak leten ida, sira halo duni ba ne’e. Hamriik tiha iha hadak leten ne’e, nia loke livro iha povo tomak nia oin. Wainhira nia loke livro, ema tomak hamriik. Esdras hahí Na’i Maromak Boot; Povo tomak foti liman hodi hatan: “Amen! Amen!” Tuir, sira tuku-tur, hakru’uk to’o rai, hana’i Maromak. Leví oan sira lê livro ukun-fuan nian hodi hanourin atu povo tomak bele hatene  lolós hlia hirak ne’e katak sá. Nune’e, Emboot Neemias, sacerdote escrivão Esdras ho Leví nia oan sira nebe hanourin hela povo, hateten ba povo nune’e: “Loron ohin, loron boot, loron Maromak nian; keta neon sala, keta tanis”. Sira dehan ne’e, tanba, rona tiha lia ukun-fuan, povo hotu tanis. Hafoin, Neemias dehan ba sira: “Fila ba uma, han naan haksolok, hemu tua midar; fó balu ba sira be la iha buat ida, basá, loron ne’e, Na’i nia loron. Ne’e duni, keta neon sala, basá, Na’i nia ksolok mak imi nia kbiit”.

Maromak Futar Lia.

 

Salmo Responsorial                                                                                                              Sal. 18(19). 8. 9. 10. 15

Refrão : Na’i, Ita nia lia-fuan, lia menon no lia moris!!! Repete-se

  • Na’i nia dalan, dalan lós;

          Nia tahan klamar sira!

          Na’i nia sasin lós tebes;

          Nia, ema ki’ak nia matenek! Refrão

 

  • Na’i nia ukun-fuan kmanek tebes;

          Sira haksolok ema laran.

          Na’i nia ukun

          Leno ita nia matan. Refrão

 

  • Na’i nia hakaran, lós duni;

          Nia rohan laek.

          Na’i nia hanoin, lós teb-tebes;

          La feku ba mai. Refrão

 

  • Simu lia-fuan sai housi ha’u ibun,

          Sai housi ha’u laran.

          Na’i ksolok iha ita futar oin,

          Ita be hamahan no tahan ha’u. Refrão

 

Segunda Leitura    (Forma longa)                                                                                                 1 Cor. 12, 12-30

Lia housi São Paulo nia surat ba sarani sira iha Corinto:

Maun-alin sira: Hanesan isin lolon ida de’it, liman-ain barak, hanesan mós iman-ain sira ne’e, maski barak, halo isin ida mesak, nune’e mós Cristo. Hodi Espírito ida de’it mak ita hotu simu Baptismo, atu ita, Judeu eh Grego, atan eh lae, bele halo isin ida mesak; ita hotu-hotu simu ksolok housi Espírito ida mesak. Tebes! Isin lolon la’os mesak, maibe iha liman ho ain. Ain mak dehan karik: “Tan ha’u la’os liman, ha’u la’os isin lolon”, la’os tamba ne’e mak nia haketak-an housi isin lolon. Tilun mak dehan karik: “Tan ha’u la’os matan, ha’u la’os isin lolon”, la’os tamba ne’e mak nia haketak-an housi isin lolon. Ó nia isin lolon tomak mak matan de’it karik, ó nia tilun sá lós? Ó nia isin lolon tomak mak tilun karik, ó inus sá lós? Maibe, Maromak tau liman-ain iha isin lolon ida-idak tuir Nia hatene. Liman-ain sira hotu mak  liman de’it ka ain de’it karik, isin lolon oin sá lós? Tebes! Iha duni liman-ain barak, maibe isin lolon ida de’it. Matan la bele dehan ba liman: “Ha’u la kuran ó”. Ulun mós la bele hateten ba  ain sira: “Ha’u la kuran imi”. Maibe, liman-ain nebe kbiit laek liu, mak ita kuran liu sira. Fatin balu iha  ita nia isin, nebe ita hanoin katak la dun di’ak, sira ne’e mak ita bali liu tan. Fatin sira iha ita isin, nebe ita hanoin  katak sira kmanek liu, sira la dun kuran. Nune’e, Maromak halo isin hodi bali liu sira  nebe kuran liu, atu isin la bele fahe malu, maibe, atu liman-ain sira hamutuk haré malu di’ak. Ne’e duni,  fatin ida terus karik, isin tomak terus ho nia. Imi, Cristo nia isin lolon, Cristo nia liman-ain, ida-idak iha nia fatin. Nune’e, ema sira nebe Maromak tau iha Kreda, mak ne’e: Uluk knana’in Apóstolo sira, hafoin Profeta sira, matenek sira, ikus mai, sira be iha kbiit atu halo milagre; tuir fali mak sira  nebe iha kbiit atu fó isin di’ak ba moras, atu fó tulun, atu ukun, atu ko’alia lia oi-oin. Sira ne’e hotu Apóstolo? Sira ne’e hotu Profeta? Sira hotu matenek? Sira hotu halo milagre? Sira hotu iha kbiit atu fó isin di’ak ba isin moras sira? Sira hotu bele ko’alia lia oi-oin? Sira hotu bele duru-basa?

Maromak Futar Lia.

 

Segunda Leitura    (Forma breve)                                                                                            1 Cor. 12, 12-14. 27

Lia housi São Paulo nia surat ba sarani sira iha Corinto:

Maun-alin sira: Hanesan isin lolon ida de’it, liman-ain barak, hanesan mós liman-ain sira ne’e, maski barak, halo isin ida mesak, nune’e mós Cristo. Tebes, hodi Espírito ida de’it mak ita hotu simu Baptismo, atu ita, Judeu eh Grego, atan eh lae, bele halo isin ida mesak. Ita hotu-hotu simu ksolok housi Espírito ida mesak. Tebes, isin lolon lolós mesak, maibé iha liman ho ain. Imi, Cristo nia isin lolon, Cristo nia liman-ain, idak-idak iha nia fatin.

Maromak Futar Lia.

 

Aclamação                                                                                                                                                             Lc. 4. 18

 Refrão : Aleluia. Aleluia!! Repete-se

                   Na’i haruka ha’u haklaken Lia-Foun ba kiak sira.

                   Na’i haruka ha’u fó hatene loron libertação ba dadur sira. Refrão

 

Evangelho                                                                                                                                           Lc. 1. 1-4; 4, 14-21

† Na’i Jesus Cristo nia Evangelho nu’udar São Lucas haktuir:

Ema barak ona mak hakerek kona ba buat hirak nebe mosu iha ita leet, nu’udar tatoli mai ita ema sira nebe, houri uluk kedas, haré rasik ho matan, hafoin, sira rasik ba haklaken Lia-Foun di’ak. Ha’u mós haré hodi buka didi’ak housi hun, hodi hakerek buat hirak ne’e tu-tuir malu, ba ita, na’i Teófilo. Nune’e, ita bele hatene lolós doutrina nebe ami hanourin ona. Iha tempo neba, hodi Espírito Santo nia kbiit, Jesus fila hikas ba Galileia; Nia naran boot iha fatin hotu-hotu; Nia hanourin iha Sinagoga, ema tomak hahí Nia. Nia mai to’o iha rai Nazaré. Tuir Nia lisan, iha sábado ida, Nia tama iha Sinagoga, hamriik atu lê. Sira fó ba Nia, Livro Profeta Isaías nian. Nia loke, haré kona fatin nebe hakerek dehan: ‘Na’i nia Espírito hela ho Ha’u, tan Nia foti Ha’u. Nia haruka Ha’u atu haklaken Lia-Foun Di’ak ba kiak sira, atu fó hatene loron libertanção ba dadur sira, fó hikas matan di’ak ba matan delek sira, liberdade ba ema sira be iha kloot laran. Nia haruka Ha’u atu fó hatene sai tinan ida  rahun-di’ak mai housi Maromak’. Taka hikas tiha Livro, Jesus fó fali ba ema hein Sinagoga. Hafoin Nia tur tiha. Ema sira nebe iha Sinagoga laran, hateke hotu ba Nia. Nune’e, Jesus hateten ba sira: “Lia-fuan Escritura, imi foin rona ohin, sai lolós ona”.

Lia Maksoyn.

Leave a Reply

Your email address will not be published. Required fields are marked *