shadow
Diocese de Dili > NOTÍCIAS > HOMILIA DO BISPO > DOMIN BA MAROMAK-DOMIN BA MALUK SIRA

DOMIN BA MAROMAK-DOMIN BA MALUK SIRA

VII DOMINGGO DO TEMPO COMUM

 

Iha ema santo ida ninia liafuan nebe dehan; sarani diak ida atu hadomi ó nia belun, atu hadomi ema nebe hadomi ó, atu halo diak ba ema nebe halo diak ba ó ida nee ita dehan katak baibain tiha ona, maibe hadomi ema nebe halo at ba ó ida nee so sarani ida mak bele halo. Ida nee maluk doben sira los duni ita bele dehan katak ida nee mak sumário, Síntese ida kona ba Evangelho tomak Jesus nia hanourin habadak ho liafuan nebe ohin ita dehan; Domin ba Maromak domin ba Maluk sira. Dala ruma ita husu ba ita nia an; hadomi ema nebe halo at ba ita nee possível! Bele ka lae! Domin ida nee ita bele dehan katak ohin loron ita bele hare iha ita nia sociadade, iha ita nia família, iha ita nia comunidade kalae!

Hadomi ita nia inimigo sira. Hadomi ema nebe halo aat ba ita mai ita sarani nee dehan ida nee laos convite, maibe mai ita sarani nee exigência ida, órdem ida nebe fundamental no primária ba ita sarani tanba ida nee Jesus nia hanourin. Jesus mos hanesan ita hotu hatene katak Nia hanourin hanesan iha cruz nebe ita hotu hare. Iha cruz mak Nia hanourin mai ita atu hatene perdua, iha cruz mak Nia hanourin mai ita atu hadomi ita nia funu balun. Laos Nia hanourin tiha hotu ona, maibe Depois Nia hanourin iha ema lubuk ida hanesan São Estévão molok atu mate nia reza atu Maromak atu perdua ema nebe halo at ba nia.

Ida nee mak hanoin São Paulo hare kona ba ida nee nia dehan; Wainhira koalia kona ba ida nee ita ema laiha liafuan atu koalia, maibe São Paulo dehan; cruz mak halo ema hakfodak, cruz mak kbiit Maromak ninian. Los duni cruz ida nee mak fo força mai ita.

Hadomi ó nia inimigo significa ba hasoru ida seluk ho sentido gratidão, maske sira nebe contra ita, hakarak buat diak husi sira seluk maske nia hakarak halo at mai ita, halo diak tau matan ba ema seluk hanesan ita an rasik. Jesus rasik hanourin ida nee mai ita. Comportamento ida nee Jesus husik hela mai ita regra ida nebe ohin loron sira dehan; “regra de ouro”. Regra de Ouro (regra osan mean) mak saida mak ó hakarak ema halo ba ó nunee mos ó tem que halo ba ema seluk. Iha mestre boot ida nebe mai uluk Jesus naran rabilel nia dehan; “buat nebe ó lakohi ema halo ba ó nune mos ó labele halo ba nia” se ó lakohi karik ema atu tolok ó labele tolok uluk ema, se hau lakohi ema atu trata hau iha público hau mos labele trata ema iha público. Ita loron hirak nee vocabulário ida nebe dehan an6onimo nee começa mosu makas fila fali ona. Dala barak ita rona dehan katak iha ema ida ema hana ita dehan ema desconhecido ida mak hana, iha ema ruma mate soe hela ita dehan ema desconhecido ida mak oho. Nee dehan katak dala barak ita hanoin ita bele halo buat ruma hanesan halo ba ema nebe ita la contente ita la gosta depois ita subar, hanoin fila fali hahalok ida nee ita hakmatek kalae? Los duni iha polícia nia oin, iha Lei nia oin ita subar ona, maibe ita lori iha ita nia laran nee ita nia conciência la hakmatek. Hanoin fali história Kaín ho Abel ninian saida mak acontece? Kaín hare ba nia alin Abel nebe Maromak simu deit mak nia oferta tanba abel nee hasae ba Maromak buat nebe diak, buat nebe perfeito no murak. Tanba nee Maromak nia matan monu ba Abel nia oferta. Maibe Kaín fali hasae oferta ba Maromak hahan nebe ladun diak ba Maromak hanesan animal karik hanesan animal krekas sira. Tanba nee Maromak la simu ninia sacrifício. Então saida mak mosu! Laran moras. Laran moras ida nee ikus mai obriga Kain atu oho nia alin Abel. Hafoin nia oho tiha nia alin nia hanoin katak nia hakmatek ona, maibe oho tiha hodi halo nia conciência la hakmatek hanesan buat ida duni tuir nia. Hafoin nia rona lian ida husi leten dehan; Kain ó halo saida ba ó nia alin too o nia alin nia ran sulin halai tuir ó!

Tan nee mak wainhira ita koalia kona ba desconhecido dala barak ita hanoin katak ita tuda tiha ema, ita halo at tiha ema, ita naok tiha ema nia sasan, too ikus ita hanaran ema desconhecido. Los duni ema la obriga o atu ba hatan, maibe ó sei la livre. Ó sei lori nafatin buat ida nee iha ó nia conciência sei la hakmatek.

Tan ida nee mak ohin Jesus mos convida ita atu hare fila fali ida nee; Hadomi sem reprocidade, laos hau halo buat diak hau hein nia sei halo fila fali mai hau, hau halo buat ruma hau mos hein ninia vantâgem. Ohin loron ita moris iha sociadade ida nebe ita atu halo buat ida ita tem que ser ita nia interesse nee iha. Interesse laiha ita lakohi atu lakon, maibe ita sarani iha dominggo VII dominggo tempo bai-bain nian nee Jesus convida ita atu reflete ituan kona ba ida nee; halo buat ruma nebe diak laos atu simu kedas tanba ohin ita mos rona ukunfuan ida nee nian, promessa saida mak Jesus promete ba sira atu halo tuir imi sei simu reconpensa boot. Ida nee mak ba ita Lalehan.

Wainhira ita koko hakasan atu halo diak aban bain rua ita bele simu. Moris ida nee mak ohin ita mos rona iha leitura sira nebe koalia kona ba Maromak hanourin sira atu sai santo. Sai Santo basá Maromak nee santo. Profeta sira dehan; sai laran luak hanesan Aman nebe laran luak.

Ohin convida mos ita atu sai perfeito. Ida nee mak diferência nebe ita sarani sira tem que halo. Ita sarani tem que iha corâgem atu halo buat nebe único Hadomi ema nebe halo at, fo ba buat o nia interesse hanesan ohin ita rona; Keta julga atu ema mos la julga ó, keta condena atu ema lacondena ó basa laiha ema ida nebe bele hola fali Maromak nia fatin atu tesi lia ba ó nia hahalok.

Leitura sora ohin nia apresenta mai ita exemplo concreto; primeira Leitura haktuir mai ita kona ba história David ho Saul. Nee atu hatudu mai ita katak Saul nee Maromak consagra sai nudar liurai, maibe David mos Maromak hili nia wainhira Saul hare David nia presença Saul hare hanesan ameaça boot ida ba nia. Tanba nee Saul hahu plano at ona atu oho tiha David, maibe David jovem ida nebe matenek hodi hamtauk Maromak Saul la brani foti liman hasoru ema nebe Maromak consagra tiha ona.

Iha segunda Leitura São Paulo dehan; ita ema nee laos deit ema isin ninian hanesan Adão uluk, maibe ita ema nia isin nee atu ita labele trata, ita labele halo aat ba hau nia isin no ema seluk nia isin, tanba isin nee hasanto ho graça Maromak ninian tanba ita ema espiritual ho Maromak nia bênção batismo ita simu halo ita nia isin nee sai sagrado atu ita ida-idak hatene respeita nafatin no hadomi ita nia isin tanba ita nia isin templo Maromak ninian imagem Maromak ninian.

Iha VII Dominggo tempo ordinário sadik ita sarani liu-liu Paróquia Aileu ninian nebe ohin marca história foun hodi tomada de posse Pároco foun ninian bele sai mos historia foun ida nee, atu ita hotu husi kiik too boot, ferik e katuas, ita nebe estuda barak ou la estuda barak maibe ita koko tok atu hatudu no halo diferência ida nee iha ita nia moris. Ita sarani tem que ser halo diferência laos ho ita nia hatais, loas ho buat nebe ita lori, maibe ita nia hahalok. Diferência ida nee mak Jesus hakarak mos convida ita atu hatudu.

 

Aileu,24/02/2019

Leave a Reply

Your email address will not be published. Required fields are marked *