shadow
Diocese de Dili > NOTÍCIAS > LETURA DIÁRIA > Sábado, VI Semana Tempo Comum (ANO C)

Sábado, VI Semana Tempo Comum (ANO C)

Primeira Leitura                       Heb. 11. 1-7

Lia housi surat ba Hebreu sira:

Maun alin sira: Fiar mak fó laran metin kona ba rahun di’ak sira nebé ita hein, hatene lolós katak buat sira nebé ita matan la haré ohin iha duni. Tan fiar mak Maromak haksolok ho ita nia bei-ala sira. Tan fiar mak ita hatene katak Maromak hakiak mundo ho Nia liafuan de’it, nune’e buat nebé iha, mai housi buat sira nebé ita la haré.

Tan fiar mak Abel hasa’e ba Maromak buat karan nebé di’ak liu fali Caim nian, no tan ne’e mak Maromak hanaran nia ema lós wainhira Maromak simu nia buat karan. Maski nia mate ona, nia sei ko’alia daudaun hodi fiar.

Tan fiar mak Maromak lori Enoc no nia la koko mate: ema la hetan ona nia, basá Maromak lori tiha nia. Ne’e tanba molok Maromak lori nia, ema dehan tiha ona katak nia monu lós ba Maromak nia laran. Maibé fiar la iha karik, ema ida la bele monu lós ba Maromak Nia laran, basá ema hot-hotu nebé hakbsik ba Nia tenki fiar katak Nia iha duni no katak Nia fó kolen ba sira nebé buka Nia.

Hodi fiar mak Noé, wainhira Maromak fó sai ba nia kona ba buat sira nebé ema seidauk haré, rona ho ta’uk santo no halo ró boot atu soi nia família. Nune’e, tanba nia fiar, Noé hatudu katak mundo sala duni, no nia sai liman-rohan na’in justiça nian nebé mai tan ba fiar.

Maromak Futar Lia.

 

Salmo Responsorial                                                                                                                                                   Sal. 144(145). 2, 3, 4-5, 10-11 (R. 1b)

Refrão : Na’i, ha’u sei hahi nafatin Itan naran!!! Repete-se

Ha’u hana’i Ita kalan loron,

Hahi nafatin Ita naran.

Maromak boot liu no so’i simu hahi,

Nia beran la nahas. Refrão

 

Otas ida haklaken ba seluk Ita liman nia hahalok,

No hotu fó sai Ita kbiit,

Hanoin nafatin Ita kmanek;

Sira halo-hodi-hanoin Ita laran-luak tebes,

Hodi hahi Ita justiça. Refrão

 

Na’i, criatura hotu hawélok Ita;

Ita emar sira hahi.

Sira haklaken Ita reino nia glória,

Hodi tatoli buat foun be Ita halo. Refrão

 

Aclamação                                                                                                                                                                                                                      Mc. 9. 6

Refrão : Aleluia, Aleluia!! Repete-se

Lalehan nakloke no rona lian housi Aman: “Ida ne’e mak

Ha’u Oan doben be Ha’u hadomi tebes, imi rona Nia bá”. Refrão

 

Evangelho                                                                                                                                                                                                                 Mc. 9. 2-13

Na’i Jesus Cristo nia Evangelho nu’udar São Marcos haktuir:

Iha tempo neba, Jesus lori Pedro, Tiago no João, mesak ba foho áas tebes ida. Nia nakfila-an iha sira oin. Nia hena sira sai nabilan, mutin teb-tebes. Ema ida iha rai ne’e la bele halo mutin liu. Hafoin, Moisés ho Elias mosu hodi ko’alia daudaun ho Jesus. Pedro hahu ko’alia hodi dehan ba Jesus: “Mestre, di’ak oinsá ita hôrik ona iha ne’e! Ita halo taka baluk tolu: Ida ba Ita, ida ba Moisés, ida seluk ba Elias”. Tebes, nia la hatene atu dehan sáida lós, tan sira ta’uk teb-tebes. Kalohan ida tun mai, taka tiha sira. Housi kalohan ne’e, rona lian ida: “Ida ne’e mak Ha’u Oan doben be Ha’u hadomi tebes; imi rona Nia ba”. Teki-tekir, hateke hale’u, sira la haré tan ema ida; Jesus mesak hamutuk ho sira.

Tun housi foho mai, Jesus dehan ba sira atu keta haktuir ba ema ida buat nebé sira haré, wainhira Mane Maksoyn la dauk moris hi’as housi mate. Ne’e duni, sira husu ba Jesus nune’e: “Tan sá escriba sira dehan katak Elias tenki mai uluk liu atu hadi’a buat hotu. Maibé, tan sá mak Escritura hateten kona ba Mane Maksoyn katak Nia sei terus maka’as hodi ema hewai Nia ho laran áat? Maibé, Ha’u dehan ba imi katak Elias mai tiha ona, no ema sira halo tiha ba nia nu’udar sira hakarak tuir lolós Escritura haktuir kona ba nia”.

Lia Maksoyn.

Leave a Reply

Your email address will not be published. Required fields are marked *