shadow
Diocese de Dili > NOTÍCIAS > LETURA DIÁRIA > Sexta-Feira, III Semana iha Tempo Comum (ANO C)

Sexta-Feira, III Semana iha Tempo Comum (ANO C)

Primeira Leitura                   Heb. 10. 32-39

Lia housi surat ba Hebreu sira:

Maun-alin sira: Imi hanoin hi’as ba loron hirak uluk nian. Uainhira imi simu tiha naroman fiar nian, imi hetan terus ua’in iha susar oi-oin nia leet. Ema halo terus imi hanesan sasán la folin, baku imi, tolok imi, no hateten lia áat oi-oin hasouru imi iha ema ua’in nia oin, hamutuk ho sira selu-seluk nebe terus hanesan imi la’os de’it imi hanoin netik sira nebe iha kadeia, maibe, imi simu ho ksolok tan sira hadau imi nia sasán hotu, basá, imi hatene katak imi sei hetan riku-soi boot liu no rohan laek. Imi keta halakon imi nia fiar, maibe, laran metin ba di’ak tomak nebe hein hela imi iha reino Lalehan. Imi buka haka’as-an hodi halo tuir Maromak Nia hakaran, atu bele hetan buat di’ak be hakotu nanis ona ba imi. “Basá, uitoan tan, maski tempo uitoan liu, Na’i, Ida be sei mai, besik atu mai ona, la kleur Nia mai ona. Ema be laran lós, sei moris tan fiar, maibe nia hadook-an karik, Ha’u klamar sei la haksolok ho nia. Ita la’os ema sira nebe hadook-an hodi lakon,  maibe, ita housi sira nebe iha fiar metin atu soi nia klamar.

Maromak Futar Lia.

 

Salmo Responsorial                                                                       Sal. 36(37). 3-4, 5-6, 23-24, 39-40(R. 39ª)

Refrão : Maksoyn ema laran lós nian mai housi Na’i!!! Repete-se

  • Ó laran metin iha Na’i ba, hodi halo di’ak,

          Ó sei hôrik iha rai no ó moris hakmatek.

          Ó nia ksolok tomak o tau iha Na’i ba,

          Nia sei haraik ba ó, ó fuan nia hakaran tomak. Refrão

 

  • Saran o nia moris ba Na’i,

          Hein iha Nia! Na’i sei tulun ó;

          Nia sei halo nabilan ó nia justiça hanesan roman,

          No ó nia direito sira hanesan loron fahe-rua. Refrão

 

  • Na’i hametin ema nia hakat sira,

          No haksolok iha nia dalan.

          Nia sidi karik, sei la monu ba rai,

          Basá, Na’i futar liman tane nia. Refrão

 

  • Maksoyn ema laran lós nian mai housi Na’i,

          Nia mak nia subar fatin iha tempo susar;

          Tahan nia housi ema áat sira liman,

          No soi nia, basá, nia hamahan-an iha Na’i. Refrão

 

Aclamação                                                                                                                                                          Mt. 11. 25

Refrão : Aleluia. Aleluia!! Repete-se

                  Rahun di’ak ba Ita, Aman, Na’i  lalehan no rai nian, tan Ita hatudu

                  Mistério reino lalehan nian ba kiik sira.  Refrão

 

Evangelho                                                                                                                                                     Mc. 4. 26-34

Na’i Jesus Cristo nia Evangelho nu’udar São Marcos haktuir:

Iha tempo neba, Jesus lia tun ba ema lubun boot sira: “Maromak Nia reino, hanesan ema ida nebe kuda fini iha rai. Nia toba eh hader, iha kalan eh iha loron, uainhira fini moris no boot ba daudaun, nia la hatene tuir moris oinsá. Rai mesak hamoris nia, uluk liu nia hun, tuir mai nia fulin, ikus liu trigo tasak iha fulin. Uainhira to’o ona tempo atu ko’a, nia tau kedas tudik atu ko’a; to’os trigo nian pronto ona”. Jesus dehan tan: “Ita sei usa ilas ida nebe atu hatudu Maromak Nia reino? Ho aiknanoik ida nebe mak ita sei hatudu nia? Nia hanesan mostarda musan ida nebe kuda iha rai, nia mak musan kiik liu hotu iha rai-klaran. Maibe, kuda tiha hahu moris, sai boot liu hotu modo sira iha to’os laran, hodi hatubun sanak mesak bobot atu nune’e manu sira lalehan nia bele hamahan-an iha nia mahan”. Jesus haklaken Maromak Nia Liafuan ba sira ho aiknanoik barak hanesan ne’e, tuir buat nebe sira bele compreende. Nia ko’alia ba sira housi aiknanoik de’it, maibe, ba escolante sira uainhira sira mesa-mesak de’it ona, nia fó hatene momós buat hotu ba sira.

Lia Maksoyn.

Leave a Reply

Your email address will not be published. Required fields are marked *