shadow
Diocese de Dili > NOTÍCIAS > OPINIÃO > SAI JOVEN MISSIONÁRIO IHA TEMPO ATUAL

SAI JOVEN MISSIONÁRIO IHA TEMPO ATUAL

(Perspetiva Jornalistica Ba Ano Missionário Juvenil Iha Creda Timor Leste)

Husi : Marta do Rosário Afoan.  Lcs.

 

               Concílio Vaticano II iha ninia documento sira ko’alia mós kona ba Atividade Missionário Creda Católica nian iha missão haklaken evangelho ho lian Latina hanaran “Ad Gentes” katak “Ba ema-rai hotu. Documento ne’e fó sai nu’udar comitmento ida husi igreja católica hodi lori Evangelho ba ema hotu. Hahalok ida ne’e sai nu’udar missão fundamental  creda nian ida no  mós reafirmação hahalok evangelização no caridade nian ba sira nebe ladauk hetan Cristo iha sira nia moris. Iha contexto ita nia creda no rai Timor nian ita bele dehan alvo evangelização mak jovem sira basá jovem sira mak sai modelo ba  futuru nação no futuru uma creda nian.  Ne’e sai tuir buat nebe amo Papa são João Paulo II  wainhira mai visita Timor Leste (Dili-Tasi tolu) iha tinan 1989 nebe dehan jovem mak masin no naroman mundo nian. Haré ba realidade jovem ohin loron nian diferente teb-tebes ho jovem tempo uluk nian. Jovem uluk nian fó sira nia  vida tomak  ba mehi ida áas iha sira nia rai no igreja, maibe jovem ohin loron nian ladun interese ba vida ida mak sira monu lalais liu ba lasu mundo globalização nian hodi hatama an ba iha vida moderno wainhira sira rasik seidauk pronto hasoru moris nune’e. Ida ne’e  halo sira sai baruk ten liu tan hodi la preocupa ba buat nebe folin ba sira, preocupa liu fali ba buat nebe mak laiha folin. Por ezemplo; wainhira jovem feto ka mane ida quando kaer ona telefone iha liman, nia sei la halo atividade seluk tanba nia sei focus ba de’it telefone nebe iha nia liman no pior liu tan wainhira sira ba missa iha igreja laran mós barani buti nafatin telelfone.  Jovem sira precisa moris tuir Papa João Paulo II ninia afirmação iha leten ne’e.  Atu bele nati tuir ida ne’e dalan mak  moris tuir Evangelho no haklaken Evangelho ne’e. Ho de’it nune’e mak jovem bele sai masin no naroman ba mundo hodi fo folin ba nia moris. Sua santidade Papa Francisco  convida ita atu halo ida ne’e hamutuk. Nune’e nia dehan “Juntamente com os jovens, levemos o Evangelho a todos” katak hamutuk ho jovem sira ita lori Evangelho ba ema hotu.

               Nune’e diocese Dili mós iha hanoin no fó importáncia boot ba jovem sira hodi hili tema pastoral diocese Dili nian ba tinan ida ne’e mak “Joventude Missionário”. Tema ne’e conserteza sei salva jovem sira no dada fila fali jovem sira nebe hamout an iha hela nakukun  laran atu bele participa iha atividade evangelização nian nebe sei fo folin ba sira nia moris no halo sira descobre lolós moris ne’e nia folin, liu-liu moris nu’udar jovem católico ida hodi  bele mós sai fali  apóstolo ba jovem seluk..  Nune’e  nu’udar jovem ou foinsa’e temque  haka’as-an buka atu hatene hili buat nebe mak di’ak no lós ba ita nia moris ka ita nia futuru selae ema nia liafuan nebe dehan hili lós salva moris no hili sala hela de’it naran ne’e bele sai tuir fali.

               Pessoalmente ha’u hanoin tema ida ne’e interesante teb-tebes tanba  wainhira ita implementa ona sei lori ita jovem barak envolve an iha atividade igreja nian hodi sai hanesan jovem missionário. Jovem missionário ninia kna’ar lolós mak sai hanesan evangelizador/a hodi haklaken Maromak Nia liafuan sira ba ema seluk  liu husi fahe esperiencia kona ba fiar iha  Evangelho nian liu husi animação oi-oin hodi bele fó ksolok ba ema seluk.  Matenek na’in Wellaine Queiroz mos fó ninia hanoin kona ba jovem missionário  hodi dehan katak sai  jovem missionário ne’e sempre iha hanoin atu haklaken kona ba Jesus Cristo iha qualque fatin sira nebe ema hela dook, ho contente no esprança atu motiva nafatin ema seluk nebe laiha  sentidu atu moris, hatudu naroman lialós nian ne’e mak Jesus rasik.

               Participação jovem missionário iha tempo atual ita haré máximo teb-tebes tanba maioria jovem barak mak envolve an iha atividade igreja nian, hanesan foin daudaun ita haré ba realidade nebe fó sai iha média social sira kona ba participação  Jovem Missionário nian ita haré furak tanba  jovem sira sempre participa ho contente, ho haksolok, liu husi reza, hananu, no consola ema seluk nebe sente triste, sai evangelizador/a ba ema seluk, convida ema seluk atu ativa nafatin iha igreja. Liga mós ba realidade ne’e iha fulan hirak liu ba  igreja católica liu husi atividade Obra Pontifícia da Infância e Alolescência Missionária (OPIAM) nian halo mós socialização  hamutuk ho jovem sira hodi  realiza atividade  missionário nian iha municipio Covalima. Ida ne’e facto nebe hatudu katak atividade Jovem Missionário nian começa buras ona liu husi ita nia kiik oan sira nebe la’o hamutuk ho madre-padre sira  hodi la’o ba fatin-fatin visita ita nia maluk sira seluk no mós fahe esperiencia fiar kona ba Maromak Nia liafuan di’ak ba comunidade sira nebe mak la hakbesik an ba ita nia hun ka ita nia abut rasik mak Na’i Maromak.

Referencia:

Leave a Reply

Your email address will not be published. Required fields are marked *