shadow
Diocese de Dili > NOTÍCIAS > LETURA DIÁRIA > Quinta-Feira, V Semana Tempo Comum (ANO C)

Quinta-Feira, V Semana Tempo Comum (ANO C)

Primeira Leitura                     Gen. 2. 18-25

Lia housi livro Génesis:

Halo tiha ema mane, Na’i Maromak lia tun, dehan: “Mane hela mesak la di’ak ida. Ha’u sei halo nia maluk ida atu tulun nia”. Hodi rai, Na’i Maromak halo tiha balada hot-hotu iha rai, no manu hot-hotu semo iha leten. Hafoin, lori sira hotu ba mane nia oin, atu nia hanaran sira ida-idak. Mane fó naran duni ba balada dian sira hotu, ba manu sira hotu, no ba balada fuik sira hotu. Maibe, ba nia, niala hetan maluk ida hanesan nia. Nune’e, Na’i Maromak halo mane dukur hodi toba tiha. Hafoin, hasai mane nia knosan ruin ida hodi tau hikas isin iha nia fatin. Hodi knosan nebe hasai housi mane nia knotak, Na’I Maromak halo feto ida, hafoin, fó ba mane. Haré tiha feto ne’e, mane haksolok hodi dehan: “Tebes duni, ida ne’e mak ruin housi ha’u nia ruin, isin housi ha’u nia isin. Nia sei hanaran ‘feto’, basá, nia mai housi ‘mane’. Tanba ne’e, mane sei husik aman inan, atu bele hôrik hamutuk ho nia feen, sira rua sei sai ema isin ida de’it. Mane ho feto, sira rua la’o isin tanan, maibe, la sente móe ba malu.

Maromak Futar Lia.

 

Salmo Responsorial                                                                                               Sal. 127(128). 1-2, 3, 4-5 (R. cf. 1ª)

Refrão : Ksolok ba sira be hamta’uk Na’i!!! Repete-se

Ksolok ba sira be hamta’uk Na’i,

Hodi la’o tuir Na’i dalan!

Housi ó nia liman nia kole mak ó han,

Ó sei haksolok hodi moris di’ak. Refrão

 

Ó nia kaben hanesan uvas buras nafatin,

Iha ó nia uma laran.

Ó nia oan sira hanesan oliveira nia tubun,

Hadulas ó nia mesa. Refrão

 

Nune’e, ema be hamta’uk Na’i simu bensa,

Na’i haraik bensa ba ó housi foho Sião.

Ó bele haré Jerusalém be buras

Iha ó nia moris tomak. Refrão

 

Aclamação                                                                                                                                                                Tg. 1. 21b,c

Refrão : Aleluia. Aleluia!! Repete-se

Simu ho laran midar liafuan nebe kuda ona iha imi:

nia bele soi imi klamar. Refrão

 

Evangelho                                                                                                                                                             Mc. 7. 24-30

Na’i Jesus Cristo nia Evangelho nu’udar São Marcos haktuir:

Iha tempo neba, Jesus la’o ba rai Tiro no Sídon. Nia tama iha uma ida, la kohi atu ema ruma hatene katak Nia iha neba, maibe, ema sira hatene. Nune’e, feto ida nebe iha oan feto ida be iha diabo iha nia laran, uainhira rona tiha kona ba Nia, mai tukutur  iha Nia ain. Nia ema gentio nebe moris iha rai siro-fenícia. Nia husu ba Jesus atu duni sai diabo ne’e housi nia oan feto. Maibe, Jesus hatan ba nia: “Husik uma-kain nia oan sira han didi’ak lai. Basá, hasai aihan housi labarik sira, hodi fó fali ba asu sira, ne’e la di’ak”. Maibe, feto ne’e hatan: “Lós duni, Na’I, maibe, asu sira mós, iha mesa okos han buat nebe sira soe tiha”. Jesus dehan ba feto: “Tan ó nia liafuan hirak ne’e, ó bele ba ona. Diabo sai tiha ona housi ó nia oan”. Uainhira feto ne’e to’o uma, nia hetan nia oan feto toba hela iha toba-fatin. Diabo sai tiha ona!.

Lia Maksoyn.

Leave a Reply

Your email address will not be published. Required fields are marked *