shadow
Diocese de Dili > NOTÍCIAS > LETURA DIÁRIA > IV DOMINGO TEMPO COMUM (ANO C)

IV DOMINGO TEMPO COMUM (ANO C)

Primeira Leitura              Jer. 1, 4-5. 17-19

Lia housi Livro Profeta Jeremias:

Iha tempo Josias, Liurai Judá nian, Na’i lia tun mai ha’u nune’e: “Molok ó nia inan ko’us ó, Ha’u hatene nanis ó; molok ó nia inan hahoris ó, Ha’u hili tiha ona ó, hodi halo ó, sai Profeta rai tomak nian. Ne’e duni, hamriik, ba hatais, atu fó hatene ba sira buat hotu-hotu Ha’u haruka. Keta ta’uk sira! Lae karik, Ha’u sei halo ó nakdedar tebes iha sira oin. Ohin duni, Ha’u harí ó, nu’udar kota ida metin tebes, nu’udar rin besi, nu’udar baki besi-asu iha rai tomak oin, iha liurai no ulun Judá sira oin, iha sacerdote sira oin no ema sira hotu nia oin. Sira sei hatuda hasouru ó, maibe, sei la tahan ó, basá, Ha’u sei la’o hamutuk ho ó, atu soy ó. Maromak lian!”.

Maromak Futar Lia.

 

Salmo Responsorial                                                                                                            Sal. 70(71), 1-6ab. 15. 17

Refrão : Ha’u ibun haklaken ita nia Maksoyn!!! Repete-se

Na’i, ba Ita, ha’u neon metin:

Keta husik ha’u moe ba nafatin!

Ita be di’ak, sadi’a ha’u, tahan ha’u! Refrão

 

Tahan ha’u iha fatin metin:

Ha’u beran maksoyn!

Nu’udar fatuk inan soy ha’u,

Sadi’a ha’u housi ema áat. Refrão

 

Na’i, ba Ita ha’u laran metin,

Ha’u nia mahein houri sei klósan;

Houri ha’u sei kiik, Ita mak tahan,

Ha’u inan ko’us ha’u, Ita ha’u beran. Refrão

 

Ha’u ibun haklaken Ita nia kmanek,

Haklaken nafatin Ita Maksoyn.

Houri ha’u sei kiik, Ita hala’o ha’u,

To’o ohin loron haklaken nafatin Ita nia kmanek. Refrão

 

Segunda Leitura                                                                                                                          1 Cor. 12, 31-13, 1-13

Lia housi São Paulo nia surat ba sarani sira iha Corinto:

Maun-alin sira: Ho laran tomak, imi buka liu mak kmanek lalehan nian. Ha’u sei hatudu ba imi dalan ida di’ak liu buat hotu. Maski ha’u hatene ko’alia ema ho Anjo sira lian, maibe, la iha karik caridade, ha’u nu’udar sinu ida be lian, eh gon ida be tarutu. Maski ha’u iha kbiit profeta nian, maski ha’u hatene mistério sira hotu, maski ha’u sai matenek boot ida, maski ha’u nia fiar maka’as teb-tebes bele fokit foho sira, maski ha’u la iha karik caridade, ha’u folin laek. Maski ha’u fahe ha’u nia osan-mean no osan-mutin tomak, maski ha’u fó ha’u nia isin atu ema sunu, maibe, la iha karik caridade ha’u lakon leet de’it. Caridade hatene terus; caridade laran maus; caridadela hatene laran moras; caridade la loko-an, la foti-an; caridade la fó todan; caridade la buka de’it nia di’ak; caridade laran la nakali; caridade la rai hirus; caridade la haksolok ho injustiça; maibe, haksolok ho lialós. Caridade fó perdua ba buat hotu; caridade fiar; caridade hein; caridade terus buat hotu; caridade sei la lakon. Profeta sira lian sei lakon; ema sira lian sei lakon; matenek sei mohu. Tebes, ita hatene rohan de’it. Maibe, mosu tiha mai buat di’ak lolós nian, buat nebe la dun di’ak eh la dun lós sei lakon tiha. Uluk, uainhira ha’u sei labarik, ha’u ko’alia nu’udar labarik. Maibe, ha’u boot tiha, ha’u la hanoin tan nu’udar labarik. Ohin loron ita haré la mós, nu’udar iha lalenok ida; maibe, aban bain-rua ha’u sei hatene lolós, nu’udar Maromak hatene ha’u. Ohin loron, sei iha nafatin buat tolu ne’e: Fé, Esperança no Caridade. Maibe, caridade mak boot liu sira hotu.

Maromak Futar Lia.

 

Aclamação                                                                                                                                                          Mt. 11, 25

 Refrão : Aleluia. Aleluia!! Repete-se

                   Kmanek ua’in ba ha’u Aman, lalehan no rai sira Na’in.

                   Tan Ita fó tada ba ki’ak sira Mistério lalehan nian. Refrão

 

Evangelho                                                                                                                                                       Lc. 4, 21-30

Na’i Jesus Cristo nia Evangelho nu’udar São Lucas haktuir:

lha tempo nebá, Jesus hahú hateten ba sira iha Sinagoga Nazaré nian: “Lia-fuan Escritura imi foin rona ohin sai tuir lolós ona”. Ema hotu fo sasin di’ak kona ba Nia. Sira laran hakfodak ho lia-fuan kmanek sai housi Jesus nia ibun. Sira dehan: “Nia laós José nia oan?” Jesus dehan ba sira: “Imi kala dehan mai Ha’u: ‘Doutor, halo di’ak ba ita nia isin rasik ba.’ Buat hotu nebé Ita halo iha Cafernaum, halo mos iha ne’e, ita rain”. Jesus lia tun teni ba sira: “Tebes, Ha’u dehan lós ba imi: lha tempo Elias nian, feto-faluk barak mak iha rai Israel. Wainhira udan la monu rai iha tinan tolu no fulan neen nia laran, rai tomak hamlaha boot; maibé, Maromak la haruka Elias ba feto-faluk sira ne’e ida; haruka de’it ba feto- faluk ida iha Serepta, iha rai Sidónia nian. Iha tempo Profeta Eliseu nian mos, ema moras lepra barak mak iha Israel, maibé sira la hetan isin-di’ak. Ema Síria nian naran Naamã de’it mak hetan fali isin- di’ak. Rona tiha lia hirak ne’e, sira hotu nebé iha Sinagoga laran, hirus teb-tebes. Nune’e, sira hotu hamríik hodi duni sai Nia housi cidade. Hafoin, sira lori Nia ba to’o rai tatinis iha foho leten nebé sira harí sira nia cidade, atu bele hatun Nia housi nebá. Maibé, Jesus liu housi sira leet, la’o tuir Nia dalan.

Lia Maksoyn.

Leave a Reply

Your email address will not be published. Required fields are marked *