shadow
Diocese de Dili > NOTÍCIAS > REFLEXÃO > KETA KOKO O NIA MAROMAK-BUKA FIAR NO ADORA NIA MESAK DEIT

KETA KOKO O NIA MAROMAK-BUKA FIAR NO ADORA NIA MESAK DEIT

(Deut.26,4-10; Rom.10, 8-13; Luc.4, 1-13)

 

Maun alin sarani doben sira, ita tama ona iha domingo ba dala uluk tempo quaresma tinan 2019 nee nian. Tempo ida tempo graça nian Maromak haraik mai ita atu ita bele prepara an hodi bele ba hasoru festa Pascoa, festa ita nia maksoin nian, festa vitoria ba ita ema.

Iha tempo ida nee Nai Maromak convida ita atu hakbesik an liu tan ba Nia no moris firme nafatin iha dalan moris los ka justiça nian liu husi halo Jejum hodi han no hemu sukat, halo abstinencia atu halakon ita nia toman at sira, halo oração hodi hamtin liu tan ita nia relação ho Maromak no halo caridade hodi bele besik no tulun liu tan ba maun alin sira. Iha sira nee hotu ita halo atu ita keta monu ba susar laran maibe atu ita hetan nafatin maksoin ihamoris ksolok nafatin iha ita nia moris loro loron.

Iha I domingo quaresma nee Nai Maromak fo hanoin fali mai ita atu ita hanoin hodi reflete kmanek tomak nebe Maroamk halo mai ita tamba Maromak hadomi ita no atu ita labele foti an hodi se kotuk ba Maromak hodi halo sasan ka ema ou buat seluk ida boot liu fali Maromak be ita nia criador ne’e, Maibe haraik-an no reconhece nafatin Maromak nundar we matan ita nia maksoin nian.

Maun alin doben sira,Primeira leitura lori ita ba hanoin hamutuk kona ba kmanek maksoin nian nebe Maromak halo mai ita hodi hatudu ninia domin rohan laek ba ita ema sira. Maromak hadomi tebes ita ema sira hodi soi nafatin ita loron ba loron liu husi ninia hahalok kmanek sira be halo nafatin mai ita ida idak. Haktuir mai ita kona ba Maromak hasai povo israel husi fatin dadur nian iha rai Egipto hodi lori sira ba fatin livre nian nebe nakonu ho wani wen no susu wen. Maromak ninia hahalok maksoin nee ohin loron lao nafatin hela iha ita leet la nahas. Maromak ninia hahalok Maksoin nee eterna.Tamba ida nee wainhira ita reflete klean kona ba ita nia moris nee comcerteza ita sei hetan Maromak ninia hahalok maksoin nee concretamente acontece mai ita ida idak. Terus no susar sira barak tebes mak ita hasoru iha ita nia moris mas que nune Maromak la husik ita mesak, nia soi tiha ita hodi halo ita hakat liu terus no susar sira nee ba tempo diak liu ida iha fatin diak liu ida no moris diak liu ida hanesan oras nee dadaun ita moris hela ba.

Atu ita moris metin nafatin iha Maromak ninia maksoin nee ou atu ita labele lakon Maromak ninia domin nebe hatudu tiha ona mai ita ita percisa hametin no haboot liu tan ita nia fiar ba Maromak. Basa fiar mak garante moris ida hanesan nee mai ita, laoiha tan buat seluk bele garante. Tempo quaresma nee mak tempo ida nebe ho pratica jejum, abstinencia, oração no caridade ita hakasan atu hametin liu tan ita ninia fiar ba Maromak hodi nune ita bele moris nafatin iha Maromak ninia domin no ninia maksoin.  Segunda leitura hanorin ona ita katak Fiar metin iha ita nia Maksoin Jesus Cristo mak halo ita bele hela metin nafatin iha moris ida hanesan nee. Maromak ninia futar liafuan nee haroman liu tan ita nia hanoin atu fiar metin iha Jesus Cristo wainhira dehan katak ita nia fiar nee labele sai buat ida temi deit iha ibun tutun maibe uluk nanain tem que fiar metin lolos iha fuan no laran, hafoin dehan sai ka haklaken ba ema seluk no ikus mai moris tuir Cristo ninia hanorin sira. Nee mak hahalok los liu relaçiona ho ita nia fiar. Nee duni maun alin sira, Jejum, abstinencia, oração no caridade ida oinsa mak ita ida idak percisa halo sai concreto atu bele hametin ita nia fiar iha Cristo: La han karak, la han kan ten maibe han hemu fahe ba malu, la estraga hahan, fo aihan ba maluk sira nebe percisa liu? Hamenus ka halakon toman fuma cigaro makas ka hemu tua makas liu karik? Iha abstinencia ita hakasan liu tan atu labele halo gosip ka fahe lia falsu (hanesan amu Papa Francisco haruka ita labele halo nee karik), la tolok hanesan halo ladanha, la rai hirus makas, la hanoin at no hanoin foer hasoru ema seluk maibe buka atu sai laran maus no mos, comprende nain no perdua nain, halibur nain no dame nain mak barak liu karik?. Iha ita ninia oração sira ita buka atu reza didiak liu tan husi fuan no husi laran laos decor deit, concentrado liu tan hodi bele medita klean liu Maromak ninia futar liafuan sira ba ita nia moris, harohan liu tan ba maluk sira nebe precisa ita nia tulun oração liu liu ba ita nia inimigo sira, , ba rai sira nebe sei funu, ba paz mundo tomak nian, ba ita nia rain no ita nia creda, ba unidade no ksolok familia hotu hotu nian. Iha ita nia caridade ita bele tulun liu maluk sira seluk iha material no mos espiritual, liu liu sira nebe percisa tebes ita nia tulun tuir ita ida idak ninia kbiit be Maromak haraik ona mai ita.

Doben maun alin sira, iha Evangelho Jesus hanorin ona ita katak wainhira ita hakarak moris tuir Maromak ninia hakarak hanesan ohin ita temi ona iha leten sempre iha tentação barak no boot tebes atu ita la halo ka labele moris tuir wainhira ita la fiar metin iha Maromak. Ita nain Jesus Cristo rasik experimenta ida nee iha ninia quaresma nebe nia halo durante  loron 40 molok halao ninia missão atu soi ita nee. Tentação sira ne mai oioin deit no sira nebe boot liu mak tentação kona ba ISIN nia hakarak, KBIIT atu ukun buat hotu no BOSOK ho maneira oioin deitatu hetan buat nebe ita hakarak. Diabu be tentador sira nia ulun halo tentação  sira ne ba Jesus hodi dehan “Se O Maromak nia oan, halo fatuk sira nee nakfilak ba pão hodi O bele han, Se O tuku tur ba rai hodi adora hau, hau sei fo rai tomak ba O mak ukun, Se O Maromak oan soe O nia an husi nee tun ba kraik, basa hakerek nanis ona katak O nia liman ka ain ida mos sei la tohar tamba Maromak ninia anjo sira sei mai tulun O”.

Jesus ninia experiencia kona ba tentação nee fanu ita nia an iha tempo quaresma nee atu ita bele matan moris neon nain hasoru tentação sira, liu liu tentação atu halo tuir deit mak ita ninia hakarak isin nian hodi monu ba salan, tentação egoista nian atu hakarak halibur buat hotu ba ita an no domina buat hotu no tentação atu koalia bosok nafatfatin deit hodi bele taka ita nia salan sira no hodi bele hetan buat nebe ita hakarak no sacrifica fali ema seluk tamba ida nee.

Jesus hanorin ita katak buat sira nee hotu ita hasoru iha ita nia moris maibe nee laos laos buat sira unico liu iha ita ninia moris. Sei iha mos aspeto importante seluk tan iha ita nia moris, moris klamar nian basa ita ema hori kedas Maromak hahu mai moris iha ita nia SER nundar ema nee iha isin no mos iha klamar. Tamba ida nee mak Jesus hatan ba diabo dehan “Ema la moris deit ho aihan maibe mos ho Liafuan nebe sai husi Maromak nia futar ibun hodi fo moris ba ema, o sei adora deit mak o nia Nai Maromak, Keta koko o nia Maromak”. Maromak mesak deit mak moris nia hun no nain, nia mesak deit mak bele soi ema sira husi terus, susar no mate laran ba moris ksolok rohan laek nian.

Tamba nee maun alin doben sira mai iha tempo quaresma ida nee ita buka hakasan atu iha ita nia jejum, abstinencia, oração no caridade sira nebe ita halo, ita halo ho laran metin lolos hodi:AGRADECE NAFATIN BA MAROMAK TAN MORIS NO TAN DIAK TOMAK NEBE NIA HALO ONA MAI ITA IHA MAKSOIN, HAMETIN NO HABOOT LIU TAN ITA NIA FIAR BA MAROMAK HODI TUKU TUR BA RAI NO ADORA NAFATIN MAROMAK MESAK IDA DEIT TINAN BA TINAN.

Becora, 1.D.QUARESMA, 10 Fevereiro 2019, Pb.

Leave a Reply

Your email address will not be published. Required fields are marked *