shadow
Diocese de Dili > NOTÍCIAS > LETURA DIÁRIA > V Domingo Tempo Comum (ANO C)

V Domingo Tempo Comum (ANO C)

Primeira Leitura                   Is. 6, 1-2ª. 3-8

Lia housi Livro Profeta Isaías:

iha tempo nebé Ozias, liurai Judá nia mate, ha’u haré Na’i hatodan-an iha trono ida, áas liu tomak; Nia tais taka nakonu uma santo. Iha Na’i futar oin. Anjo Serafim sira hamriik hela; sira ida-idak iha liras neen. Ida hakilar ba ida seluk: “Santo, santo, santo, Na’i Maromak buat hotu-hotu nian. Rai tomak haklaken Nia glória”. Wainhira Anjo sira hakilar, odamatan sira nakdoko, áhi-suhar nakonu iha uma santo laran. Nune’e ha’u dehan: “Adô! Ha’u susar ona! Basá, ha’u mane ibun fo’er. Ha’u horik hamutuk ho ema ibun fo’er sira. Ha’u matan rasik haré Liurai, buat hotu-hotu nia Na’in”. Anjo Serafim ida semo hasouru ha’u; Nia kaer hela iha liman áhi-klaak hasai housi altar housi besi knabit ida. Nia kona ha’u ibun ho áhi klaak ne’e hodi dehan mai ha’u: “Áhi klaak ne’e kona tiha ó nia ibun, nia kasu ó salan, halakon ó nia hahalok áat”. Iha oras ne’e, ha’u Na’i hateten: “Ha’u sei haruka lós sê? Sê mak hodi Ha’u nia fatin?” Ha’u hatan: “Ha’u mak ne’e! Bele haruka ha’u ba!”.

Maromak Futar Lia.

 

Salmo Responsorial                                                                                       Sal. 137(138), 1-2a. 2bc-3. 4-5, 7c-8

Refrão : Iha Anjo sira oin, ha’u hawelok Ita Boot!!! Repete-se

Na’i, ho neon no laran, ha’u agradece Ita,

Tan Ita rona ha’u lian.

Iha Anjo sira oin ha’u sei hawelok Ita,

Sei hana’i iha Ita nia kadunan. Refrão

 

Na’i sei fó agradece tan Ita domin no lailos,

Tan Ita nia lia menon boot liu Ita naran boot.

Ha’ husu harohan, Ita rona ha’u.

Ha’u moris neon metin teb-tebes. Refrão

 

Ita liman beran sei soy ha’u,

Ha’u Na’in sei hato’o kmanek hotu mai ha’u.

Na’i, Ita nia laran luak rohan,

Ita la hakribit buat Ita haki’ak. Refrão

 

Liurai hotu-hotu sei fo agradece,

Wainhira rona Ita lia-fuan.

Hahí hawelok Na’i nia hahalok di’ak,

Tan Na’i nia kbiit boot tebes. Refrão

 

Segunda Leitura                                                                                                                                       1 Cor. 15, 1-11

Lia housi São Paulo nia surat ba sarani sira iha Corinto:

Maun-alin sira: Ha’u fo hanoin ba imi Evangelho nebé ha’u tatoli ba imi, no imi simu ona, hodi halo tuir nafatin. Imi halo tuir lolós karik nu’udar ha’u hanourin, imi mos bele soy imi-an rasik. Oin seluk, imi fiar leet de’it. Uluk knana’in, ha’u tatoli ba imi, buat nebé ha’u rasik simu ona, katak: Cristo mate tan ita salan; tuir Escritura, ema hakoi Nia; liu loron tolu Nia moris hias, tuir Escritura. Hafoin Nia mosu ba Pedro, tuir teni mosu ba sira na’in sanulu resin rua. Tuir fali, Nia mosu dala ida de’it ba maun-alin atus lima resin; sira ne’e barak liu sei moris hela, balun mate tiha ona. Tuir fali, Nia mosu ba Tiago, hafoin, mosu ba Apóstolo sira hotu. Ikus liu, Nia mosu mai ha’u, ha’u ida be la moris tuir tempo. Basá, ha’u Apóstolo ki’ik liu sira hotu; Ha’u la soyn ema atu bolu ha’u Apóstolo, tan ha’u hatada Maromak nia Kreda. Maibé, ohin loron, ha’u sai nune’e, hodi de’it Maromak nia tulun. Tulun Maromak haraik mai ha’u, la lakon leet. Maibé, ha’u serviço liu tan sira mak iha, katak, laós ha’u, maibé, Maromak nia tulun nebé horik ho ha’u; ne’e duni, ha’u ho sira mai hanourin oin sá, nune’e duni mak imi fiar.

Maromak Futar Lia.

 

Aclamação                                                                                                                                                         Jo. 15. 15b

Refrão : Aleluia. Aleluia!! Repete-se

Ha’u halia imi belun, Na’i dehan. Tan lia hotu Ha’u rona housi Ha’u Aman,

Ha’u fo hatene hotu ba imi. Refrão

 

Evangelho                                                                                                                                                           Lc. 5. 1-11

Na’i Jesus Cristo nia Evangelho nu’udar São Lucas haktuir:

Iha tempo nebá, ema lubun boot ida hale’u hela Jesus atu rona Maromak lia-fuan. Nia hamriik hela, besik tasi Genezaré. Nia haré korkora rua, kesi iha tasi ibun. Pescador sira husik tiha ro, fase hela dai; Sa’e tiha ba Simão nia ro, Jesus husu ba nia atu tama witoan ba laran. Hafoin, Nia tur tiha iha ro laran, hahú hanourin povo sira.  Ko’alia hotu tiha, Jesus dehan ba Simão: “Tama liu tiha ba tasi laran. Imi bele tihá ba!” Simão hatán: “Mestre, ami tihá kalan tomak, la kaer buat ida! Maibé, tan Ita dehan ona, ami soe duni dai”. Sira halo nune’e, hodi kaer duni ikan barak teb-tebes, dai atu besik naklés daudaun. Sira le’ok liman hodi bolu maluk sira iha ro seluk, atu bolu sira. Sira mai duni; ro rua ne’e ikan nakonu didi’ak besik atu mout. Haré tiha ida ne’e, Simão Pedro monu-ain ba Jesus, hodi dehan: “Na’i, hadook-An tiha housi ha’u, tan ha’u ema maksalak ida!” Tebes duni, nia ho nia maluk sira seluk hakfodak teb-tebes, tan ikan sira kaer. Zebedeu nia oan sira, João no Tiago, Simão nia maluk, sira mos hakfodak. Jesus dehan ba Simão: “Keta ta’uk, houri ohin ba oin, ó sei tihá mak ema!” Dada tiha ro ba tasi ibun, sira husik buat hotu atu la’o tuir Jesus.

Lia Maksoyn,

Leave a Reply

Your email address will not be published. Required fields are marked *