shadow
Diocese de Dili > NOTÍCIAS > LETURA DIÁRIA > Quarta-Feira, VI Semana Tempo Comum (ANO C)

Quarta-Feira, VI Semana Tempo Comum (ANO C)

Primeira Leitura          Gen. 8. 6-13, 20-22

Lia housi livro Génesis:

Liu tiha loron háatnulu ué dilúvio nian, Noé loke tiha ró nia dinela hodi husik sai manu metan ida. Husik sai tiha, manu metan ba mai nafatin, to’o ué maran iha rai. Tan nia la fila lalais, Noé husik sai fali manu pombo ida atu haré ué iha rai leten maran ona eh láe. Maibe, tan la hetan fatin ida atu bele tur, manu pombo ne’e fila fali ba Noé iha ró, basá, ué sei taka metin hela rai. Noé lolo nia liman, káer fali manu pombo, hodi husik iha ró laran. Noé hein tan loron hitu, hafoin, husik sai fali manu pombo husi ró. Manu pombo ne’e, loraik ona mak fila fali mai Noé, maibe, nia lori iha nia ibun, ai oliveira nia tahan nurak ida. Nune’e, Noé hatene ona katak ué maran daudaun ona iha rai leten. Nia hein tan loron hitu, hafoin, nia husik sai tan fali manu pombo, maibe, manu ne’e la fila hi’as ba Noé.

Iha loron ne’e Noé halo tinan atus neen resin ida iha nia moris; iha loron ba dala uluk fulan dala uluk nian, mak ué dilúvio maran iha rai leten. Noé hasai tiha ró nia kakuluk hafoin hateke: rai maran tiha ona.

Noé hari altar ida ba Na’i, nia hola balada no manu sala laek sira hodi hasa’e sacrificio ba Na’i iha altar fohon. Na’i haksolok teb-tebes ho Noé nia sacrificio, hodi dehan: “Ha’u sei la fó tan malisan ba rai, tan ema, basá, fuan ema nian housi kiik kedas kuda ona hahalok áat; Ha’u sei la oho tan buat hotu nebe moris, hanesan Ha’u halo daudaun ne’e. Uainhira mundo ne’e sei iha, sei kuda tóos eh natar hodi silu batar eh ko’a hare eh trigo nafatin, malirin no manas, bai-loron no rai-udan, loron no kalan sei la nahas ba nafatin”.

Maromak Futar Lia.

 

Salmo Responsorial                                                                                                                                       Sal. 115(116). 12-13, 14-15, 18-19 (R. 17ª)

Refrão : Na’i ha’u sei hasa’e ba Ita, sacrificio ida hahí nian!!! Repete-se

Oin sá ha’u sei agradece ba Na’i,

Tan buat hotu be Nia haraik mai Ha’u?

Ha’u sei foti calice maksoyn nian,

Hodi harohan ba Na’i Nia naran. Refrão

 

Ha’u sei halo tuir ha’u nia lia hakotu,

Iha povo tomak nia oin.

Iha Na’i futar oin, folin tebes duni,

Nia belun sira nia mate. Refrão

 

Iha povo nia oin, hau sei hal tuir duni,

Lia sira ha’u hakotu atu halo tuir;

Iha Na’i kadunan oin;

Iha ó nia muro nia laran, Jerusálem. Refrão

 

Aclamação                                                                                                                                                                                                                Ef. 1. 17, 18

Refrão : Aleluia. Aleluia!! Repete-se

Ita Na’i Jesus Cristo nia Aman ita laran nia matan

Atu ita bele haré esperança nebe Maromak bolu ita ba. Refrão

 

Evangelho                                                                                                                                                                                                              Mc. 8. 22-26

Na’i Jesus Cristo nia Evangelho nu’udar São Marcos haktuir:

Iha tempo neba, Jesus ho Nia escolante sira to’o iha rai Betsaida. Ema lori ba Nia ema matan delek ida. Sira husu ba Nia atu tau liman ba nia. Jesus káer ema matan delek ne’e  nia liman hodi lori nia ba liur. Hafoin tau káben ba nia matan, halolo liman ba nia hodi husu: “Ó haré buat ruma?” Nia foti matan hodi dehan: “Ha’u haré ema barak hanesan ai-hun barak, sira la’o hela”. Tuir mai, Jesus tau Nia liman  ba ema ne’e nia matan nia leten, nia hahú haré mós:  nia matan di’ak fali no bele haré momós buat hotu. Nune’e, Jesus haruka ema ne’e ba uma hodi dehan: “Ó keta tama iha knua nia laran”.

Lia Maksoyn.

Leave a Reply

Your email address will not be published. Required fields are marked *