shadow
Diocese de Dili > NOTÍCIAS > LETURA DIÁRIA > Quinta-Feira, III Semana iha Tempo Comum (ANO C)

Quinta-Feira, III Semana iha Tempo Comum (ANO C)

São João Bosco

Primeira Leitura               Heb. 10. 19-25

Lia housi surat ba Hebreu sira:

Maun-alin sira: Ita hotu iha neon metin katak ita sei tama iha santuário, tan Ita Na’i Jesus Cristo Nia futar ran. Ne’e mak dalan foun no moris rohan laek, nebe Nia rasik loke hodi halo-An ba mane nu’udar ita ema maksalak. Ita iha Na’ilulik Boot ida iha Na’i Maromak Nia uma; Ita sei la’o ba Nia ho neon domin no fiar metin, ho fuan momós housi hanoin áat no ho isin nebe fase ona ho ué mós. Ita buka tau laran metin iha lia hakotu, basá, Ida nebe hakotu  lia ne’e Nia sei metin iha Nia liafuan. Ita sei tulun malu hodi haburas caridade no hahalok di’ak selu-seluk tan. Ita sei hametin didi’ak nafatin ita nia unidade iha oração hodi hadook ita-an housi hahalok áat sira. Ita sei haka’as-an harohan ba malu hodi hein Na’i nia loron nebe besik ona atu to’o daudaun mai.

Maromak Futar Lia.

 

Salmo Responsorial                                                              Sal. 23(24). 1-2, 3-4ba, 5-6 (R. cf. 6)

Refrão : Ema otas ne’e mak buka Na’i!!! Repete-se

  • Rai no buat hotu iha rai, Na’i Nian;

          Mundo no buat tomak hôrik iha nia.

          Maromak hatur rai iha tasi laran,

          Hametin rai iha laloran leten. Refrão

 

  • Sé mak bele sa’e ba Maromak Nia foho?

          Sé mak bele hôrik iha Nia kadunan santo?

          Ema nebe laran mós, lima la sala;

          Ema nebe la jura falso, la bosok. Refrão

 

  • Ema ne’e sei simu Na’i Nia bensa,

          Nia sei hetan kolen housi Maromak, nia Maksoy.

          Ema otas ne’e buka Na’i,

          Be buka Jacob nia Maromak Nia futar oin. Refrão

 

Aclamação                                                                                                                                           Sal. 118(119). 105

Refrão : Aleluia. Aleluia!! Repete-se

                  Na’i, Itaboot nia liafuan mak ahi oan mai ha’u nia ain fatin,

                  Roman iha ha’u nia dalan. Refrão

 

Evangelho                                                                                                                                                      Mc. 4. 21-25

Na’i Jesus Cristo nia Evangelho nu’udar São Marcos haktuir:

Iha tempo neba, Jesus lia tun ba escolante sira: “Imi sunu lakan ahi oan ida hodi tau nia iha balde okos eh iha toba fatin okos? Lolós, imi sei tau nia iha nia fatin! Laiha buat ida nebe subar; nebe ema sei la fó sai; la iha buat ida nebe subar metin nebe ema sei la fó hatene. Ema nebe iha tilun atu rona, rona ida ne’e ba” Nia dehan mós ba sira: “Rona didi’ak buat nebe imi rona daudaun: Sasukat nebe imi usa sei usa mós ba imi, no barak liu tan. Basá, ema nebe iha ona, sei simu tan; housi ema nebe la iha, buat nebe nia iha sei hasai tan housi nia”.

Lia Maksoyn.

Leave a Reply

Your email address will not be published. Required fields are marked *