shadow
Diocese de Dili > NOTÍCIAS > LETURA DIÁRIA > Quarta-Feira, III Semana iha Tempo Comum (ANO C)

Quarta-Feira, III Semana iha Tempo Comum (ANO C)

Primeira Leitura                  Heb. 10. 11-18

Lia housi surat ba Hebreu sira:

Maun-alin sira: Sacerdote hot-hotu testamento tuan nian, lor-loron mosu atu káer sira serbisu, hodi hasa’e fila-fali sacrificio oin ida de’it, katak sacrificio ida nebe la bele kasu salan. Maibe, Cristo hasa’e sacrificio ida de’it atu kasu salan. Hafoin, Nia hatodan-An iha Aman Maromak sorin kuana, tinan-ba-tinan. Hahu kedas iha oras ne’e, Cristo hein hela atu haré nia funu baluk sira monu iha Nia ain. Tebes duni,  hodi sacrificio ida de’it mak Cristo halo kmanek to’o rohan  ema sira nebe bolu atu sai santo. Espírito Santo mós hateten lolós, maski dehan tiha ona: “Aliança ida ne’e mak Ha’u sei hametin ho sira, uainhira loron hirak ne’e liu”. Na’i dehan: “Ha’u sei tau Ha’u lei sira iha sira fuan, hodi hametin iha sira neon. Sira salan no hahalok áat sira Ha’u sei la hanoin tan”. Nune’e, uainhira iha ona perdua ba salan, la kuran tan ona sacrificio atu kasu salan.

Maromak Futar Lia.

 

Salmo Responsorial                                                                                              Sal. 109(110). 1, 2, 3, 4 (R. 4bc)

Refrão : Na’i mak Na’ilulik ba nafatin!!! Repete-se

  • Na’i Nia Liafuan ba ha’u nia Na’i:

          “Ó tur iha ha’u sorin kuana.

          Ha’u sei tau ó funu baluk sira

          Iha ó nia ain okos”. Refrão

 

  • Housi Sião, Na’i sei fó sai

          Ó óe nia kbiit;

          Ó sei ukun ó funu baluk sira. Refrão

 

  • ”Ó liurai oan

          Housi ó moris nia loron.

          Ha’u rasik hahoris ó,

          Hanesan maha-uen iha rai-hun mutin”. Refrão

 

  • Na’i jura tiha, sei la hakribi:

          “Ó na’ilulik ba nafatin

          Tuir lisan Melquisedec nian”. Refrão

 

Aclamação                                                                                               

Refrão : Aleluia. Aleluia!! Repete-se

                  Fini mak Maromak futar liafuan sira, Cristo mak kari fini.

                  Sé mak buka hetan fini ne’e sei hela tinan-ba-tinan.  Refrão

 

Evangelho                                                                                                                                                        Mc. 4. 1-20

Na’i Jesus Cristo nia Evangelho nu’udar São Marcos haktuir:

Iha tempo neba, Jesus hahu hanourin fali iha tasi ibun. Ema lubun boot mai halibur hamutuk atu rona Nia. Tan ne’e, Nia tur iha ró ida iha tasi laran. Ema sira hela iha tasi ibun, iha rai maran. Nia hanourin sira buat barak ho aiknanoik. Nia hanourin dehan: “Rona didi’ak ba! Ema ida ba kari fini. Nia kari fini daudaun, fini balun monu ida dalan. Manu sira mai hodi han sira hotu. Balun monu iha fatuk leten. Iha neba iha rai uitoan de’it. Fini sira ne’e moris lalais, basá, rai la kle’an. Maibe, uainhira loron sa’e hamanas sira, sira namlaik, basá, sira ábut la iha. Fini balun monu iha ai-tarak laran. Ai-tarak moris maka’as hodi hanehan sira. Fini sira ne’e la fuan ida. Fini balun moris iha rai di’ak, hodi moris buras no maka’as, balun fó fulin ho musan tolu-nulu, balu ho musan neen-nulu no balun ho musan atus ida”. Jesus dehan tan: “Ema nebe iha tilun atu rona, rona ba!” Uainhira Nia mesa-mesak ona, sira na’in sanulu resin rua no mós sira seluk nebe tuir Nia husu ba Nia, aiknanoik ne’e katak sá. Nia hatan ba sira: “Mistério Maromak Nia reino nian fó sai tiha ona ba imi, maibe, ba sira nebe hela iha liur, buat hotu mai de’it housi aiknanoik sira. Atu sira haré fila fali maibe, la haré mós; sira rona fila-fali maibe, la hatene lolós, atu keta sira fila ba di’ak hodi hetan perdua”.

Hafoin, Nia dehan ba sira: “Imi la hatene lolós aiknanoik ida ne’e? Oinsá imi bele hatene lós aiknanoik sira seluk? Fini nebe ema kari mak liafuan. Sira nebe monu iha dalan mak ema sira nebe rona tiha liafuan, Satanás mai kedas hodi hasai housi sira liafuan nebe foin kari iha sira. Nune’e mós, sira nebe simu fini iha fatuk leten mak sira nebe, uainhira sira foin rona liafuan, simu nia ho haksolok, maibe, sira nia abut la iha. Sira la hatan. Susar ruma mosu karik, eh terus ruma tanba liafuan mai hasouru karik, sira monu lalais. Hafoin sira nebe simu fini iha ai-tarak laran, sira ne’e rona tiha liafuan, maibe, hanoin mundo ne’e nian no mós babeur housi riku-soi no babeur sira seluk hanesan liafuan ne’e. Nune’e, nia la fó fuan.  Sira nebe simu liafuan iha rai di’ak, sira rona liafuan hodi simu nia no fó fuan barak; balun dala tolu-nulu, balu dala neen-nulu no balun dala atus ida”.

Lia Maksoyn.

Leave a Reply

Your email address will not be published. Required fields are marked *