shadow
Diocese de Dili > NOTÍCIAS > LETURA DIÁRIA > Quarta-Feira, IV Semana Tempo Comum (ANO C)

Quarta-Feira, IV Semana Tempo Comum (ANO C)

Primeira Leitura           Heb. 12. 4-7, 11-15

Lia housi Surat bá Hebreu sira:

Maun alin sira: imi seidauk to’o hafunu hasouru salan to’o fakar ran. Imi haluha ona Escritura nia hanourin? Escritura hanourin imi hanesan oan: “Ha’u oan, keta hakribi Na’i nia hanourin! Keta laran susar, wainhira Na’i hanourin ó. Bása, Na’i hanourin ema nebé Nia hadomi. Na’i castigo ema hotu nebé Na’i simu hanesan oan”.

Imi terus atu hatene soe imi nia lisan áat. Na’i Maromak haré imi hanesan oan. Tebes, aman nebé mak la hanoin nia oan? Iha oras nebé Maromak hanourin ita, ita haré de’it terus, ita la haré liu ksolok. Maibé, abán-báin-rua, terus ne’e sei fila bá paz no justiça bá ema hotu nebé toman terus. Ne’e duni, foti nafatin imi nia liman nebé kole ona, halós imi nia ain tur maten. La’o tuir dalan lós, atu imi nebé la’o kude’ik, la bele sidi, maibé, atu bele hetan fali isin di’ak.

Buka moris iha dame ho ema hot-hotu, buka atu sai santo, básá, se lae karik, la bele haré Na’i. Haka’as-an atu hakbesik bá Maromak hodi simu Nia graça; atu abut moruk buat áat nian keta hada’et bá ema hot-hotu.

Maroma Futar Lia.

 

Salmo Responsorial                                                                               Sal. 102(103). 1-2, 13-14, 17-18ª (R. 17)

Refrão : Na’i hadomi nafatin ema nebé hamta’uk Nia!!! Repete-se

Ha’u klamar hahi Na’i,

Ha’u moris tomak hawélok Nia naran santo.

Ha’u klamar hahi Na’i,

La haluha Nia kmanek tomak. Refrão

 

Hanesan aman ida laran di’ak bá nia oan sira,

Nune’e Na’i hadomi sira nebé hamta’uk Nia.

Nia hatene ita mai housi nebé,

La haluha katak ita rai-rahun. Refrão

 

Na’i nia laran-luak rohan laek,

Otas hot-hotu nebé halo tuir Nia aliança;

No moris tuir Nia ukunfuan,

Sei hatene ita Maromak Nia laran-luak. Refrão

 

Aclamação                                                                                                                                                          Jo. 10. 27

Refrão : Aleluia. Aleluia!! Repete-se

Ha’u Nia bibi sira rona Ha’u lian, Na’i lia tun:

Ha’u hatene sira, sira mai tuir Ha’u. Refrão

 

Evangelho                                                                                                                                                           Mc. 6. 1-6

Na’i Jesus Cristo nia Evangelho nu’udar São Marcos haktuir:

Iha tempo nebá, Jesus la’o bá Nia rain ho Nia escolante sira. To’o tiha loron sábádo, Nia tama iha sinagoga atu hanourin. Ema sira nebé rona Nia ko’alia, sira hakfodak hodi hateten bá malu: “Na’i simu buat hirak ne’e hotu iha lós nebé? Oinsá mak Nia bele halo milagre boboot hirak ne’e? Nia la’os carpinteiro ida no Maria Nia Oan? Nia la’os Tiago, José, Judas ho Simão sira nia maun alin? Nia feton sira la hôrik iha ita leet?” Nune’e, sira sai bilán hotu. Jesus lia tun bá sira, dehan: “Iha de’it nia rai, iha de’it nia uma no parenti sira leet mak profeta la folin”. Tan ne’e, Jesus la halo milagre ida iha Nia rain. Nia fó isin di’ak bá ema moras bálun de’it, hodi tau liman bá sira. Jesus hakfodak, tan ema sira ne’e la fiar liu. Nune’e, Nia la’o tiha bá knua sira besi-besik, hodi hanourin.

Lia Maksoyn.

Leave a Reply

Your email address will not be published. Required fields are marked *