shadow
Diocese de Dili > NOTÍCIAS > LETURA DIÁRIA > Segunda-Feira, III Semana iha Tempo Comum (ANO C)

Segunda-Feira, III Semana iha Tempo Comum (ANO C)

São Tomás de Aquino

 

Primeira Leitura        Heb. 9. 15, 24-28

Lia housi surat ba Hebreu sira:

Maun-alin sira: Cristo mak Mata-Dalan ba aliança foun. Nia mate atu kasu salan sira nebe halo ona iha  aliança ida uluk,  atu sira nebe Na’i bolu bele simu prémio rohan-laek nebe hakotu hela ona ba sira. Cristo la’os hakbesik ba altar nebe ema halo, hodi hasara  altar lolós. Cristo sa’e ba Lalehan, atu mosu iha Maromak futar oin, hodi husu tulun mai ita.  Nia la saran-An dala barak ba mate hanesan sacerdote boot nebe tinan-tinan tama iha fatin santo, lori ran nebe la’os ninian. Cristo halo nune’e karik, Nia sei saran-An ba mate dala barak, hahu kedas houri mundo hahu. Maibe, foin ohin, uainhira tempo to’o ona nia rohan, mak Cristo saran-An dala ida de’it ba mate atu hodi Nia sacrificio, halakon salan. Tuir ita nia destino, ida mate dala ida de’it; hafoin, tesi lia justiça. Nune’e, mós Cristo saran-An dala ida ba mate atu halakon ema lubun nia salan. Nia sei mosu dala ida tan, la’os ona tan salan, maibe, atu soi ema sira hotu nebe hein Nia.

Maromak Futar Lia.

 

Salmo Responsorial                                                                                         Sal. 97(98). 1, 2-3ab-4, 5-6 (R. 1ª)

Refrão : Hananu ba Na’i knananuk foun ida, basá, Nia halo buat mesak kmanek!!! Repete-se

  • Hananu ba Na’i knananuk foun ida,

          Basá, Nia halo buat mesak kmanek.

          Nia futar liman lós manan funu;

          Manan ho Nia futar liman santo. Refrão

 

  • Na’i fó hatene Nia maksoyn;

          Nia hatudu justiça ba nação sira hotu.

          Nia hanoin Nia domin no laran lós,

          Ba Israel uman. Refrão

 

  • Rai-ikun rai-ulun sasin

          Maksoyn Ita Maromak Nian.

          Rai tomak haklaken Na’i,

          Haklalak ho ksolok no hananu. Refrão

 

  • Hananu ba Na’i hino hodi harpa lian,

          Ho harpa no lira nia lian;

          Ho corneta no trombeta nia lian,

          Hahi hauélok Na’i, ita Liurai. Refrão

 

Aclamação                                                                                                                                                         2Tm. 1. 10

 Refrão : Aleluia. Aleluia!! Repete-se

                   Jesus Cristo, ita nia Maksoyn. Nia halakon mate;

                   Nia halo moris nabilan housi Evangelho. Refrão

 

Evangelho                                                                                                                                                     Mc. 3. 22-30

Na’i Jesus Cristo nia Evangelho nu’udar São Marcos haktuir:

Iha tempo neba, ema escriba sira nebe tun housi Jerusalém mai, dehan nune’e: “Forsa Belzebu nian iha Jesus”; dehan tan: “Housi ulun boot demónio sira nian mak Nia duni sai demónio sira”. Maibe, Jesus bolu sira mai hotu Nia oin, hafoin, Nia dehan ba sira housi aiknanoik: “Oinsá bele Satanás duni sai Satanás? Povo ida fahe tiha nia-an karik, hafunu hasouru nia-an rasik, povo ne’e la bele tahan nia-an. Uma ida fahe-an tiha karik, hafunu hasouru nia-an rasik, uma ne’e la bele hela tan nu’udar uma. Tan ne’e, Satanás hamriik hasouru nia-an rasik  hodi fahe-an karik, nia la ble ita tan: sei mohu. Maibe, ema la bele tama iha uma ema forte ida nian hodi hadau riku-soi nebe nia iha, la futu karik uluk nia na’in; nune’e de’it mak bele na’uk uma ne’e. Ha’u dehan tebes ba imi: Sala sira hotu no liafuan áat sira hotu nebe oan ema sira nian dehan, sei perdua hotu, maibe, ema nebe dehan liafuan áat hasouru Espírito Santo, nia sei la hetan liu perdua: sei hetan castigo rohan laek sala nian”. Dehan ida ne’e, tanba sira ko’alia sai: “Nia iha espírito fo’er nian ida”.

Lia Maksoyn.

Leave a Reply

Your email address will not be published. Required fields are marked *