shadow
Diocese de Dili > NOTÍCIAS > OPINIÃO > INCERTEZA POLITICA NO INFLUENCIA MEDIA SOCIAL

INCERTEZA POLITICA NO INFLUENCIA MEDIA SOCIAL

Perspectiva Baudrillard iha situação actual

Husi : Mário de Oliveira Pires

 

               Uainhira mosu explosão internet hahu kedas husi instituições inovadoras  pesquisa nian iha mundo: a Agência de Projetos de Pesquisa Avançada (ARPA) Departamento de Defesa EUA nian’ ho ninia sentido ida nebé profunda mak “Interconnection Network” katak “relação entre computador tuir definição Adang Martanto nian. Ne’e duni, loos duni katak internet hafacil duni ema no transforma ema ninia moris lor-loron nian husi tempo ba tempo. Transformação refere kait tomak iha dimensão tomak ema nian, inclui dimensão economia, social, politica, cultura, religião, no dimensão sira seluk tan. Transformação ne’e halo katak ema labiban hodi hakiduk nem atu ses husi realidade nebé meios comunicação oferece no husi desenvolvimento tecnologia nebé lalais ba bebeik.

               Hodi hatama an iha transformação hirak ne’e, configuração foun mos ema cria no  ambiente tradicional sira mos transforma hetok  realidade mos altera tiha fali ba laos ona real iha digitalização ninia hakuak.

               Ho hirak ne’e hotu mosu mai pensamento sira hanesan, sociedade em rede, sociedade de consumo, sociedade digitalizado no global village  expressão hirak ne’e laos tamba buat seluk se laos tamba internet nebé oferece ba ema dalan oi-oin atu transforma estilo moris sociedade nian. Internet nebé oferece biban atu ema bele cria nia an sai oin seluk iha Facebook, internet mos nebé oferece biban atu ema hatudu nia an liuhusi fotografia iha Instagram, internet nebé oferece biban atu ema atu hatudu nia an iha Youtube ho video sira nebé iha. Biar vantagem sira nune’e mak Internet oferece maibé realidade sira ne’e mesak representação husi realidade, imaginação husi ser, manipulação ba realidade no ikus liu mak realidade hotu mesak simulação nebé no fundo no fundo bele loos no bele sala.

               Husi pormenores nebé iha, hakerek nain hakarak coloca assuntos balun iha realidade politica interteza Timor Leste nian nebé sociedade Timor Leste hamout an ba hanesan loos nani hela iha be merak incerteza politica nian, lahatene atu ba loos nebé no sei moris tan oinsa iha loron aban nian. Ba nune’e lahases mos influencia husi media social ba sociedade ohin loron nian hodi fiar buat nebé tuir loloos verdade em si. Ida mos nebé labele haluha mak confrontação de ideologia hodi hamosu implosão de sentido iha media. Ikus mak conclusão ida hodi hakotu escrito ida ne’e.

  • Be merak politica nian

               Dook atu hakat ba oin, besik mos atu hakiduk ba kotuk, Timor Leste ninia situação lao kudeik hanesan hela be iha talas tahan, kois-kois bele tama iha colapso hanesan mos rai bar-barak nebé oras ne’e tama iha crise econômica, social no política, nune’e mos alimentos nebé kuran ba bebeik, inflação. Exemplo nebe bele halo ita matan nakloke mak Venezuela, uainhira liutiha eleição presidencial, tamba deit ida-idak defende an ho ninia permanencia iha grupo, hamosu reacção oi-oin hodi lasimu no anula presidente Maduro. Mosu husi sorin ida lider oposição nian nebé publicamente declaran hanesan Presidente interino hodi promete buat bar-barak.

               Timor ninia situação politica rai laran hela nafatin hanesan tinan sira foin liu hahu kedas husi 2017, 2018 no 2019. Situação ne’e lamuda hanesan ema hotu hein, tinan 2019 nebé boas entradas mosu kedas ho boas nakdedar tamba presidente da Republica Veta OGE 2019. Ne’e hotu iha ninia consequencia politica de interesse nacional. Presidente da Republica iha razão constitucional, legitimo no seluk tan hodi veta tamba politica de interesse nacional, iha sorin seluk proposta orçamental nebé hatoo husi governo AMP mos iha razão de interesse politica nacional ho montante osan nebé iha. Hot-hotu iha politica de interesse nacional, nem presidente, nem governo AMP; maibé buat nebé seidauk iha hodi halo sira nain rua hamutuk mak consensos nacional hodi lori interesse nacional ne’e ba oin.

               Consensos de interesse nacional ne’e mosu uainhira liderança histórico sira tur hamutuk hodi halo dialogo ba interesse nacional. Consensos nacional ba politica de interesse ne’e mak laos atu haketak malun bebeik. Se ida ne’e laacontece iha Timor, oinsa mak ita koalia kona ba politica de interesse nacional. Confrontação de politica de interesse ne’e halo com que ema hotu hela iha duvida, afinal das contas saida loos mak politica de interesse nacional ne’e ? hodi hatan pergunta simples ne’e, diak tebes atu hare katak «Ema se hakarak sai boot liu sira seluk –Jesus dehan – nia sei sai ikus liu hotu hodi sai ema hotu nia atan» (Mc 9, 35). Nunee mos mak Papa São Paulo VI dehan, «halao política ida nebé sério, iha ninia diversos níveis – local, regional, nacional no mundial – ne’e mak afirma kona ba dever ema nian, husi ema tomak, hodi reconhece realidade concreta no valor husi liberdade atu hili husi sira nebé mak proporciona, atu hamutuk buka too ba cidade nia diak, nação no humanidade».

  • Influencia husi media social ba sociedade ohin loron

               Hanesan temin tiha ona, influencia husi media social ba incerteza politica ohin loron nian hamosu duni implosão ba sentido husi media social ne’e rasik. Idea principal husi implosão husi sentido ne’e rasik mai husi Baudrillar, sociologo, Filosofo no Fotografo Frances ida nebé fo ninia contribuição hodi haré katak ohin loron ema buka dalan oi-oin hodi sai buat nebé laos nia an rasik. Husi ne’e mak ema liuhusi meios (media social) atu halo simulação ba situação, objetos, personagens no forma seluk hodi hakat ba impressão bosok sira husi realidade nebé iha. Baudrillard hanesan autor nebé influencia makaas iha capitalismo continua, post-Marxismo, posmodernismo, media massa, publicidade, televisão, semiotica contemporanêo, no explorasão cientifica seluk kona ba cultura pop.

               Oinsa mak influencia husi media social ba politica ohin loron sai debate ida importante iha Baudrillard nia pensamento. Ida ne’e bale halo duni confrontação ba realidade social politica ohin loron tamba idea ne’e fofoun mosu tamba influencia de classe no status social. Tuir Baudrillard, iha fenomeno informação husi media social, tuir loloos iha buat tolu ne’e mak representação, manupulação no simulação. Buat tolu nebé temin iha leten hamosu influencia ba malun no dependencia ba malun. Relaciona ho representação, tuir lolos informação ne’e hanesan resultado husi precesso representação. Ne’e katak processo atu hamosu fali realidade ida no tuir mai halo transmissão kona ba realidade ne’e ba ema seluk. Ninia meio bele oi-oin, exemplo foto, meios comunicação social, video, publicidade, jornal no seluk tan. Relaciona ho ne’e processo representação ba realidade ne’e han malun ho saida mak Dretske dehan information is always information about something. Informasi sempre relaciona ho buat ida nebé hetan representação. Maibé buat nebé ita cuidado iha ne’e mak manupulação no simulação iha informação ne’e rasik.  

  • Confrontação ho realidade ohin loron

               Ohin loron buat nebé mosu malorek iha media social mak informação nebé ema halo manipulação no simulação ba informação ne’e rasik. Husi grupo Media Center husi Partido A hamriik ho ninia dados manipulação hodi hatun Partido B. Nune’e mos grupo Media Center Partido B hamriik mai ho ninia fotografia simulação nian hodi hatun Partido A. Husi ne’e mak ita hare katak mosu duni implosão ba sentido husi informação no buat nebé real laos ona real ou bele mos realidade demais tiha deit tamba hetan digitalização husi maquina nebé ema liman badaen sira mak produz. Too iha ne’e mosu katak Partido A usa media B hodi hatoo informação nebé bele explora opinião publica kona ba Partido C, nune’e mos Partido B usa media A hodi hatoo informação ba Partido D. Informação sira ne’e bele hamosu representasão husi realidade, manipulação ba factos no simulação ba realidade nebé acontece iha ita ninia rain. Hela kmanek katak Partido A no Partido B ho tan Partido D no partido sira seluk hakarak too ba objetivo ida nebé hanesan ne’e mak koko atu representa kona ba realidade ba sociedade. Maibé, iha processo ne’e, sempre mosu manipulação ba realidade nebé nia representa hodi ikus mai tranforma realidade ne’e sai simulação. Panorama ne’e mak agora dadaun mosu iha Timor Leste ninia situação politica actual.

 

Conclusão

               Timor Leste ninia situação politica lao nafatin iha incerteza ida nia laran, rezulusão ba situação ne’e mos ema hotu hein, janela sira media social nian harame deit ho assunto politica nebé bele mos loos no laloos. Kait ho ne’e “implosão sentido informação” iha media social laos solução ba situação politica ne’e tamba hakarak ou lae sociedade Timor Leste ohin loron hakarak moris hakmatek iha nação ida Independente no construi ninia pais hanesan saída mak Nicolau Lobato dehan “a hora da nossa terra e do nosso povo também chegou; a Libertação está assomando nas fibras do horizonte” (Manifesto FRETILIN, Dili, 20 de Maio de 1974); no hatutan tan katak Timor moris iha “… um novo horizonte – um horizonte da esperança” (Lisboa, 19 de Maio de 1975).

 

Referencia Bibliografia

  • BAUDRILLARD Jean, Simulacros e Simulação, Relogio D’agua, Lisboa, Portugal, 1991.
  • WIKANDARU Reno, “Metafisika informasi dalam perspektif Pemikiran jean baudrillard. Kontekstualisasinya dengan pertautan media dan politik di Indonesia”, Jurnal Filsafat, v. 27, n. 2, aceso iha : (19-10-2018).

NB : ba sugestão no critica bele haruka deit mai iha email : marioolive34@gmail.com

Leave a Reply

Your email address will not be published. Required fields are marked *