shadow
Diocese de Dili > NOTÍCIAS > LETURA DIÁRIA > Quinta-Feira, VI Semana Tempo Comum (ANO C)

Quinta-Feira, VI Semana Tempo Comum (ANO C)

Primeira Leitura                       Gen. 9. 1-13

Lia housi livro Génesis:

Maromak haraik bensa ba Noé ho nia oan sira, hodi dehan ba sira: “Imi  hahoris oan sira no sai ua’in ba, hodi moris nakonu iha rai. Balada hot-hotu iha rai sei hamta’uk no respeita imi, nune’e mós, manu sira iha lalehan, ular sira iha rai no ikan sira iha tasi; sira hotu Ha’u saran ba imi liman nu’udar imi nia aihan; no mós ai-horis sira ho nia tahan no nia fuan sira. Maibe, imi sei  la han naan be sei moris, katak ho ran. Tan imi nia ran nebe mak imi nia moris, ha’u sei husu conta. Ha’u husu conta ba ema ida-idak kona ba nia maun-alin. Ema ruma halo karik ida seluk nia ran suli, ema sei halo nakfakar mós nia ran, basá, Maromak hakiak ema tuir Nia ílas. Imi hahoris oan sira no sai ua’in ba, atu moris namkari iha mundo no ukun nia”. Maromak lia tun ba Noé ho nia oan sira, ho liafuan hirak ne’e: “Ha’u atu halo Ha’u Nia lia Moruk ho imi, ho imi nia bei-oan sira nebe tuir imi, ho buat hotu be moris nebe hela imi leet: manu sira, balada dian sira, balada fuik sira hotu nebe moris ho imi, katak, sira hotu nebe sai housi ró hodi moris iha rai. Ha’u sei halo Ha’u Nia Moruk ho imi: ‘Hori ohin ba oin, ué dilúvio nian sei la halo maten tan criatura ida; dilúvio ida sei la halo áat ba rai’. Maromak dehan tan: “Moruk nebe Ha’u atu halo ho imi, ho balada hotu nebe moris ho imi, to’o bei-oan sira hotu nebe sei tuir mai, nia sinal mak ne’e: Ha’u sei halo mosu Ha’u Nia báur (Arco-íris) iha kalohan sira leten, hodi hatudu Moruk nebe Ha’u halo ho rai”.

Maromak Futar Lia.

 

Salmo Responsorial                                                                                                                                   Sal. 101(102). 16-18, 19-21, 29, 22-23(R. 20b)

Refrão : Housi áas Lalehan, Na’i hamatan ba rai!!! Repete-se

Na’i, nação hot-hotu sei hamta’uk Ita naran,

No liurai iha rai klaran, Ita glória.

Uainhira Na’i hafoun Sião,

Nia sei mosu ho Nia glória.

Sei simu ema kiak sira nia hamulak,

Sei la heu’uai sira harohan. Refrão

 

Ne’e hotu sei hakerek iha livro otas ikus nian,

Povo foun nebe Nia sei hakiak, sei hahí Na’i.

Basá, Na’i haré housi áas Lalehan,

No housi neba hamatan ba rai,

Atu rona ema sira iha kadeia nia halerik,

Hodi soi sira nebe atu mate iha dadur laran. Refrão

 

Ita atan sira nia oan sei hôrik iha dame,

Sira nia bei-oan sira sei hela metin iha Ita furat oin.

Sira sei hauélok Na’i Nia naran iha Sião,

Sei hahí Nia iha Jerusalém;

Uainhira povo hot-hotu halibur hamutuk

atu serbi Na’i. Refrão

 

Aclamação                                                                                                                                                                                                          Jo. 6. 63c, 68c

Refrão : Aleluia. Aleluia!! Repete-se

Na’i, Ita nia futar liafuan mak espírito no moris.

Ita mak iha liafuan moris rohan laek nian. Refrão

 

Evangelho                                                                                                                                                                                                              Mc. 8. 27-33

Na’i Jesus Cristo nia Evangelho nu’udar São Marcos haktuir:

Iha tempo neba, Jesus ho Nia escolante sira, la’o ba knua sira Cesareia de Filipe nian. Tuir dalan, Jesus husu ba Nia escolante sira: “Ema sira dehan katak Ha’u sé?” Escolante sira hatan hodi dehan: “João Baptista: balun dehan Elias, seluk dehan fali katak Ita ema duína ida”. Jesus husu fali ba sira: “Be imi dehan ha’u sé?” Pedro simu kedas hodi dehan: “Itaboot mak Messias”. Jesus bandu sira atu la bele hateten sai ba ema ida.

Tuir mai, Jesus hanourin sira katak Mane Maksoyn sei terus barak, katak, ema katuas sira, sacerdote ulun sira ho escriba sira, sei hakribi Nia, sei oho Nia. Maibé, liu loron tolu. Nia sei moris hi’as. Jesus fó hatene sai ida ne’e momós kedas ba sira. Pedro ba dook tiha uit-oan ho Jesus, hahu haksiak Jesus. Maibé, Jesus fila kotuk, haré Nia escolante sira, Nia haksiak Pedro hodi dehan: “Satanás, dook tiha housi Ha’u Nia oin, basá, ó la buka Maromak Nia hakaran, maibé, ó buka de’it ema nia hakaran”.

Lia Maksoyn.

Leave a Reply

Your email address will not be published. Required fields are marked *