shadow
Diocese de Dili > NOTÍCIAS > LETURA DIÁRIA > Sábado, V Semana Tempo Comum (ANO C)

Sábado, V Semana Tempo Comum (ANO C)

Primeira Leitura                      Gen. 3. 9-24

Lia housi livro Génesis:

Adão han tiha aifuan bandu nian, Na’i Maromak bolu kedas nia dehan: “Ó iha nebe?” Adão hatan: “Ha’u rona Itaboot ain nabotu iha to’os laran, ha’u ta’uk, basá, ha’u isin tanan; nune’e, ha’u haksumik tiha an”. “Sé mak dehan katak ó isin tanan? To’ok ó há karik aifuan Ha’u bandu há?” Adão hatan: “Feto be Itaboot haraik mai ha’u nu’udar ha’u maluk, nia mak fó aifuan ne’e mai ha’u, ha’u há duni”.

Na’i Maromak lia tun fali ba feto, dehan: “Tansá ó halo ida ne’e?” Feto hatan: “Samea bosok ha’u, ha’u há duni”. Nune’e, Maromak lia tun ba samea, dehan: “Tansá ó halo ida ne’e? Ó sei hetan malisan áat liu iha balada dian no balada fuik sira leet. Ó sei dolar de’it ho ó nia kabun, lor-loron ó sei há de’it rai rahun iha ó nia moris tomak. Ha’u sei hamoris odio iha ó no iha feto nia leet no mós ba ó nia derasaan no ba feto nia derasaan. Feto ne’e sei sama harahun ó nia ulun. Ó sei buka atu tata nia ain tuban”. Adão hanaran nia káben, Eva, basá nia mak sei sai ema hot-hotu nia inan.

Na’i Maromak lia tun ba feto, dehan: “Ha’u sei halo ó terus ua’in uainhira ó kôus, ó sei terus liu tan uainhira ó tur-ahi. Ó sei hamta’uk ó nia la’en, nia mak sei ukun ó”. Hafoin, dehan fali ba mane: “Tan ó halo tuir ó nia féen nia liafuan, hodi há ai-fuan nebe Ha’u bandu há, rai sei hetan malisan tan ó. Ó sei serbisu maka’as iha ó nia moris tomak atu bele hetan aihan. Housi rai sei moris ai-horis kroat no tarak nian, ó sei há du’ut nebe moris iha rai. Ó sei há pão hodi ó nia kosar uen, to’o ó fila fali ba rai, basá, ó mai housi rai. Tan hodi rai-rahun mak hakiak ó, ne’e duni, ó sei fila fali ba nia”. Adão hanaran nia káben Eva, basá, nia mak sei sai ema hot-hotu nia inan. Nune’e, Na’i Maromak haraik ba mane no feto hatais kulit nian atu sira bele hatais. Hafoin, Na’i Maromak dehan: “Ema sai tiha nu’udar Ita ida, basá, nia hatene buat di’ak no áat. Oras ne’e, nia la lolo liman atu ku’u mós ai-fuan ai-horis moris nian, atu há hodi moris ba nafarin!” Na’i Maromak haruka sira sai housi jardim Éden nian, atu kuda rai, nebe hodi moris mai. Duni sai  tiha ema, Nia tau Querubim sira housi loro-sa’e jardim Éden nian, ho surik áhi nian, atu hein nafatin ai-horis moris nian.

Maromak Futar Lia.

 

Salmo Responsorial                                                                                             Sal. 89(90). 2, 3-4, 5-6, 12-13 (R. 1)

Refrão : Na’i, Ita mak ami mahein, housi otas ba otas!!! Repete-se

Molok foho sira mosu mai,

Molok rai no mundo moris,

Houri uluk kedas  no ba nafatin,

Na’i, Ita mak Maromak. Refrão

 

Itaboot halo ema sia fila fali ba rai-rahun,

Hodi dehan: “Adão nia oan sira, imi fila!”

Na’i, iha Itaboot futar oin tinan rihun ida,

Hanesan loron houri sehik be liu ona. Refrão

 

Na’i, Ita lori sira, sira la’o liu lais,

Hanesan mehi rai-hun mutin nian;

Hanesan du’ut matak dader,

Be namlaik loraik. Refrão

 

Na’i, hanourin ami sura ami loron,

Atu hetan matenek fuan nian.

Na’i, fila hi’as mai! To’o uainhira.

Na’i, sadi’a Ita atan sira. Refrão

 

Aclamação                                                                                                                                                                   Mt. 4. 4b

Refrão : Aleluia. Aleluia!! Repete-se

Ema la moris de’it ho aihan, maibe ho liafuan sira nebe

Sai housi Maromak futar ibun. Refrão

 

Evangelho                                                                                                                                                                Mc. 8. 1-10

Na’i Jesus Cristo nia Evangelho nu’udar São Marcos haktuir:

Iha loron hirak neba, ema lubun boot halibur hikas fali, tan sira la iha buat ida atu há; Jesus bolu nia escolante sira hodi dehan ba sira: “Ha’u hanoin teb-tebes ema sira ne’e; loron tolu ona mak sira hela hamutuk ho Ha’u; sira la iha buat ida  atu há. Ha’u haruka sira ba uma karik hodi la lori aihan, sira sei monu iha dalan; sira balun mai housi dook”. Escolante sira simu hodi dehan ba Nia: “Oinsá Ita bele fó han ba sira, iha rai fuik maran ne’e?” Maibe, Jesus husu fali ba sira: “Imi iha pão fuan hira?” Sira hatan: “Ami iha pão fuan hitu”. Tuir mai, Jesus haruka sira atu tur hotu iha rai. Hafoin, Jesus káer tiha pão fuan hitu ne’e, fó agradece, silu, hodi fó ba Nia escolante sira, atu fahe ba ema  lubun boot ne’e. Iha mós ikan kiik balun. Jesus fó bensa mós ba ikan sira ne’e, hodi haruka atu fahe mós ba ema lubun boot ne’e. Sira há to’o bosu. Sira halibur baluk oan sira nebe resin iha ta’an hitu. Ema sira ne’e besik rihun háat. Tuir mai, Jesus husik hela sira hodi sa’e ba  ró ho Nia escolante sira, hodi ba iha rai Dalmanutá.

Lia Maksoyn.

Leave a Reply

Your email address will not be published. Required fields are marked *