shadow
Diocese de Dili > NOTÍCIAS > LETURA DIÁRIA > Segunda-Feira, VI Semana Tempo Comum (ANO C)

Segunda-Feira, VI Semana Tempo Comum (ANO C)

Primeira Leitura                  Gen. 1. 15, 25

Lia housi livro Génesis:

Iha loron hirak neba, Adão moris hamutuk ho Eva, nia féen. Eva kôus no tur-áhi oan mane ida, naran Caim. Nune’e, Eva dehan: “Ha’u hetan oan mane ida hodi Na’i Nia tulun”. Tuir mai, hetan tan oan mane ida seluk, naran Abel, Caim nia alin. Abel, ema bibi-atan, nia hein bibi. Caim, ema tóos na’in, nia halo tóos. Liu tiha loron ruma, Caim hasa’e sacrificio ba Maromak, hodi sasán housi nia tóos; Abel hasa’e ba Maromak bibi oan kaua’ik bokur housi nia bibi luhan. Maromak simu Abel nia sacrificio ho laran ksolok, maibe, la hateke ba Caim nian. Caim hirus teb-tebes ho neon sala. Nune’e, Na’i hateten ba Caim: “Tan sá ó hirus no neon sala? Ó halo di’ak karik, ó sei bele foti ó ulun. Maibe, ó nia hahalok áat karik, sala sei mai tuku ó nia odamatan. Sala ne’e hakarak monu ba ó leten, maibe, ó sei bele manan nia”. Nune’e, Caim hateten ba nia alin Abel: “Mai, ita ba rai ulun neba”. To’o tiha nebá, Caim tau liman ba nia alin Abel hodi oho tiha nia.

Na’i dehan ba Caim: “Ó nia alin Abel iha nebe?” Caim hatan: “Ha’u la hatene: Ha’u mak hein ha’u nia alin ka?” Na’I dehan teni ba nia: Ó halo sá ne’e? Lian ó alin nia ran nian, hakilar housi rai to’o mai Ha’u. tan ne’e, ema hot-hotu sei hewai ó, sei duni sai ó housi rai ne’e, nebé loke ona nia ibun atu simu ó nia alin nia ran housi ó liman. Ó kuda karik buat ruma iha rai ne’e, nia sei la fó fuan. Ó sei la’o lemo iha rai hot-hotu tan ema duni tuir ó”. Caim dehan ba Na’i: “Ha’u nia castigo ne’e boot tebes nebé ha’u lori la bele. Duni sai ona ha’u housi ne’e, oras ne’e ha’u sei ba subar ha’u-an housi Ita futar oin. Ha’u sei la’o lemo iha mundo rai klaran; ema nebé hakarak hetan ha’u, nia sei oho ha’u”. Na’i hatan ba nia, dehan: “Lae! Ema ruma oho karik Caim, nia sei hetan castigo dala hitu”. Na’i tau sinal ida iha Caim, atu ema ida la bele halo áat ba nia uainhira hetan nia.

Adão moris hamutuk ho nia féen hodi hetan fali oan mane ida seluk nebe sira hanaran Set, hodi dehan: “Maromak haraik fali ona mai ha’u oan mane ida seluk, iha Abel nia fatin, nebé Caim oho tiha nia”.

Maromak Futar Lia.

 

Salmo Responsorial                                                                                                                                              Sal. 49(50). 1, 8, 16bc-17, 20-21 (R. 14ª)

Refrão : Hasa’e ba Maromak sacrificio ida hahí nian!!! Repete-se

Na’i ko’alia, Maromak kbiit na’in,

Nia bolu rai tomak housi loro-sa’e to’o loro-monu.

La’os tan ó nia sacrificio Ha’u castigo ó,

Ó nia buat-karan iha nafatin Ha’u nia oin. Refrão

 

Oin sá ó bele haktuir Ha’u ukunfuan,

No temi ho ó ibun Ha’u moruk,

Ó be hakribi Ha’u Nia hanourin,

Hodi fila kotuk ba Ha’u Nia liafuan? Refrão

 

Ó tur hodi ko’alia hasouru ó nia maun-alin,

No hafo’er ó inan rasik nia oan sira naran?

Ha’u sei la nonok; Ha’u sei hirus ó,

Hodi fó sai hotu iha oin, ó nia hahalok. Refrão

 

Aclamação                                                                                                                                                                                                                       Jo. 14. 6

Refrão : Aleluia. Aleluia!! Repete-se

Ha’u mak dalan, lialós no moris, Na’i lia tun:

Ema ida la liu karik housi Ha’u, Nia la bele to’o Aman Maromak. Refrão

 

Evangelho                                                                                                                                                                                                               Mc.  8. 11-13

Na’i Jesus Cristo nia Evangelho nu’udar São Marcos haktuir:

Iha tempo nebá, fariseu sira hakbesik ba Jesus hodi hahu haksesuk malu ho Nia. Sira husu ba Nia sinal ida  housi Lalehan, atu koko Nia. Jesus ho neon sala teb-tebes hatan ba sira: “Tan sá ema sira otas ne’e nian, husu sinal ida? Tebes, Ha’u dehan ba imi: sei la fó sinal ba ema sira otas ne’e nian”. Hafoin, Nia husik sira, sa’e fali ba ró atu hakur ba tasi nia sorin balu ba.

Lia Maksoyn.

Leave a Reply

Your email address will not be published. Required fields are marked *