shadow
Diocese de Dili > NOTÍCIAS > LETURA DIÁRIA > Terça-Feira, V Semana Tempo Comum (ANO C)

Terça-Feira, V Semana Tempo Comum (ANO C)

Primeira Leitura                Gen. 1. 20. 2. 4a

Lia housi livro Génesis:

Na’i Maromak lia tun dehan: “Ikan sira oi-oin be moris, sai ua’in iha tasi ba. Manu sira be moris, semo iha rai leten no iha lalehan okos ba”. Mosu duni nune’e. Maromak hakiak ikan sira bobo’ot no oi-oin nebe nani ba mai iha taswi laran, no manu sira oi-oin nebe semo iha lalehan. Maromak haré katak buat nebe Nia hakiak, furak tebes. Nune’e, Nia haraik bensa ba sira hodi dehan: “Sai buras hodi sai ua’in ba, hodi hakonu iha tasi; no manu sira hakonu ihas rai leten”. Mai loraik ida no dader ida; ne’e loron ba  dala lima.

Maromak dehan: “Rai fó moris balada oi-oin ba, tuir sira ida-idak nia dalas: balada maus sira, balada sira be dolar no balada fuik sira oi-oin”. Mosu tiha duni nune’e. Na’i hakiak mesak oi-oin balada fuik sira, balada maus sira no balada sira nebe dolar iha rai. Maromak haré katak buat hotu mesak furak.

Maromak hateten  tan: “Ita halo ema tuir Ita Nia ílas, atu ukun ikan sira iha tasi, manu sira iha áas, balada dian no fuik sira, no samea sira be dolar iha rai”. Maromak hakiak ema tuir Nia ílas, ne’e mak Maromak Nia ílas nebe Nia hakiak:L Nia hakiak ema mane no feto. Maromak haraik bensa ba sira hodi dehan: “Sai buras no ua’inba hodi moris nakonu iha rai. Imi ukun ikan sira iha tasi, manu sira iha lalehan no balada sira hotu nebe moris iha rai leten”. Maromak lia tun teni dehan: “Ha’u fó ba imi ai-horis hot-hotu nebe fó musan iha rai leten, no ai-horis nebe fó fuan ho musan. Ha’u fó ba imi nu’udar imi nia aihan. Balada fuik sira, ba manu sira be semo iha lalehan, no balada hot-hotu nebe la’o iha rai, nebe moris, Ha’u fó du’ut nurak no aih-horis selu-seluk atu sira han”. Mosu tiha duni nune’e. Maromak haré katak buat hotu nebe Nia halo mesak furak tebes. Mai loraik ida no dader ida: ne’e, loron ba  dala neen.

Nune’e, halo remata lalehan ho rai no buat hotu nebe hôrik iha sira. Hotu tiha, iha loron ba  dala hitu, Maromak hamahan-An housi knaar nebe Nia hala’o. Maromak haraik bensa hodi halo santo  loron ba  dala hitu ne’e, basá, iha loron ne’e Nia hamahan-An housi Nia knaar hakiak mundo nian. ne’e mak lalehan no rai nia moris uainhira Maromak hakiak.

Maromak Futar Lia.

 

Salmo Responsorial                                                                                                       Sal. 8. 4-5, 6-7, 8-9 (R. 2ª)

Refrão : Na’i, ami nia Maromak, Ita naran boot tebes iha rai tomak!!! Repete-se

Uainhira ha’u fihir lalehan be Ita liman halo,

Fulan no fitun be Ita hakiak;

Sá make ma atu Ita hanoin nia,

Ema nia oan, atu Ita tau matan ba? Refrão

 

Ita halo nia uitoan kiik liu fali anjo sira,

Ho glória no rahun di’ak Ita hafutar nia;

Ita fó kbiit ba nia hodi ukun sasan hotu be Ita liman halo,

Ita tau buat hotu iha nia ain okos. Refrão

 

Bibi sira no balada maus sira,

No mós balada fuik sira hotu,

Manu sira be semo iha lalehan,

No ikan sira be moris iha tasi,

No buat hotu be nani la’o iha tasi. Refrão

 

Aclamação                                                                                                                                 Sal. 118(119). 36ª, 29b

Refrão : Aleluia. Aleluia!! Repete-se

Halo ha’u fuan tuir Ita ukunfuan;

haraik mai ha’u graça atu moris tuir Ita lei. Refrão

 

Evangelho                                                                                                                                                         Mc. 7. 1-13

Na’i Jesus Cristo nia Evangelho nu’udar São Marcos haktuir:

Iha tempo neba, ema escriba no fariseu balu mai housi Jerusalém halibur hela ho Jesus. Sira haré katak Jesus nia escolante sira barak han ho liman fo’er, katak la dauk fase. Ema fariseu no judeu sira hotu la bele han, uainhira sira la dauk fase didi’ak sira liman tuir lisan bein sira. Sira fila tiha mai uma, la tur atu han, uainhira sira la fase-an tiha, tuir sira lisan. Sira moris tuir tan lisan selu-seluk, tan de’it lisan bein sira nian, hanesan: fase copo, fase buli, solur sana riti. Tan ne’e, fariseu sira no escriba sira husu ba Jesus: “Tan sá Ó Nia escolante sira la tuir bein sira nia lisan, maibe, sira han ho liman fo’er?” Jesus lia tun ba sira: “Imi mesak laran makerek tan-tanan. Profeta Isaías ko’alia lós duni kona ba imi uainhira nia hakerek dehan: ‘Povo ida ne’e hana’i Ha’u ho de’it ibun tutun, maibe nia laran dodok lós housi Ha’u! Sira hahi Ha’u leet de’it. Doutrina sira hanourin, mesak ema sira nia ukunfuan de’it. Imi husik tiha Maromak Nia ukunfuan hodi tuir fali ema nia lisan”. Nia dehan tan ba sira: “Imi hatene bobar Maromak Nia ukunfuan tuir imi nia lisan sira. Moisés rasik dehan: ‘Hamta’uk ó nia aman no inan no ema nebe hateten áat nia aman ka nia inan sei mate’. Imi fali dehan: “Ema ruma bele dehan ba nia aman ka inan: ‘Buat nebe imi bele hetan housi ha’u mak corbã-katak hasa’e tiha ona ba Maromak’. Nune’e, imi la husik ona nia atu halo buat ruma hodi tulun nia aman ka inan. Nune’e, imi halo Maromak Nia ukunfuan folin laek atu hametin fali  imi nia lisan nebe imi fó sai ba imi nia oan sira. Imi sei halo buat barak hanesan ne’e”.

Lia Maksoyn.

Leave a Reply

Your email address will not be published. Required fields are marked *