shadow
Diocese de Dili > NOTÍCIAS > LETURA DIÁRIA > Sexta – Feira, VII Semana Tempo Comum

Sexta – Feira, VII Semana Tempo Comum

Primeira Leitura                      Sir. 6. 5-17

Lia housi Livro Ben Sirá:

Liafuan di’ak no midar dada belun barak; atu ko’alia di’ak, sei buka ko’alia ba ema hotu ho respeito. Buka atu ema barak haksolok ho ó, maibé, iha ema rihun ida nia leet, ó sei fihir ida atu sai ó nia conselheiro. Ó hakarak karik hetan belun ida, ó sei koko uluk nia, maibé, ó keta tau kedas ó neon ba nia. Basá, ema balun hakarak halo belun ho ó wainhira nia hetan di’ak housi ó. Maibé, wainhira ó hetan karik susar, nia sei halai housi ó. Iha ema nebé halo belun ho ó, hafoin, sai áat fali ho ó, fó sai ó nia hahalok hodi halo áat ó nia moris. Iha ema balun nebé halo belun ho ó atu ó simu nia iha ó nia mesa, maibé, nia sóe hela ó wainhira ó hetan susar. Wainhira ó hetan di’ak, nia di’ak ho ó, ko’alia di’ak ho ema hotu housi ó nia família; iha lia ruma nebé hodi ema hatun ó karik, nia hasouru ó hodi halai dook housi ó. Ó sei buka hadook-an housi ema sira nebé halo áat hasouru ó, no neon moris ba ó belun sira. Belun ida di’ak, hanesan uma ida be harí metin; ema be hetan belun ida di’ak, nia hetan riku-soi ida boot tebes. Belun di’ak iha folin iha folin boot, la bele sukat nia folin. Belun diak ida hanesan ai-moruk moris nian: ema sira nebé hamta’uk Na’i, sei hetan sira. Ema nebé hamta’uk Na’i hili belun di’ak, basá, nia ne’e oinsá, nune’e mós nia belun nebé nia iha.

Maromak Futar Lia.

 

Salmo Responsorial                                                                                                                                      Sal. 118(119). 12, 16, 18, 27, 34, 35 (R. 35ª)

Refrão : Na’i lori ha’u tuir dala Ita ukunfuan nian!!! Repete-se

 

Rahun di’ak ba N a’i,

Hanourin Ita ukunfuan mai ha’u.

Ha’u sei haksolok iha Ita ukunfuan,

Ha’u sei la haluha Ita liafuan. Refrão

 

Loke ba ha’u matan

Atu haré Ita lei nia kmanek.

Halo ha’u hatene dalan Ita ukunfuan nian,

Atu hanoin Ita hahalok kmanek sira. Refrão

 

Haraik mai ha’u matenek atu tau matan ba Ita lei,

No moris tuir ho laran tomak.

Na’i, lori ha’u tuir Ita ukunfuan,

Tanba sira sai ha’u nia ksolok boot. Refrão

 

Aclamação                                                                                                                                                                                                               Jo. 17. 17b,a

Refrão : Aleluia. Aleluia!! Repete-se

Ita liafuan, Na’i, mak lialós tebes;

Hametin ami iha lialós. Refrão

 

Evangelho                                                                                                                                                                                                                Mc. 10. 1-12

Na’i Jesus Cristo nia Evangelho nu’udar São Marcos haktuir:

Iha tempo neba, Jesus ba rai Judeia hodi hakat liu ba Jordão sorin ba. Ema lubun boot halibur malu iha Jesus nia oin; Nia hanesan bai-bain, hahu hanourin sira. Fariseu balun hakbesik ba Jesus hodi hasa’e lia ba Nia, dehan: “Mane rum abele sóe nia féen?” Sira husu atu koko de’it Jesus. Jesus simu hodi dehan ba sira: “Moisés haruka imi atu halo oinsá?” Sira hatan: “Moisés haruka fó surat sóe malu nian atu haketak tiha malu”. Jesus simu hodi dehan ba sira: “Tan imi nia laran tós, mak Moisés fó ukunfuan ida ne’e. Maibé houri hahu, Maromak halo ema, mane ho feto. Tan ne’e, mane sei husik aman ho inan, atu bele hôrik hamutuk ho nia féen. Sira rua sei sai ema isin ida de’it. Nune’e, sira la’os ema na’in rua ona, maibé, ema isin ida de’it. Nune’e, buat nebé Maromak libur hamutuk, ema ida la bele haketak”. To’o tiha uma, Jesus nia escolante sira husu hikas kona ba liafuan hirak ne’e, Jesus lia tun ba sira, dehan: “Ema nebé sóe nia féen hodi hola fali feto seluk, sala adultério hasouru feto uluk. Feto kabe-na’in nebé sóe nia la’en, hodi moris hamutuk ho mane seluk, halo sala adultério”.

Lia Maksoyn.

Leave a Reply

Your email address will not be published. Required fields are marked *