shadow
Diocese de Dili > NOTÍCIAS > LETURA DIÁRIA > Terça-Feira, VI Semana Tempo Comum (ANO C)

Terça-Feira, VI Semana Tempo Comum (ANO C)

Primeira Leitura         Gen. 6. 5-8; 7. 1-5, 10

Lia housi livro Génesis:

Iha loron hirak nebá, Na’i haré katak ema nia sala iha mundo, hetok boot ba beibeik, no mós haré katak housi nia fuan moris de’it hahalok áat loron ba loron. Na’i neon sala tan hakiak ema iha mundo, Na’i nia fuan terus tebes. Tan ne’e, Na’i dehan: “Ha’u ba halo mohu lakon ema hot-hotu nebé Ha’u hakiak iha rai; ema, balada  dian no fuik, samea no ular sira, manu sira be semo iha lalehan, Ha’u neon sala tan hakiak sira”. Maibe, Noé ema di’ak, haksolok Maromak.

Na’i dehan ba Noé: Tama ba iha ró ó ho ó nia familia, basá, housi Ha’u matan, Ha’u haré katak ó ema di’ak iha ema sira ne’e nia leet. Housi balada sala laek sira, ó sei lori par hitu, ida-idak ho aman no inan ida; housi balada sira be sala da’et, ó sei lori par ida, inan no aman; housi manu sira be semo iha lalehan, ó lori mós par hitu, ida-idak ho aman no inan ida, atu sira nia raça moris nafatin iha mundo rai-klaran. Basá, liu tiha loron hitu, Ha’u sei haruka udan tau iha loron háat nulu no kalan háat nulu nia laran, Ha’u sei halakon mohu iha mundo rai-klaran, balada sira hotu nebé Ha’u hakiak”.

Noé halo tuir hotu buat nebé Na’i haruka halo. Liu tiha loron hitu ué dilúvio nian halekar iha rai.

Maromak Futar Lia.

 

Salmo Responsorial                                                                                                                                           Sal. 28(29). 1ª, 2, 3ac-4, 3b, 9b-10(R. 11b)

Refrão : Na’i haraik bensa ba Nia povo iha dame!!! Repete-se

Hahí ba Na’i, oan sira Maromak nian,

Hahí Na’i nia glória no Nia kbiit;

Hahí Na’i nia naran nia glória,

Hana’i Na’i iha Nia fatin santo. Refrão

 

Na’i nia lian rona housi kalohan sia leten,

Na’i nia lian maka’as liu laloran,

Na’i nia lian bele buat hotu;

Na’i nia lian kmanek liu tomak! Refrão

 

Maromak Nia kbiit liurai maka’as liu rai tarutu;

Iha Nia templo, hotu hakilar: Glória!

Na’i hatodan-An iha ué inan boot nia leten,

Na’i hatodan-An nu’udar Liurai ba nafatin. Refrão

 

Aclamação                                                                                                                                                                                                                 Jo. 14. 23

Refrão : Aleluia. Aleluia!! Repete-se

Ema sé hadomi Ha’u, nia halo tuir Ha’u nia liafuan;

Ha’u Aman sei hadomi nia, ami sei mai hôrik iha nia.  Refrão

 

Evangelho                                                                                                                                                                                                             Mc. 8. 14-21

Na’i Jesus Cristo nia Evangelho nu’udar São Marcos haktuir:

Iha tempo nebá, escolante sira haluha tiha lori pão. Sira iha pão fuan ida de’it iha ró laran. Jesus hateten ba sira: “Matan moris neon na’in kona ba fariseu no Herodes sia nia fermento”. Sira haksesuk malu hodi dehan: “Nia dehan nune’e, tanba ita la iha pão. Maibe Jesus, hatene tiha sia nia hanoin, dehan: “Tan sá imi hanoin katak Ha’u hateten ne’e tanba pão la iha? Imi la dauk haré no compreende? Imi nia fuan la haré? Imi matan iha, maibe la haré; tilun iha, maibe la rona. Imi la hanoin hetan, uainhira Ha’u fahe pão fuan lima ba ema rihun lima, imi halibur pão rahun ta’an hira nakonu?” Sira hatan: “Sanulu resin rua”. “Uainhira Ha’u fahe pão fuan hitu ba ema rihun háat, imi halibur pão rahun ta’an hira?” Sira hatan: “Hitu!” Nune’e, Jesus dehan ba sira: “Imi seidauk hatene nafatin?”

Lia Maksoyn.

Leave a Reply

Your email address will not be published. Required fields are marked *