shadow
Diocese de Dili > NOTÍCIAS > LETURA DIÁRIA > Quinta-Feira, IV Semana Tempo Comum (ANO C)

Quinta-Feira, IV Semana Tempo Comum (ANO C)

Cinco Chagas do Senhor

 

Primeira Leitura                                                                            Is. 53. 1-10

Lia housi livro Isaías nian:

Sé mak fiar buat nebé ami rona ona hodi dehan sai ne’e? Na’i nia liman hatudu-an ba sé? Ha’u atan sai buras tiha nia liman iha Na’i nia oin hanesan ai oan moris ida, hanesan abut ida be hela rai maran; nia la furak no kapas atu dada ita matan; nia oin mós la furak atu bele haksolok ita. Ema hotu hakribi nia no fila kotuk ba nia; nia simu terus ho moras hotu, hanesan ida bé ema hakbiít hodi fila oin mai, nebé halo fudik la hatene buat ida. Nia terus tan ita hahalok áat sira; nia tau iha nia leten, ita nia terus hotu. Maibé ita haré nia hanesan ema ida bé simu castigo, ida hanesan bé Maromak hakanek no hatun tiha. Nia hetan kanek sira tan ita hahalok áat, ema harahun nia tan ita nia moris áat. Castigo nebé atu monu ba ita mak monu tiha fali iha nia leten; tan nia kanek sira mak ita hetan isin di’ak. Ita hotu hanesan bibi-malae sira, nebé la’o sala dalan, hodi tuir ida-idak nia dalan. Na’i hamonu tiha iha nia leten ita hotu ita hotu nia hahalok áat. Nia simu todan boot ne’e ho haraik-an hodi la dehan buat ida. Hanesan bibi malae bé lori bá fatin oho nian, hanesan bibi bé lian laek iha ema sira bé hamos nia fulun ne’e nia oin, nia mós la loke ibun. Ema loriatu oho nia hodi la tuir justiça, ema ida la buka la’o tuir nia? Ema fokit tiha nia housi ema moris sira rain, fó castigo ba nia tan Ha’u nia povo nia sala, sira halo nia rai kuak atu hakoi iha ema áat sira leet; sira harí nia rate iha ema riku sira leet, maski nia la halo buat áat, housi nia ibun, la hetan lia bosok ida. Maski nune’e, Na’i hakarak harahun nia hodi hasa’e nia moris nu’udar karan kmanek be kasu sala.

Maromak Futar Lia.

 

Salmo Responsorial                                                                        Sal. 21(22). 7-8, 15, 17-18a, 22-23 (R.18ab)

Refrão : Sira haborus tiha ha’u ain no liman, ha’u bele sura ha’u ruin hotu!!! Repete-se

Ha’u ular áat ida, la’os ema ida,

Ema sira hanehan ha’u,

Povo fila kotuk mai ha’u.

Sira hotu nebe haré ha’u hamoe ha’u,

Loke sira ibun hodi doko ulun. Refrão

 

Ha’u hanesan vé be suli,

Ha’u ruin sira hotu haketak- an tiha;

Ha’u fuan sai tiha hanesan lilin,

Nebe suli tiha hela iha ha’u laran. Refrão

 

Asu lubun boot hale’u hela ha’u,

Ema áat sira hadulas tiha ha’u.

Sira haborus tiha ha’u ain no ha’u liman,

Ha’u bele sura ha’u ruin hotu. Refrão

 

Soi ha’u housi leão be si’ak,

Housi dikur karu nian, soi tiha ema kiak ne’e.

Hodi ita naran, ha’u sei ko’alia

Ba ha’u maun – alin sira.

Iha sira leet, ha’u sei fó glória ba ita. Refrão

 

Aclamação                                                                                                                                                          Jo. 19. 34

Refrão : Aleluia, Aleluia!! Repete-se

Soldado ida sona borus Na’i nia sorin,

housi neba suli ran no vé. Refrão

 

Evangelho                                                                                                                                                     Jo. 19. 28-37

Na’i Jesus Cristo nia Evangelho nu’udar São João haktuir:

Iha tempo neba, hatene tiha katak buat hotu to’o tiha ona nia rohan, atu halo tuir lolós escritura, Jesus dehan ho lia maka’as : “Ha’u hamrook” . Iha neba, iha hela vaso ida ho tun sin nakonu. Sira kesi tiha hena ida be habokon iha tua sin, ba ai naruk ida hodi hato’o tiha Jesus nia ibun,. Koko tiha tua sin, Jesus dehan: “Buat hotu to’o ona nia rohan” .

Hafoin hali’is ulun, Nia iis kotu.

Tan sábado loron hadi’a- an nian, isin mate sira la bele hela nafatin iha Cruz basá loron sábado iha tempo neba loron boot. Nune’e, Judeu sira ba husu Pilatos atu hatohar tiha mate sira ain hodi hatun sira. Soldado sira mai, halo tiha ida be uluk nia ain, hafoin ida seluk nebe ema hedi tiha iha Cruz hamutuk ho Jesus.  Vainhira to’o ba Jesus, tan sira haré nia mate tiha ona, sira la hatohar nia ain sira; maibe soldado ida sona borus tiha nia sorin ho diman, housi nebe sai kedas ran ho vé. Ida be haré ne’e mak dehan lós, nia sasin mak lós liu. Nia hatene katak nia dehan lós, atu imi mós bele fiar. Lós duni,  buat hotu mosu nune’e atu halo tuir Escritura: “Ruin ida mós sira sei la halo tohar” . Dehann tan mós iha fatin seluk Escritura nian: “Sira se fihir ba ida nebe sira sona borus” .

Lia Maksoyn.

Leave a Reply

Your email address will not be published. Required fields are marked *