shadow
Diocese de Dili > NOTÍCIAS > LETURA DIÁRIA > Terça – Feira, VII Semana Tempo Comum

Terça – Feira, VII Semana Tempo Comum

Primeira Leitura                        Sir. 2. 1-13

Lia housi Livro Ben Sirá 

Ha’u oan: Ó hakarak karik serbí Na’i, hadi’a ó nia klamarn atu simu knaar. Ó sei buka moris ho laran mos, no laran metin nafatin; keta monu ba laran susar iha tempo áat. Kaer metin Na’i, keta hadook-an housi Nia atu iha loron ikus ó bele hetan Nia glória. Buat hotu nebe mosu ba ó, ó seu buka atu simu, ho haraik-an tomak no paciência. Basa, hosi áhi mak koko osa mean, no sira nebe monu iha Na’i nia laran hodi dalan haraik-an nian. Laran metin iha Na’i, basá Nia sei tulun ó; ó la’o tuir dalan lós hodi hein Nia. Imi hotu nebe hamta’uk Na’i, imi hein Nia laran- luak ba, keta hadok-an atu imi keta monu. Imi sira be hamta’uk Na’i, imi sei hein ksolok rohan laek no Na’i Nia laran luak. Imi hateke didiak otas uluk hodi haré didiak ba: Ema se mak tau laran metin iha Na’i, hafoin, senti fali móe? Ema se mak hamta’uk Na’i, hafoin, Na’i husik nia hela mesak? Ema se mka harohan ba Na’i, maibe Na’i hewai nia? Na’i laran maus no domin na’in, perdua salan sira no soi ema iha tempo susar.

Maromak Futar Lia.

 

Salmo responsorial                                                                                                                                 Sal. 36(37). 3-4, 18-19, 27-28, 39-40 (R. cf. 5)

Refrão : Saran ó nia dalan ba Na’i no nia sei soi ó!!! Repete-se

 

Laran metin iha Na’i, hodi halo buat di’ak,

Ó sei hôrik hakmatek iha rai.

Saran ó nia ksolok ba Na’i,

Nia sei haraik ba ó, buat nebe ó fuan husu. Refrão

 

Na’i hamatan ba ema di’ak sira nia moris,

Ninia kmanek sei sai ua’in loron ba loron;

Sira sei la hamóe-an iha tempo susar,

No iha tempo hamlaha, sira sei bosu. Refrão

 

Hado’ok-an housi áat hodi halo buat di’ak,

Ó sei hetan nafatin uma atu hôrik ba;

Basá, Na’i hadomi justiça,

Sei la husik hela nia belun sira. Refrão

 

Na’i soi ema sira laran lós;

Nia, sira nia mahein iha tempo susar;

Tulu sira no tahan sira,

Basá, Nia, sira nia tulun. Refrão

 

Aclamação                                                                                                                                                                                                                   Gal. 6. 14

Refrão : Aleluia. Aleluia!! Repete-se

Ha’u gaba-an de’it iha Na’i Jesus Cristo nia Cruz.

Housi Na’i nia cruz, mundo mate ona mai ha’u, no ha’u mate ona ba mundo. Refrão

 

Evangelho                                                                                                                                                                                                              Mc. 9. 30-37

Na’i Jesus Cristo nia Evangelho tuir São Marcos:

Iha tempo neba, Jesus ho nia escolante sira hákat liu ba Galileia sorin. Nia lakohi atu ema ruma hatene, basá, Nia hakarak hanourin Nia escolante sira. Nia lia tun ba sira, dehan: “Ema sei saran mane maksoin ba ema áat sira liman. Ema áat sira sei oho Nia, maibe, Nia mate tiha, liu loron tolu, sei moris hi’as”. Jesus nia escolante sira la hatene lia hirak ne’e katak s’a, maibe, sira ta’uk hela atu husu Nia. To’o tiha iha Cafarnaum, tama iha uma laran, Jesus husu ba sira: “Imi haksesuk malu kona ba saida iha dalan?” Maibe, sira nonok hela, basá, sira haksesuk malu kona sira ida nebe mak boot liu. Nune’e, Jesus tur tiha, bolusira na’in sanulu resin rua hodi dehan ba sira: “ se hakarak boot liu sira seluk, sei sai ikus liu hotu, sei sai hot-hotu nia atan”. Jesus kaer tiha labarik oan ida, tau tiha nia iha sira nia klaran, hako’ak tiha nia hodi dehan ba sira: “Ema nebe simu labarik oan ida hanesan ida ne’e hodi Ha’u Nia naran, nia simu Ha’u-An rasik. Ema nebe simu Ha’u, nia la simu Ha’u, maibe, simu ida nebe haruka Ha’u mai”.

Lia Maksoyn.

Leave a Reply

Your email address will not be published. Required fields are marked *