shadow
Diocese de Dili > NOTÍCIAS > LETURA DIÁRIA > Segunda-Feira, V Semana Tempo Comum (ANO C)

Segunda-Feira, V Semana Tempo Comum (ANO C)

Primeira Leitura                      Gen. 1. 1-19

Lia housi livro Génesis:

Uluk knana’in, Maromak hakiak lalehan ho rai. Rai sei tomak no mamuk hela. Nakukun taka netik hela tasi, Maromak Nia espírito hôrik hela iha ué leten.

Maromak lia tun, dehan: “Iha naroman ba”. Naroman mosu kedas. Maromak haré katak naroman furak; haketak tiha naroman housi nakukun. Ba naroman Maromak hanaran “loron”, no ba nakukun hanaran ”kalan”. Nune’e, mosu loraik no tuir mai dader: ne’e loron ba dala uluk.

Maromak lia tun tan: “Iha firmamento ida iha ué sira leten ba, atu tau sira keta-ketak”. Nune’e, mosu tiha duni. Maromak halo firmamento hodi haketak ué sira be iha firmamento nia okos. Ba firmamento, Maromak hanaran ‘lalehan’. Mosu loraik, no tuir mai dader: ne’e loron ba dala rua.

Maromak lia tun tan: “Ué sira hotu be iha lalehan okos, halibur hamutuk iha fatin ida ba, atu mosu rai-maran”. Mosu tiha duni nune’e. Ba fatin maran Maromak tau naran ‘rai’, no ba ué sira ‘tasi’. Maromak haré katak buat hotu mesak furak.

Maromak lia tun teni: “Hakonu rai ho ai-horis oi-oin ba: du’ut nurak oi-oin ho nia musan, ai oi-oin nebe fó fuan ho musan, moris buras iha rai leten”. Mosu duni nune’e. Rai haburas ai-horis oi-oin: du’ut nurak oi-oin ho musan. Maromak haré katak buat Nia hakiak mesak furak. Mosu loraik ida no tuir mai dader: ne’e loron ba  dala tolu.

Maromak lia tun tan hodi dehan: “Mosu naroman iha lalehan ba, atu haketak loron housi kalan. Sira hanesan sinal atu tada festa sira, loron no tinan sira. Sira iha lalehan atu fó naroman ba rai tomak. Mosu duni nune’e. Maromak halo naroman boot rua: ida boot atu fó naroman iha loron, no ida kiik atu fó naroman iha kalan; hafoin halo mós fitun sira. Maromak tau sira iha lalehan atu fó naroman ba rai, hodi ukun ho haketak loron housi kalan. Maromak haré katak buat hotu Nia hakiak furak tebes. Nune’e mosu loraik ida, no tuir mai dader: ne’e loron ba  dala háat.

Maromak Futar Lia.

 

Salmo Responsorial                                                               Sal. 103(104). 1-2ª, 5-6, 10, 12, 24, 35c (R. 31b)

Refrão : Na’i haksolok tan buat hotu Nia hakiak!!! Repete-se

Ha’u klamar hahi Na’i;

Na’i, ha’u Maromak, Ita boot tebes!

Ita iha kbiit no simu hahi,

Hafutar ho hatais nabilan lakan! Refrão

 

Ita harí rai ho riin besi,

Basá, nia hun la nakdoko.

Housi Ita liafuan tasi taka rai,

Ué sa’e liu foho áas sira. Refrão

 

Housi rai suli sai ué no moris mota sira,

Housi foho sira leet, ke’e sira suli fatin.

Iha mota sira ninin, manu sira housi lalehan

Halo sira knu’uk,

Housi ai-tahan sira leet, ita rona sira hananu. Refrão

 

Na’i, buat hotu Ita hakiak sura la bele;

Buat hotu Ita halo ho matenek!

Buat hotu Ita hakiak, nakonu iha mundo;

Ha’u klamar hahi Na’i! Refrão

 

Aclamação                                                                                                                                                            Mt. 4. 23

Refrão : Aleluia. Aleluia!! Repete-se

Na’i Jesus haklaken liafuan di’ak reino

no fó isin di’ak ba moras sira iha povo nia leet.  Refrão

 

Evangelho                                                                                                                                                      Mc. 6. 53-56

Na’i Jesus Cristo nia Evangelho nu’udar São Marcos haktuir:

Iha tempo neba, Jesus ho Nia escolante sira hakur liu tiha ba tasi nia sorin balu ba, sira la’o ba Genesaré. Sira kesi ró iha neba. Uainhira sira tun housi ró, ema barak hatene kedas Jesus. Sira halai ba knua nebe besi-besik hodi lori mai ema moras sira iha sira nia toba-fatin, ba fatin nebe sira rona katak Jesus hôrik hela. Uainhira Nia tama iha knua eh cidade ruma ka la’o iha dalan, sira tau ema moras sira iha fatin luan hodi husu Nia atu husik sira kona Nia hatais nia ninin. Sira hotu nebe kona Nia hetan isin di’ak.

Lia Maksoyn.

Leave a Reply

Your email address will not be published. Required fields are marked *