shadow
Diocese de Dili > NOTÍCIAS > LETURA DIÁRIA > Sábado, VII Semana Tempo Comum

Sábado, VII Semana Tempo Comum

Primeira Leitura                      Sir. 17. 1-13

Lia housi livro Ben Sirá:

Ha’u oan: Na’i hakiak ema housi rai, no halo nia fila hikas ba rai. Na’i haraik tempo ida no loron ruma ba ema sira, hodi haraik mós kbiit ba sira atu ukun buat hotu iha rai. Haraik mós Ninia kbiit ba sira no Na’i halo sira nu’udar Nia ílas rasik. Criatura tomak hamta’uk sira; sira ukun balada hot-hotu no mós manu sira nebé semo iha áas. Maromak haraik ba sira hanoin lós nian, nanal, matan no tilun sira, no fuan atu hadomi. Hakonu sira ho matenek no ulun mamar, no haraik ba sira atu hatene buat di’ak no buat áat. Na’i tau Nia naroman iha sira fuan, atu hatudu Na’i nia beran no hahalok. Sira sei hahi Nia naran santo, no Nia hahalok tomak. Haraik tan matenek ba sira, fó tan ba sira nu’udar liman-rohan lei moris nian. Na’i halo Nia moruk rohan laek ho sira hodi haraik ba sira Nia ukunfuan. Sira matan haré Maromak Nia kmanek wa’in, sira tilun rona Nia lian. Na’i lia tun ba sira, dehan: “Imi hadook-an housi hahalok áat” no fó mós ba sira ida-idak knaar kona ba sira nia maun-alin. Na’i sei haré nafatin ema sira nia hahalok tomak, hahalok sira ne’e sei la haksumik housi Na’i futar matan.

Maromak Futar Lia.

 

Salmo Responsorial                                                                                                                             Sal. 102(103). 13,  14, 15-16, 17ab-18a (R. Cf. 17)

Refrão : Na’i hadomi nafatin sira be hamta’uk Nia!!! Repete-se

 

Hanesan aman ida hadomi nia oan sira,

Nune’e mós Na’i hadomi sira be hamta’uk  Nia.

Nia hatene katak ita mai housi nebé,

La haluha katak ita rai-rahun. Refrão

 

Ema nia loron hanesan du’ut,

Hafunan hanesan ai-funan iha rai luan;

Wainhira ánin huu iha nia, sei sai lakon,

Sei la hetan tan nia fatin iha neba. Refrão

 

Na’i Nia laran-luak la nahas,

Ba sira be hamta’uk Nia;

Ba sira be moris tuir Nia moruk

Sira hotu nebé moris tuir Nia ukunfuan. Refrão

 

Aclamação                                                                                                                                                                                                                  Mt. 11.  25

Refrão : Aleluia. Aleluia!! Repete-se

Rahun di’ak ba Ita, Aman, Na’i lalehan no rai nian, tan

Ita hatudu mistério reino lalehan nian ba kiik sira. Refrão

 

Evangelho                                                                                                                                                                                                             Mc. 10. 13-16

Na’i Jesus Cristo nia Evangelho nu’udar São Marcos haktuir:

Iha tempo neba, ema lori labarik oan sira mai hakbesik Jesus atu Nia bele kona sira. Maibé, Jesus nia escolante sira haksiak ema sira ne’e. Haré ida ne’e, Jesus hirus hodi hateten ba sira: “Imi husik labarik sira ne’e mai besik Ha’u. Keta tahan netik sira, basá, Maromak Nia reino ba hanesan sira. Tebes, Ha’u dehan ba imi: Ema nebé la simu Maromak Nia reino hanesan labarik oan ida, nia sei la tama iha reino Maromak nian”. Hafoin, Jesus simu labarik oan sira, hodi haraik bensa ba sira.

Lia Maksoyn.

Leave a Reply

Your email address will not be published. Required fields are marked *