shadow
Diocese de Dili > NOTÍCIAS > LETURA DIÁRIA > Segunda – Feira, VII Semana Tempo Comum

Segunda – Feira, VII Semana Tempo Comum

Primeira Leitura                        Sir. 1. 1-10

Lia housi livro Ben Sirá

Matenek hot-hotu mai housi Na’i, hela nanis kedas ho Na’i ba nafatin. Sé mak bele sura: rai henek iha tasi, uda-wén be turu tun ida-idak, loron ida-idak housi tinan-ba-tinan? Sé mak bele suka lalehan nia áas, rai nia luan no nia kle’an? Maibé, houri uluk liu ba buat hotu, Na’i hakiak tiha ona matenek, matenek tesi lia nian iha kedas ona houri nebé mai. Wé-matan matenek nian mak Maromak housi leten áas Nia liafuan, Nia dalan mak ukunfuan rohan laek. Bá sé mak hatudu matenek nia hun no abut? Sé mak bele hatene eh siik nia hanoin be subar hela? Matenek atu hatene sasán, hatudu bas sé lós? Sé mak bele hatene buat hotu nebé fó tulun ba Matenek? Matenek Na’in iha ida de’it, nebé ema hotu sei hamta’uk tebes Nia: ida nebé tur hela iha Nia trono: mak Na’i Maromak.

Nia mak hakiak matenek. Nia, Ida nebé tau matan no fó folin ba matenek. Nia haraik matenek ba buat hotu be Nia halo, ba buat moris hot-hotu, tuir Nia laran-luak, no hato’o ba ema hotu nebé hadomi Nia.

Maromak Futar Lia.

 

Salmo Responsorial                                                                                                                                                              Sal. 92(93). 1ab, 1c-2, 5 (R. 1ª)

Refrão : Na’i mak liurai iha trono naroman nian!!! Repete-se

 

Na’i mak liurai,

Taka-An ho kbiit liurai,

Na’i kesi knotak ho beran boot. Refrão

 

Nia hari metin mundo rai-klaran,

Hametin Nia trono tinan ba tinan,

Nia iha houri uluk to’o ba nafatin. Refrão

 

Itaboot Nia sasin so’i atu fiar,

Santidade hôrik iha Ita kadunan,

Tinan ba tinan nafatin. Refrão

 

Aclamação                                                                                                                                                                                                                 2 Tm. 1. 10

Refrão : Aleluia. Aleluia!! Repete-se

Jesus Cristo, ita nia Maksoyn, halako mate;

Nia halo moris nabilan housi Evangelho. Refrão

 

Evangelho                                                                                                                                                                                                               Mc. 9. 14-29

Na’i Jesus Cristo nia Evangelho nu’udar São Marcos haktuir:

Iha tempo neba, Jesus, Pedro, Tiago no João, tun daudaun housi foho. To’o tiha iha fatin nebé escolante sira seluk hela ba, sira haré ema lubun boot hale’u hela sira, no escriba sira haksesuk malu ho sira. Wainhira sira haré Jesus, hot-hotu hakfodak halai ba simu Nia. Jesus husu ba sira: “Imi haksesuk malu kona ba sá lós?” Ema ida housi lubun ne’e, hatan ba Nia: “Mestre, ha’u lori ha’u nia oan mane ne’e mai Ita. Nia iha espírito nunuk iha laran. Wainhira espírito ne’e káer nia, nia sóe nia-an ba rai, kabén sai housi nia ibun, nia ruun nehan no isin sai tós. Ha’u husu ba Ita Nia escolante sira atu duni sai nia, maibé sira la la bele”.

Jesus lia tun ba sira dehan: “Imi, ema fiar laek; to’o wainhira mak Ha’u sei hôrik ho imi? To’o wainhira lós mak Ha’u sei tahan imi? Lori nia mai”. Sira lori labarik ba Jesus. Wainhira espírito áat haré Jesus, nia doko maka’as labarik ne’e to’o nia monu ba rai, kabén mutin sai housi nia ibun. Jesus husu ba nia aman: “Hori wainhira mak buat ne’e mosu ba nia?” Nia aman hatan: “Hori kiik kedas. Dala barak espírito áat ne’e sóe nia ba ahi no ba wé laran atu halo áat nia. Maibé, Ita bele karik halo buat ruma, hanoin ami no tulun ami”. Jesus hatan ba nia: “Ita bele karik?!.. Buat hotu bele de’it ba ema nebé fiar”. Tuir mai, labarik nia aman hahu hateten ho lian maka’as: “Ha’u fiar duni! Tulun ha’u nia fiar kiik ne’e”. Wainhira Jesus haré ema barak nebé hakbesik Nia, Nia siak espírito áat: “Espírito nunuk no diuk, Ha’u haruka ó sai housi nia, keta fila fali tan ba nia”. Espírito áat doko fali labarik ne’e, hakilar maka’as hodi husik nia. Labarik monu ba rai hanesan mate ida. Nune’e, ema barak dehan katak nia mate ona. Maibé, Jesus káer nia liman no halo nia hamriik, to’o nia bele hamriik mesa-mesak. Wainhira Jesus tama ona iha uma laran, escolante sira husu ba Nia: “Tan sá ami la bele duni sai nia?” Jesus hatan ba sira: “Espírito hanesan ne’e, ema bele duni sai hodi de’it hamulak”.

Lia Maksoyn.

Leave a Reply

Your email address will not be published. Required fields are marked *