shadow
Diocese de Dili > NOTÍCIAS > LETURA DIÁRIA > Terça-Feira, IV Semana Tempo Comum (ANO C)

Terça-Feira, IV Semana Tempo Comum (ANO C)

Primeira Leitura                      Heb. 12. 1-4

Lia housi Surat ba Hebreu sira:

Maun alin sira: Hori uluk ema moris uluk barak teb-tebes fó sasin kona ba fiar. Sira barak, sira hanesan kalohan ida nebé hale’u hela ita. Tan ne’e, soe tiha ita naha, soe mós sala nebé hale’u ita hodi halai hasouru ho aten barani funu nebé mosu ita oin. Foti matan hateke ba Jesus: Nia mak hatudu dalan fiar nian, Nia mak sei halo fiar ne’e boot to’o rohan. Jesus la simu ksolok nebé Nia bele simu, maibé, Nia simu Cruz, la ta’uk Cruz nia todan. Ne’e duni, oras ne’e, Nia tur iha Maromak futar sorin kuana. Imi hanoin Jesus bá, nebé terus hodi ema maksalak sira fatin. Nune’e de’it mak imi sei aten barani nafatin, nune’e de’it mak imi nia laran sei la taridu, imi neon sei la susar. Imi seidauk to’o hafunu hasouru salan, to’o fakar ran.

Maromak Futar Lia.

 

Salmo Responsorial                                                                          Sal. 21(22). 6b-27, 28, 30, 31,-32 (R. 27b)

Refrão : Na’i, sira bé buka Itaboot, sei hahi Ita!!! Repete-se

Iha Ita ema sira oin,

Ha’u sei halo tuir duni lia hirak ha’u hakotu.

Kiak sira sei han to’o bosu.

Ema sira bé buka Na’i, sei hahi Nia;

Sira fuan moris nafatin. Refrão

 

Rai hotu hanoin Na’i, hodi fila hikas ba Nia;

Família hotu nação sira nian, hana’i Nia,

Sira bé toba iha rai ko’ak, hana’i Nia;

Sira bé fila hikas ba rai-rahun, hana’i Nia. Refrão

 

Tan Nia, ha’u sei moris,

Ha’u nia bei-oan sira sei serbí ba Nia.

Ema sira moris ikus nian sei ko’alia kona ba Na’i;

Povo nebé atu moris sei haktuir Nia justiça:

“Buat hirak ne’e hotu Na’i halo”! Refrão

 

Aclamação                                                                                                                                                            Mt. 8. 17

Refrão : Aleluia. Aleluia!! Repete-se

Cristo simu ita nia terus hotu iha nia leten,

Hodi hasai ita nia moras tomak. Refrão

 

Evangelho                                                                                                                                                      Mc. 5. 21-43

Na’i Jesus Cristo nia Evangelho nu’udar São Marcos haktuir:

Iha tempo nebá, Jesus sa’e ró liu fali ba tasi sorin. Ema lubun boot hale’u tiha Nia, halo Nia hela iha tasi ibun. Iha oras ne’e, chefe Sinagoga nian ida, naran Jairo, to’o daudaun mai. Haré tiha Jesus, nia monu ain hodi husu nune’e: “Ha’u nia oan feto besik atu mate. Ita hi’it-an mai tau liman ba na, hodi soi nia, atu nia bele moris”. Jesus ba hamutuk ho nia. Ema lubun boot hamutuk ho Nia, hábit Nia.

Feto ida, liu ona tinan sanulu resin rua mak fakar ran. Nia terus teb-tebes ho doutor barak. Nia lakon mohu riku-soi hotu, la hetan di’ak ida; áat liu tan ba daudaun. Tan nia rona ko’alia kona ba Jesus, nia mai housi kotuk iha ema lubun sira leet, hodi kona Jesus nia hena. Basá, nia dehan ba nia-an rasik: “Ha’u kona de’it Nia hena mós, ha’u sei hetan di’ak ba ha’u moras”. Iha oras ne’e kedas nia ran la fakar, nia isin lolon tomak hetan di’ak. Jesus hateten kedas katak kbiit sai housi Nia. Nia fila ba ema lubun boot hodi husu: “Ema sé mak kona Ha’u nia hena?” Escolante sira dehan ba Nia: “Ema lubun habit daudaun Ita, Ita sei husu: ‘Sé mak kona daudaun Ha’u hena?’” Maibé, Jesus hateke hale’u, hodi haré ema nebé halo buat ne’e. Feto ne’e, nakdedar ho ta’uk, tan hatene buat sá mosu ba nia; tan ne’e, nia mai hakneak iha Jesus ain, hodi dehan sai lialós hotu. Jesus dehan ba nia: “Ha’u oan feto, ó nia fiar mak soi ó! Ó bele bá ona; ó hetan fali isin di’ak”.

Nia sei ko’alia hela, ema sira housi chefe Sinagoga nia uma, mai dehan: “Chefe, ita oan feto mate ona. Haterus tan Mestre atu halo saida?” Maibé, rona liafuan hirak ne’e, Nia dehan ba chefe Sinagoga: “Ó keta ta’uk, husu katak ó fiar”. Nia la husik ema ida tuir Nia: Nia lori de’it Pedro, Tiago ho João, Tiago nia alin. Sira to’o iha chefe Sinagoga nia uma. Jesus hetan ema rungu-ranga: balun tanis, balun hakilar. Nia tama hodi husu ba sira: “Tansá imi tanis hanesan ne’e? Labarik la mate, nia toba!” Sira hasara Nia. Jesus haruka sira sai hotu tiha, Nia lori labarik nia aman ho inan, ho tan sira nebé mai hamutuk ho Nia, sira tama ba fatin nebé labarik hela bá. Nia káer labarik nia liman, hodi dehan: “Talitha Kum” katak “Menina, Ha’u haruka ó, hamriik tiha”. Nia hamriik kedas, hahu la’o, basá, nia iha ona tinan sanulu resin rua. Ema hotu hakfodak. Jesus lia tun ba sira hodi bando atu ema ida la bele hateten buat ne’e; hafoin, Nia haruka fó han ba labarik.

Lia Maksoyn.

Leave a Reply

Your email address will not be published. Required fields are marked *