shadow
Diocese de Dili > NOTÍCIAS > LETURA DIÁRIA > Quarta – Feira, VII Semana Tempo Comum

Quarta – Feira, VII Semana Tempo Comum

Primeira Leitura                    Sir. 4. 12-22

Lia housi livro Ben sirá:

Ha’u oan: matenek hakiak nia oan sira, hodi tau matan ba sira nebé buka nia. Ema nebé hadomi nia, nia hadomi moris, no sira nebé buka nia houri loron-matan mosu, sei hetan ksolok. Ema ida nebé manán matenek, nia sei simu glória nu’udar liman rohan: naran fatin ida nebé nia ba, nia iha Na’i nia bensa. Sira nebé serbí nia, sira adora Maromak Santo, no sira nebé hadomi nia, Na’i hadomi sira. Ema nebé rona nia, nia sei tesi lia ba nação hot-hotu, no ema nebé fila oin ba nia, nia sei hôrik metin; ema saran an karik ba nia, sei simu nia nu’udar liman rohan, nia bei-oan sira sei hetan nia. Uluknana’in matenek sei la’o hamutuk ho nia iha dalan terus nian hodi hamosu iha nia buat nebé halo nia táuk no hakfodak, hanourin nia ho nia disciplina to’o nia bele tau laran metin iha nia, hodi koko nia ho ukun oi-oin. Maibé, sei fila mai hasouru nia no hakonu nia ho ksolok, no sei hatudu ba nia buat hotu nebé subar hela iha nia hanoin. Maibé, nia la’o sees karik housi nia, nia sei husik nia no saran nia ba rahun áat.

Maromak Futar Lia.

 

Salmo Responsorial                                                                                                                        Sal. 118(119). 165, 168, 171, 172, 174, 175 (R. 165ª)

Refrão : Moris iha hakmatek tebes, Na’i, sira be hadomi Ita lei!!! Repete-se

 

Moris iha hakmatek tebes, sira be hadomi Ita lei,

Sira sei la hetan susar.

Na’i, ha’u halo tuir Ita ukunfuan no ordem,

Ha’u nia moris tomak iha hela Ita futar oin. Refrão

 

Ha’u ibun hananu knananuk hahi nian,

Tan Ita hanourin Ita lei mai ha’u.

Ha’u nanal haklaken Ita futar liafuan,

Tan Ita ukunfuan sira lós tebes. Refrão

 

Na’i, ha’u moris tan Ita Nia tulun,

No Ita lei sai ha’u nia ksolok.

Ha’u klamar moris atu hahi Ita,

No Ita Nia tesi lia mai tulun ha’u. Refrão

 

Aclamação                                                                                                                                                                                                                     Jo. 14. 6

Refrão : Aleluia. Aleluia!! Repete-se

Ha’u mak dalan, lialós no moris hun, Na’i lia tun dehan;

Ema ida la liu karik housi Ha’u, nia la bele ba Aman Maromak. Refrão

 

Evangelho                                                                                                                                                                                                              Mc. 9. 38-40

Na’i Jesus Cristo nia Evangelho nu’udar São Marcos haktuir:

Iha tempo neba, sira na’in sanulu resin rua ne’e ida, naran João, dehan ba Jesus: “Mestre, ami haré ema ida duni sai diábo hodi Ita naran. Nia la la’o ho ita. Tan ne’e, ami bandu tiha nia”. Jesus lia tun ba sira dehan: “Imi keta halo nune’e; basá, ema ida la bele hodi Ha’u Nia naran halo milagre, hafoin, hateten áat kona mai Ha’u. Ema nebé la hasouru ita, nia ita nian”.

Lia Maksoyn.

Leave a Reply

Your email address will not be published. Required fields are marked *