shadow
Diocese de Dili > NOTÍCIAS > LETURA DIÁRIA > Sexta-Feira, IV Semana Tempo Comum (ANO C)

Sexta-Feira, IV Semana Tempo Comum (ANO C)

Primeira Leitura                     Heb. 13. 1-8

Lia housi Surat ba Hebreu sira:

Maun alin sira: Hametin imi nia domin ba imi nia maun-alin sira. Keta haluha imi nia laran di’ak hodi simu ema, basá, tan laran di’ak, ema balun simu Anjo sira maibé, la hatene tuir. Imi hanoin mós sira bé iha kadeia, imi sei hanoin katak imi mós ho sira iha nebá; hanoin mós sira hotu nebé ema haré áat, basá, imi mós iha isin ida hanesan sira. Imi sei hamta’uk imi nia moris káben na’in, keta halo fo’er fatin káben na’in nian, basá, Maromak sei husu konta ba ema laran fóer sira no bá ema sira bé la hamta’uk ema nia káben. Imi keta buka de’it atu sai riku, maibé haksolok ho buat nebé imi iha, tan Maromak rasik dehan: “Ha’u sei la husik ó mesa-mesak, Ha’u sei hanoin nafatin atu tulun ó”. Nune’e, ho laran metin ita bele hateten: “Na’i mak ha’u nia tulun, ha’u sei la ta’uk! Sá lós mak ema ida bele halo mai ha’u?” Imi sei hanoin mós imi nia ulun sira; sira mak hanourin imi Na’i Maromak Nia liafuan. Imi haré bá, oinsá sira remata sira nia moris, imi buka banati tuir sira nia fiar. Jesus Cristo ohin loron, no sei ba nafatin.

Maromak Futar Lia.

 

Salmo Responsorial                                                                                        Sal. 26(27). 1, 3, 5, 8b-9abc (R. 1ª)

Refrão : Na’i ha’u nia naroman, ha’u nia maksoyn!!! Repete-se

Na’i ha’u nia naroman, ha’u nia maksoyn,

Ha’u sei ta’uk fali sé?

Na’i mak tahan ha’u nia moris;

Ha’u sei ta’uk fali sé? Refrão

 

Soldado sira funu hasouru ha’u karik,

Ha’u nia laran la nakdedar;

Sira hafunu hasouru ha’u karik,

Ha’u laran metin nafatin. Refrão

 

Na’i Nia uma mak sei sai ha’u mahan,

Iha susar nia laran;

Nia uma sai ha’u subar fatin, Nia sei tahan ha’u,

Iha tempo áat, ha’u sei hetan tulun. Refrão

 

Na’i, kalan loron ha’u buka Ita,

Keta heli-An mai ha’u,

Keta rai hirus, keta hewai Ita atan;

Maromak, Maksoyn tahan ha’u, tulun ha’u. Refrão

 

Aclamação                                                                                                                                                             Lc. 8. 15

Refrão : Aleluia, Aleluia!! Repete-se

Ksolok ba sira nebé rona Maromak Nia liafuan ho neon

no laran hodi fó fuan, tan sira laran metin. Refrão

 

Evagelho                                                                                                                                                         Mc. 6. 14-29

Na’ i Jesus Cristo nia Evangelho nu’udar São Marcos haktuir:

Iha tempo nebá, liurai Herodes rona kona ba Jesus, basá, Nia naran boot teb-tebes ona. Nia dehan katak João Baptista moris hi’as housi mate, tan ne’e, Nia iha kbiit atu halo milagre sira. Ema dehan: “Nia Elias”. Ema sira seluk dehan: “Nia profeta ida hanesan profeta sira uluk nian”. Maibé, wainhira Herodes rona sira ne’e, nia dehan: “Nia mak João Baptista duni, Ha’u tesi tiha Nia ulun, nia moris hi’as housi mate”.

Tebes duni, Herodes rasik haruka káer João Baptista, hodi hatama nia iha kadeia, tanba Herodíade, Herodes nia alin Filipi nia káben nebé nia hola fali nu’udar nia káben. Basá, João lia tun bá Herodes, dehan: “Tuir ukunfuan, ó la bele hola fali ó nia alin nia káben”. Herodíade hirus nia teb-tebes hodi hakarak oho nia, maibé, nia la bele, basá, Herodes ta’uk João, nebé nia hatene nu’udar ema di’ak no santo ida. Herodes tau matan ba nia; wainhira nia rona nia ko’alia, nia laran taridu barak, maibé, nia haksolok atu rona nia.

Tempo di’ak ida mosu mai wainhira Herodes halo tinan. Nia halo festa boot ida ba soldado sira nia na’in ulun sira no mós bá ema boot sira rai Galileia nian. wainhira Herodíade nia oan feto mai dansa, nia fó ksolok boot ba Herodes ho nia maluk sira. Tan ne’e, liurai dehan ba feto ne’e: “Husu buat naran de’it nebé ó hakarak, ha’u sei fó bá ó”. Nia dehan tan hodi jura: “Ha’u sei fó buat naran de’it nebé ó sei husu, maski ha’u nia reino nia sorin balun ida”. Feto ne’e sai hodi husu nia inan: “Ha’u sei husu sá lós”? Nia hatan: “João Baptista nia ulun”. Feto ne’e halai kedas ba liurai, hodi hateten: “Ha’u hakarak itaboot fó mai ha’u ohin kedas João Baptista nia ulun iha bandeja ida”. Liurai laran susar teb-tebes, maibé, tanba hanoin nia liafuan nebé nia hakotu tiha ona no mós nia maluk sira, nia ta’uk atu la halo tuir nia. Nune’e, liurai haruka kedas soldado ida atu lori João nia ulun mai. Ema ne’e la’o ba hodi tesi lia João nia ulun iha komarka laran; tuir mai, nia lori fali ulun ne’e iha bandeja ida nia laran hodi fó nia bá feto ne’e. Feto ne’e foti fó fali nia bá nia inan. Wainhira João nia escolante sira rona kona bá buat hirak ne’e, sira mai lori nia isin mate hodi bá hakoi.

Lia Maksoyn.

Leave a Reply

Your email address will not be published. Required fields are marked *