shadow
Diocese de Dili > NOTÍCIAS > LETURA DIÁRIA > Segunda-Feira, IV Semana Tempo Comum (ANO C)

Segunda-Feira, IV Semana Tempo Comum (ANO C)

Primeira Leitura               Heb. 11. 32-40

Lia housi Surat ba Hebreu sira:

Maun alin sira: Sá lós mak ha’u atu dehan tan ba imi? Ha’u la iha tempo atu hato’o ba imi kona ba Gedeão, Barac, Sansão, Jefté no David, nune’e mós kona ba Samuel no profeta sira. Tan fiar, sira ne’e manan reino wa’in, halo justiça, hodi hetan di’ak be hakotu hela ba sira. Sira taka leão sira nia ibun, hamate áhi be lakan maka’as, sira la mate ho kro’at, sira hetan fali isin di’ak housi moras, sira manan funu hodi duni sai sira funu-baluk. Feto sira hetan sira nia maluk be mate liu ona, basá sira ne’e moris hi’as fali. Maibé, sira balun simu terus boot teb-tebes iha isin, lakohi atu simu fali libertação ba sira, atu bele hetan buat di’ak liu ida, mak moris hi’as. Balun, sira futu tau iha kadeia, baku sira no hasara sira. Tuda sira ho fatuk, ko’a sira ho kado, oho sira ho surik; la’o sala dalan, hatais bibi malae no bibi timur nia kulit, kuran buat hotu. Ema trata áat sira, hewai sira, no halo áat oi-oin ba sira. Sira la hetan buat di’ak iha mundo! Sira la’o namkari iha rai fuik no foho, iha rai ko’ak no fatuk ko’ak sira. Sira hotu la hetan buat nebé hakotu nanis ba sira, maibé, sira hatudu ona sasin di’ak ba fiar. Tanba Maromak rai hela buat di’ak liu ne’e ba ita no sira mós bele to’o rahun di’ak tomak hamutuk ho ita de’it.

Maromak Futar Lia.

 

Salmo Responsorial                                                                                  Sal. 30(31). 20, 21, 22, 23, 24 (R. 25)

Refrão : Hakbiit imi fuan ho barani, imi hotu nebé hein iha Na’i!!! Repete-se

Na’i, Ita laran di’ak boot tebes,

Nebé Ita rai hela ba sarani sira!

Iha ema sira nia oin, Ita hatudu Ita laran di’ak,

Ba sira nebé tau neon metin iha Ita. Refrão

 

Iha mahan Ita futar oin nian,

Ita haksumik sira be neon metin,

housi ema laran áat,

Ita soi sira housi funu ibun áat nian. Refrão

 

Rahun-di’ak ba Na’i be hatudu mai ha’u,

Kmanek oi-oin domin nian,

Iha cidade maka’as ida. Refrão

 

Iha ha’u nia susar ha’u dehan:

“Ha’u dook ona housi Ita futar matan”!

Maibé, Ita rona ha’u nia harohan,

Wainhira ha’u hamulak ba Ita, Na’i. Refrão

 

Imi hadomi Na’i bá, Nia belun sira,

Nia tau matan ba Nia sarani sira,

Maibé castigo maka’as ema loko-an sira. Refrão

 

Aclamação                                                                                                                                                             Lc. 7. 16

Refrão : Aleluia. Aleluia!! Repete-se

Profeta boot ida mosu tiha iha ita leet;

Maromak mai haré tiha Nia povo. Refrão

 

Evangelho                                                                                                                                                        Mc. 5. 1-20

Na’i Jesus Cristo nia Evangelho nu’udar São Marcos haktuir:

Iha tempo nebá, Jesus ho escolante sira to’o iha rai gerasenos iha tasi nia sorin balun ba. Wainhira Nia tun housi ró, ema ida ho espírito fo’er sai kedas housi rate sira leet ba hasouru Nia. Ema ne’e hôrik iha rate sira laran. La iha ema nebé bele tahan nia, basá, ema kesi tiha ona nia dala barak ho corrente no kadeado, maibé, nia halo kotu korrente no halo áat kedeado sira. La iha ema nebé maka’as atu tahan nia. Kalan loron iha rate no mós iha foho leten, nia hakilar hodi hakanek nia-an ho fatuk. Wainhira nia haré Jesus housi dook, nia halai hasouru Nia hodi monu ain ba Nia no hakilar ho lian maka’as: “Ita hakarak sáida housi ha’u, Jesus, Maromak A’as liu Nia Oan? Ha’u hakotu lia ba Maromak katak Ita sei la halo áat ha’u”. Basá, Jesus hateten tiha ona ba nia: “Sai housi ema ne’e, espírito fo’er!” Hafoin, Jesus husu ba nia: “Ó nia naran sá?” Nia hatan ba Jesus: “Ha’u naran ‘Legião’, basá, ami barak”. Nia husu ho laran manas atu la bele duni sai sira housi fatin nebá. Iha nebá, iha foho nia sorin, iha fahi barak nebé han daudaun. Espírito fo’er sira hasa’e lia ba Jesus hodi dehan: “Haruka ami ba fahi sira, atu ami tama iha sira”. Jesus husik sira. Nune’e espírito fo’er sira sai housi ema ne’e hodi tama iha fahi sira. Fahi sira nebé sura besik rihun rua halai housi foho ba tasi laran. Iha nebá, sira mout hotu. Sira nebé hein fahi halai hodi haktuir buat hotu iha fatin tomak nebá. Ema sira mai atu haré buat nebé mosu. Sira hakbesik Jesus hodi haré ema nebé uluk espírito fo’er hela ba, tur hela ho hatais. Nia isin no hanoin di’ak ona; nia nebé uluk iha espírito fo’er barak iha nia laran. Sira hotu ta’uk teb-tebes. Sira nebé haré buat hotu ne’e haktuir kona bá ema ne’e no kona bá fahi sira. Tan ne’e, ema sira hahu husu Jesus atu husik ona fatin nebá. Wainhira Nia atu sa’e ona ba ró, ema nebé uluk iha espírito fo’er husu ba Nia atu husik nia la’o hamutuk ho Nia. Jesus la husik, maibé dehan ba nia: “Ó ba ona uma, ba ó nia familia hodi haktuir ba sira buat hotu nebé Na’i, iha Nia laran-luak, hala’o ona ba ó”. Nune’e, ema ne’e la’o bá, hodi haklaken iha rai Decápole tomak buat hotu nebé Jesus halo ba nia. Ema hot-hotu hakfodak.

Lia Maksoyn.

Leave a Reply

Your email address will not be published. Required fields are marked *