shadow
Diocese de Dili > NOTÍCIAS > LETURA DIÁRIA > I Domingo iha Tempo Quaresma (ANO C)

I Domingo iha Tempo Quaresma (ANO C)

Primeira Leitura                  Deut. 26, 4-10

Lia housi Livro Deuteronómio:

Moisés dehan ba povo nune’e: “Na’ilulik sei simu housi ó liman ai-han foun rai nian atu hasa’e iha altar ba Na’i, ó nia Maromak, futar oin, ó sei hateten lia-fuan hirak ne’e: Ha’u nia aman ema Arameu ida la’o-rai; nia tun ba rai Egipto ho ema uma ka’in ki’ik ida. Nia moris iha nebá, la nu’udar ema rai na’in. Nia mak hako’us ema barak to’o halo nação boot ida. Ema Egipto sira halo aat teb-tebes ba sira, hodi hanehan sira, halo sira sai atan aat liu. Iha oras ne’e, ami hasa’e lia ba Na’i, ami nia amtuak sira nia Maromak.

Na’i rona ami nia lian, Na’i haré duni ami nia susar, haré duni ba ami nia naha todan. Maromak hasai ami housi rai Egipto ho liman kbiit maka’as, ho buat foun oi-oin halo ema Egipto sira ta’uk teb-tebes. Nia lori ami to’o fatin ida ne’e hodi haraik rai ne’e mai ami, rai ida nebé susu-wén no wani-wen suli maka’as. Ne’e duni, ohin ha’u mai hasa’e ba Ita ai-han foun rai ninian, rai ida nebé Na’i haraik mai ha’u. Hafoin, iha Na’i futar oin ó sei tuku-tur, hakruuk to’o rai atu hana’i ba Na’i, ó nia Maromak”.

Maromak Futar Lia.

 

Salmo Responsorial                                                                                                                                                  Sal. 90(91), 1-2, 10-11, 12-13, 14-15

Refrão : Na’i, iha susar laran hela nafatin ho ha’u!!! Repete-se

 

Ó be tur iha Maromak boot liu hotu nia kadunan,

Ó be hôrik iha Maromak bele buat tomak nia mahan dehan ba Na’i,

“Ita boot ha’u nia mahan, ha’u nia maksoyn;

Na’i ha’u nia Maromak, ha’u fiar Ita boot. Refrão

 

Aat ida la kona ó,

Susar ida la besik ó uman.

Tan Na’i haruka nia Anjo sira

Hein ó iha fatin hotu-hotu. Refrão

 

Sira sei tane ó ho sira liman

Atu ó ain keta sidi iha fatuk ruma.

Ó bele la’o iha balada fuik sira leet

Balada sí’ak sira sei la tata ó. Refrão

 

Na’i dehan: “Tan nia mai hamutuk ho Ha’u,

Ha’u sei sadia nia;

Tan nia hatene Ha’u naran,

Nia sei hetan moris naruk,

Ha’u sei hatudu ba nia Ha’u Maksoyn. Refrão

 

Segunda Leitura                                                                                                                                                                                               Rom. 10, 8-13

Lia housi São Paulo nia surat ba sarani sira iha Roma:

Maun-alin sira: Escritura dehan sá ida? “Lia-fuan besik ó, iha ó ibun tutun, iha ó laran”. Lia-fuan ne’e, lia-fuan nebé ami hanourin ba imi. Hodi ó nia ibun, ó dehan karik katak Jesus mak Na’i; hodi ó nia laran, ó fiar karik katak Maromak halo Nia moris hias housi mate, ó sei hetan Maksoyn. Basá, fiar ho laran, ne’e mak dalan lós atu sai santo; hodi ibun fó sasin, ne’e mak katak hetan duni Maksoyn. Tebes, Escritura hateten: “Ema hotu-hotu nebé fiar Na’i, nia sei la moe lerek”. Tebes duni, ema Judeu ka ema Grego, hotu-hotu hanesan de’it: Basá, Na’i ida de’it, laran luak ba ema hotu nebé harohan ba Nia. Basá, ema hotu-hotu nebé temi Na’i nia naran, nia sei hetan Maksoyn.

Maromak Futar Lia.

 

Aclamação                                                                                                                                                                                                                  Mat. 4, 4b

Refrão : Cristo, Maromak Futar Lia, ami hahí Ita!! Repete-se

Ita ema moris de’it ho ai-han,

Maibé, ho lia hirak mai housi Maromak futar ibun. Refrão

 

Evangelho                                                                                                                                                                                                                   Lc. 4, 1-13

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus ho Espírito Santo kbiit nakonu iha laran, la’o dook tiha housi mota Jordão. Espírito Santo lori Nia ba to’o rai fuik; Nia hela iha nebá loron haat nulu. Diabo mai babeur Nia. Iha loron hirak ne’e, Nia la han buat ida; liu tiha loron hirak ne’e, Nia hamlaha. Diabo dehan ba Nia: “Ó Maromak oan karik, dehan ba fatuk sira atu sira nakfila ba ai-han!” Jesus hatán ba nia: “Hakerek nanis ona: Ema la moris de’it ho ai-han!” Diabo lori fali Nia ba fatin aas ida hodi hatudu reino hotu-hotu raiklaran nian. Iha oras ne’e, diabo dehan ba Jesus: “Ha’u bele fó ba Ó reino ne’e tomak hamutuk ho nia riku-soi, basá, reino hirak ne’e hotu iha ha’u liman; ha’u bele fó ba ema nebé ha’u hakarak. Husu katak Ó tuku tur ba rai hodi hana’i ha’u, reino ne’e hotu Ó nian!” Jesus simu dehan: “Hakerek nanis ona: ó sei hana’i de’it ó nia Na’in, ó nia Maromak; ba Nia mesak de’it mak ó sei hahí-hana’i”. Hafoin, diabo lori Jesus ba Jerusalém, tau Nia iha uma Kreda nia kakuluk hodi dehan ba Nia: “Ó Maromak oan karik, Ó se-An housi ne’e ba kraik; basá hakerek nanis ona; Maromak hanourin nanis ona Anjo sira atu sira haré Ó; sira sei tane ó ho liman atu Ó keta sidi fatuk ruma”. Jesus hatán ba nia: “Ó keta babeur ó nia Na’in, ó nia Maromak”. Diabo babeur Jesus to’o la bele ona, nia husik tiha Jesus to’o loron ruma.

Lia Maksoyn.

Leave a Reply

Your email address will not be published. Required fields are marked *