shadow
Diocese de Dili > NOTÍCIAS > HOMILIA DO BISPO > AIFUAN DIAK MAI HUSI AIHUN NEBE DIAK

AIFUAN DIAK MAI HUSI AIHUN NEBE DIAK

VIII DOMINGGO DO TEMPO COMUM

 

Ita nia Evangelho ohin furak, capas, se ita boot sira rona didiak la precisa halo esplicação, maibe precisa atu hanoin, nebe dehan; “Aifuan diak mai husi Ai hun nebe diak”. Comparação aihun diak no ai hun aat se ita boot sira rona didiak reflexão ohin ninian hahu husi Leitura dahuluk mai too Evangelho inclui Salmo Responsorial koalia deit kona ba Ai-hun no Ai-Fuan. Iha Bíblia mos ita sei hanoin iha nebe hahu ho Ai-hun moris nian nebe moris nunee mos Ai-hun mate nian. Se ita hanoin livro Génesis nebe haktuir kona ba história Adão ho Eva ninian kona ba sira monu ba sala Nai Maromak bolu Adão no dehan ba nia; ó bele han husi ai-fuan hotu iha toos, maibe husi ai-hun nee halo ema hatene diak no aat labele han! Basá iha loron nebe ó han aifuan ó sei mate”. Los duni iha ita ema nia fuan mak ita bele dehan transformação bele mosu, iha ema nia fuan mak bele hatene buat nebe diak no buat nebe aat. Tanba ida nee mak ai-hun mate ninian. Iha Evangelho Jesus koko liga ituan buat nee atu ita ema bele compreende katak so ida nebe iha fuan diak nia mak ai-hun diak duni, nia mak sei fo fuan sira nebe diak. Mensagem nebe ita hare no buat nebe Jesus hakarak sira nebe rona atu tau iha neon mak ida nee; tranparência e honestidade entre fiar nebe ita mai celenra iha Dominggo no ita nia moris iha liur/ita nia Uma/fatin sira nebe ita servisu. Fiar nebe ita haklaken iha Uma Creda no mos nia prática oinsa iha tranparência no honestidade ho buat nebe fiar ninian no buat nebe prática ninian. Tan nee Jesus exige duni no hakarak tebes atu fo atenção liu ba buat nebe laran nian (vida Interior) ho Maromak. Tan nee hakasan atu sai husi tendência buaka deit buat nebe liur nian.

Dala barak ho buat hotu nebe acontece hodi halo ita gosta liu buat nebe liur ninian (vida exterior). Tan nee mak ita rona iha Evangelho liuliu Jesus ataca ituan atitude Fariseu ninian nebe ohin haktuir mai ita aiknanoik oin tolu; ida uluk matan delek ida labele loke fali matan delek seluk, daruak nian; tanba sa mak hare du’ut musan iha ema hotu nia matan, maibe o la hare aibaluk boot iha o nia matan rasik, datoluk ninian; Ai-hun atu diak eh a’at ema hare husi nia fuan. Ema nebe diak hasai buat diak hirak nebe halot iha nia laran no ema nebe a’at hasai buat a’at iha nebe halot hela iha nia laran. Aiknanoik tolu nee, Jesus hakarak atu corige uluk nanain fariseu. Matan delek ho matan delek certamente ita hatene sei la lori malu ba dalan los, mata delek ho matan delek sei ba remata iha nakukun ninian. Ba sira Jesus ohin bolu usa liafuan nebe ohin ita rona iha Evangelho dehan; laran makerek (hipócrita) hafoin nia fila ba nia escolante sira nia halo mos exlamação ida nebe hanesan; Nia mos direge mos buat ida nee ba escolante sira.

Ohin Jesus mos koalia mai ita ida-idak liafuan laran makerek, liafuan hipócrita nebe ita rona iha Bíblia atu ita doko ulun deit maibe ida nee bele sai hanesan matéria ida ba ita ida-idak nia reflexão. Karik laos atu ita halo auto defesa, maibe husi Maromak nia liafuan penetra iha ita nia fuan iha ita nia moris, husik Nia Liafuan Eco iha ita nia tilun. Tansa ó hare du’ut musan iha o nia maluk nia matan no ó lar\ hare aibaluk iha ó nia matan rasik.

Maluk doben sira, convite ida mai ita ida-idak atu halo exame de conciência kona ba ita nia an no husik Jesus nia Liafuan ba sai sasukat no orienta ita nia fuan no ita nia moris wainhira ita halo duni conselho atu admite no simu karik hau mos bele tama iha categoria ida nee. Se ita ohin rona didiak Livro Ben Sirá nian propõe mos dalan ida oinsa mak ita bele halo buat ida nee. Iha Primeira Leitura São Paulo dehan hare Exortação ida próprio ita bele dehan auto crítica ida nebe usa peneira. Nee duni Livro Ben Sirá nee usa duni imagem ou símbolo ida nee mos ba ita. Hanesan mos ba ita nia moris, hanesan ita hakarak hasai buat a’at husi ita, ita tem que peneira. Tanba nee iha ita nia moris mos precisa peneira ho reflexão, ita precisa fo tempo ituan hanoin kona ba Maromak nia liafuan nee srve ba hau kalae? Buka tuur ituan atu hakmatek husik Maromak koalia mai hau. Ida nee mak ohin loron laos buat foun maibe ita rona dala barak ona iha Santa Creda koalia kona ba Exame de Conciência. Nudar ema, nudar sarani Uma Creda sempre fo mai ita biban ida nee. Exame de Conciência katak peneira ida nebe ita bele tais buat nebe diak no buat nebe la diak.

Ita moris iha tempo ida nee atu halo Exame de Conciência atu reflete desafio boot ida laos fácil tanba barulho nebe haleu ita hodi halo ita atu tur hakmatek minuto ida susar. Tanba nee buka desvia husi ita nia realidade. Tan nee ohin Jesus convida duni ita atu fo tempo ituan ba Maromak atu koalia, husik Nai Maromak koalia ba ita atu ita bele rona, iha silência mak ita bele rona saida mak Maromak hakarak. Santo Agustinho nia liafuan nebe dala barak ita rona “Hau nia fuan sidauk hakmatek wainhira hau sidauk hare wainihra hau sidauk koko” nee duni wainhira ita nia fuan la hakamatek tanba ita buka hela, wainhira ita nia fuan la hakmatek nee tanba ita hamrok ba buat nebe aas liu maske buat nebe mundo nee bele fo maibe ita la satisfeito, karik sei falta buat nebe essencial. Mai ita buat nebe essencial mak Nai Maromak, buat nebe Espíritual. Ita bele hetan buat hotu-hotu maibe ita falta Nai Maromak ita hanesan ema karik isin mak boot maibe laran mamuk tanba precisa Maromak nia liafuan para reforça. Fuan mak liga wainhira iha Maromak nia liafuan, Maromak iha ita nia fuan ita nia decisão hotu nebe ita halo bele moris, fatin nebe ita halo bele iha mudança ba ita nia moris. Se ida nee mak hetan nia abut metin iha Nai Maromak nia liafuan sei laiha fuan nebe a’at. Ida nee mak dalan atu hakfilak ema nia fuan, hasai ema nia fuan iha contacto ho we matan moris nian. Tan nee Santo Agustinho hateten didiak buat nee; wainhira ó nia Maromak iha o nia fuan ó iha buat hotu no ó bele halo buat hotu basá buat hotu nebe ó halo nee diak. Tan nee mak nia habadak deit ho frase ida dehan; hadomi no halo buat ida inportante. Wainhira ó hadomi certamente la contra Maromak nia hakarak. Domin nee buat ida diak. Domin nee sai hanesan força, we matan hodi halo buat nebe diak ba ó nia moris. Hadomi ba hodi halo buat nebe ó hakarak. Husi fuan nebe hadomi los duni no hakarak halo duni buat nebe diak. Tan nee kaer nafatin ba buat nebe fuan ninian, Jesus mos dalaruma Nia dehan mai ita; iha nebe mak ó rai ó nia tesouro, iha nebe mak ó halot ó nia rikusoin ó nia fuan mos iha neba. Liafuan ida nee Jesus haklaken ho lian makas iha foho. Liafuan mak iha naroman iha projeto bot mak projeto domin ninian. Tan nee Jesus comvida ita atu bele descobre iha Nia  ai-hun diak, ai-hun moris. E Nia mak ita bele dehan katak ai-hun ida nebe fo fuan diak ba Maromak no ba humanidade tomak.

Maluk doben sira, fila ba ita ida-idak ita mos bele husu ba ita nia an Jesus hetan mos fatin iha ita nia fuan? Dala hira mak Nia moris hau hakasan atu fo duni espaçao ba Maromak iha hau ia projeto da vida? Dala hira mak hau descobre Jesus iha hau nia moris. Ohin hanesan iha introdução ita rona ita tama ona iha Dominggo VIII tempo comum ninian. Nee  duni depois Natal ita lao too tempo ida nee ho Dominggo ohin ninian ita tama tempo baibain no Quarta mai ita hahu ona ho CINZAS hodi hahu ona ita nia Quaresma. Nee duni Dominggo VIII tempo comum ninian prepara hela ita nia fuan atu tama ba Quaresma. Buat hotu nebe ita rona iha semana kotuk aumenta tan ohin sai reflexão furak mai ita sarani atu ita bele prepara an atu tama ba iha Quaresma.

Paróquia Balide mos ohin marca história ida tan ho tomada de posse amo Pároco foun, mensagem ohin ninian quensida ho momento importante litúrgico história ida nee. Certamente bainhira iha mudança ita hein buat foun progresso ba buat nebe Espíritual no material ninian. Mudança hirak nee hotu tem que hahu husi sarani sira. tanm nee mai ita hotu hamamuk ita nia fuan, hakasan husik Maromak nia liafuan mak sai sasukat, Maromak nia liafuan mak orienta comunidade ida nee, wainhira ita koko tau iha centro Maromak nia Liafuan sei hases ita nia ambição, sei tau ba kotuk ita nia interesse pessoal maibe buka buat nebe Maromak ninia domin. Tan nee mak Maromak nia Liafuan mak tem que sai sasukat atu motiva, atu mudifica, hahu orienta iha ita nia moris no iha comunidade ida nee nebe ohin haksolok ho ita nia presença Pároco foun ninian. Buat nebe ohin ita precisa hakiak no hela iha ita nia fuan mak buat nebe Jesus hakarak tebes atu halo tranparência no honestidade ho fiar nebe ita haklaken no fiar ida nebe ita moris. Buat nebe ita mai professa iha dominggo ita koko atu moris. Labele ita nia fiar nee iha Creda deit maibe iha moris. Santa Tersesa de Calcutá dehan; “Hadomi moris tuir buat nebe iha ona, maibe labele hadomi wainhira laiha domin. Se labele moris wainhira laiha vida.” Wainhira ita mai missa iha dominggo rona Maromak nia liafuan, simu Cristo nia Futar Isin hamos no hakbit liu tan ita nia moris nudar sarani los. Wainhira missa atu hotu amululik sempre dehan missa hotu ona ita fila ho Cristo nia Paz, atu pas no ksolok nebe ita hetan iha loron dominggo nian ita lori sai bukae ba ita durante semana tomak. Ida nee convite mai ita atu hadomi nafatin ita nia moris. Maibe dalaruma liafuan hirak nee sai hanesan formal hodi la toka ita nia moris nudar sarani, la afeta ita nia moris. Wainhira mosu desentendimento ruma ita la buka atu resolve uluk nudar sarani, nudar Jesus nia escolante diak ida, maibe liu husi media social ita hatun malu, koalia at ba malu, trata malu no insulta malu ikus mai ita dehan tanba liberdade bele halo buat nebe ita hakarak. Maibe maluk doben sira koalia kona ba sarani, nudar escolante Jesus ninian, Jesus convida ita ohin Livro Ben Sirá nian precisa peneira ita nia an. Mai ita koko tau ita nia neon ho Santo Agustinho nia liafuan nebe dehan; Hadomi no halo buat nebe ó hakarak, laos halo buat nebe o gosta ikus mai estraga buat barak iha tempo barak nia laran, maibe buka halo buat nebe o halo tanba domin.

 

Balide, 03/03/2019

Leave a Reply

Your email address will not be published. Required fields are marked *