shadow
Diocese de Dili > NOTÍCIAS > REFLEXÃO > FIAR MAROMAK SDSB (Leitura no Reflexão Domingo Quaresma 2-ano C 2019 )

FIAR MAROMAK SDSB (Leitura no Reflexão Domingo Quaresma 2-ano C 2019 )

Primeira Leitura           Gén. 15, 5-12. 17-18

Lia housi Livro Génesis:

Iha loron hirak nebá, Maromak hasai Abraão housi nia uma, hodi dehan ba nia: “Foti matan ba lalehan, ó bele karik, sura to’ok fitun sira nebá”. Maromak dehan teni: “Ó nia bei-oan sira sei sai barak hanesan ne’e”. Abraão fia Na’i Maromak. Hodi fiar ne’e, Na’i halo ni sai santo. Na’i dehan teni ba nia: “Ha’u mak Na’i. Ha’u hasai ó housi Ur, ema Caldeus sira rain, atu hola rai ida ne’e ba ó”. Abraão hatán: “Na’i, ha’u nia Maromak, oin sá mak ha’u sei hatene katak rai ne’e hela ona mai ha’u?” Na’i dehan ba nia: “Ó ba lori mai karau oan ida otas tinan tolu; lori bibi-timur oan ida, ho bibi-malae aman ida tinan tolu hotu, manu lakateu ida ho tan manu falur ida”. Abraão ba hola balada sira ne’e hotu, fera fahe hotu tiha sira ba rua, hodi tau fahe baluk ida iha baluk seluk nia oin; maibé nia la fahe manu sira. Makikit sira tun mai na’an ne’e, maibé Abraão duni tiha sira. Molok loron besik atu monu, Abraão matan dukur todan teb-tebes, nia laran mós tata’uk hela. Loron mout liu tiha, nakukun taka daudaun rai, mosu mai áhi-klaak boot ida suhar hela ho áhi knulu ida lakan hela semo housi balada baluk sira leet. Iha loron ne’e, Maromak hemu moruk ho Abraão hodi dehan ba nia: “Ha’u fo rai ne’e ba ó nia oan sira, housi mota Egipto to’o mota boot Eufrates”.

Maromak Futar Lia.

 

Salmo Responsorial                                                                                                                                                         Sal. 26(27), 1, 7-8ª. 8b-9ac. 13-14

Refrão : Ha’u Na’i, ha’u nia Maromak, Ha’u nia Maksoyn!!! Repete-se

 

Na’i Maromak, ha’u naroman no Maksoyn,

Ha’u sei ta’uk fali sé!

Na’i Maromak sei tahan ha’u moris;

Ha’u sei ta’uk fali sé? Refrão

 

Na’i Maromak rona ha’u lian!

Ho laran luak sadia ha’u!

Ha’u fuan dehan mai ha’u:

“Ó buka Nia futar oin”. Refrão

 

Na’i, kalan loron ha’u buka Ita,

Keta helik-An mai ha’u,

Keta rai hirus, keta hewai Ita atan.

Maromak, Maksoyn tahan ha’u, tulun ha’u. Refrão

 

Buat ida de’it ha’u husu ba Maromak;

Ha’u husu bebeik ho laran.

Atu hela iha Maromak nia kadunan,

Kalan loron iha ha’u moris tomak. Refrão

 

Segunda Leitura                                                                                                                                                                                                 Flp. 3, 17-4, 1

Lia housi São Paulo nia surat ba sarani sira iha Filipos:

Maun-alin sira: Imi hotu sei buka halo tuir ha’u nia hahalok; imi sei haré ba ema sira nebé moris tuir ami nia hahalok. Ema sira nebé dala barak ha’u ko’alia ona kona ba sira ohin loron ha’u ko’alia ho tanis, ema sira ne’e, barak ho sira nia hahalok hanesan fali funu hasouru Cristo nia Cruz. Iha loron ikus sira sei hetan aat: Sira nia maromak mak kabun, sira haksolok tan ho sira nia moe, sira kaan de’it ba buat hira nebé rai ninin. Maibé ita, ita rain mak lalehan; iha nebá mak ita hein Maksoyn Na’i Jesus Cristo. Nia sei nakfila ita isin mukit ne’e ba isin ida nabilan kmanek tebes hanesan Ninian ho kbiit ida nebé Nia hodi ukun buat hotu-hotu. Ne’e duni, maun-alin doben sira: ha’u nia ksolok, ha’u nia soin, imi sei laran metin iha Na’i, ha’u doben sira.

Maromak Futar Lia.

 

Aclamação

Refrão : Na’i, Liurai boot liu hotu, ami hahí Ita!! Repete-se

Housi kalohan nabilan Maromak lia tun dehan:

“Ne’e Ha’u Oan doben: Imi rona Nia ba”. Refrão

 

Evangelho                                                                                                                                                                                                               Lc. 9, 28-36

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus ho Pedro, João no Tiago, sa’e ba foho atu hamulak. Nia sei hamulak daudaun, Nia futar oin nakfilak tiha An; Nia mutin nabilan teb-tebes. Iha oras ne’e mosu mai mane na’in rua, ko’alia hela ho Nia. Mane na’in rua ne’e, Moisés ho Elias. Sira mosu ho kbiit maka’as; sira ko’alia hela kona ba Jesus nia terus, nebé Nia hetan iha Jerusalém. Pedro ho nia maluk sira matan dukur todan. Hakfodak mai, sira haré Jesus nia kbiit maka’as ho mós mane na’in rua hamutuk ho Nia. Molok ema rua ne’e haketak-an housi Jesus, Pedro hasa’e lia ba Jesus dehan: “Mestre, di’ak liu ita hela ona iha ne’e! Ami halo taka-baluk tolu iha ne’e: Ida ba Ita, ida ba Elias, ida ba Moisés”. Nia ko’alia, maibé la hatene sá ida mak nia hateten. Nia sei ko’alia hela, kalohan ida mosu mai hodi falun tiha sira. Kalohan foin taka de’it sira, sira hakfodak no ta’uk teb-tebes. Housi kalohan, sira rona lian ida dehan: “Ne’e Ha’u Oan doben: Imi rona Nia ba”. Rona tiha lia hirak ne’e, Jesus hela mesak. Escolante sira nonok, iha loron hirak ne’e nia laran, sira la dehan sai ba ema, buat nebé sira haré.

Lia Maksoyn.

 

 

Reflexão :

FIAR LIU MAROMAK SDSB

 

Leitura sira Domingo semana nee (Segundo Domingo da Quaresma), sei lori ita ba haklean sentido husi “transfiguração” nebe acontece ba Jesus. Iha kedas Primeira Leitura (Antigo Testamento), ita haré Abraão hanesan modelo eh sasukat ba ema fiar nain. Husi Abraão, ita nobun hetan convite hodi fiar (acreditar). Fiar ida nee nudar atitude confiança total ba deit Maromak. Fiar no simu Maromak nia Mandamento Radicalmente. Saran-an tomak ba Maromak nia  providência basá, Maromak sempre fiel ba Ninia promessa. Nee significa katak ita nia fiar ba Maromak ida deit no lalika kahur tan ho fiar sel-seluk.

Ita Timor gosta halo especulação ba ita  nia fiar. Iha sorin ida ita badinas reza, badinas ba missa, instala Oratório iha uma laran,. Sorin seluk, ita fiar cina Maromak, fiar matan dook SDSB nian, fiar ai-kulit, fiar kakaluk (Biru), fiar fatuk no ai, fair hororscópio (zodiak), fiat mehi,…nst. Too iha ponto ida nee, ita husu, bainhira los mak Maromak nebe Revela-An iha Jesus Cristo hetan fatin iha ita nia fuan? Maromak iha relato Evangelho dehan:” ;” Nee Hau oan doben: imi rona Nia ba”.”

Dala ida tan, Segunda Leitura (Novo Testamento) convida hikas ita hodi renuncia ita ia atitude egoismo. Ita sente buat hotu naton ona ba ita (auto-suficiência) nunee, tanto Maromak, tanto ema seluk ita la precisa ona. Too ponto ida nee, ita haluha tiha katak; ita ema nee ser social ida nebe sempre precisa ema seluk iha ita nia viagem da vida. Wainhira iha susar laran, ita precisa ema barak, hetan tiha cargo oan ruma ita hateke ema seluk la hetan até que ita nega ema ida rua nebe uluk apoio ita nia processo ida nee. Transfiguração nebe ita rona iha Evangelho laos endereça (mengarahkan) ita ba ba triunfo ou vitória exterior maibé lolos nee Transfiguração resulta conversão (arrependimento) nebe klean husi parte interior (fuan laran). Transfiguração nee bele halao iha ita nia atitude simu Cruz moris nian ho domin na saran-An ba deit Maromak laos ba fiar fali maromak SDSB nebe mosu rebo rebo iha media social.

Iha Evangelho, ita bele entende Jesus nia transfiguração laos Jesus halo pameran Glória  maibé, Jesus hanorin ita liu hosi Apóstolo nain rua katak Cruz (Sacrifício) mak bele lori ita ba haksolok ho Glória lalehan. Buat nebe gratuita la dun iha valor do que buat nebe precisa Sacrifício. Jesus Revela-An nudar Maromak Oan nebe hatudu dalan Glória liu husi Sacrifício.

 

Sacrifício mak bele halo ita valoriza saida mak ita hetan. Atu hahu processo nee, precisa arepende lai pecado hodi facilita ita nia sacrifício ba Transfiguração ema foun. Se lae, ita mak nunee, nunee deit too mate no ita sei desviado hodi fiar fali Maromak SDSB nebe fácil, semana-semana ka lor-loron ita hetan kedas resultado. Se ita kona, ita contente  hahaek, se ita lakon, ita tolok avo matebian sira nia klamar mohu lakon. Afinal SDSB nee jogo (Permainan) ida nebe hanesan mos ho kur-kuru ho Bola guling maibé, ita sarani barak lor-loron buka mak plat motor kareta, konata mak mehi hodi manan jogo nee. Nee direito ema ida-idak nianm tanba participa jogo ho ita nia osan rasik maibé, husi parte fiar nian, sarani ida-ida precisa tau iha consideração katak; Fiar nee iha Maromak ida deit. Keta desviado ho matan dook balu nebe promete fo nomor  bola merah maibé husu transfer osan. Nee cuidado se lae ita nia fiar la kler halai fali ba Maromak SDSB nee.

Relato kona ba transfiguração iha Evangelho sinóptico sira sempre tuir kedas ho informação balu kona ba Jesus nebe sei terus iha tempo oin (Lc 9,22; 9, 44; Mt 16,21; 17,22; Mc 8,31 no 9,30). Afirmação ida nee justifica kedas ho condição oinsa tuir Jesus mak; sai escolante nebe pronto atu lori Cruz tuir Jesus lor-loron (Lc 9,23; Mt 16,24; Mc 8,3).

Momento transfiguração (Jesus nia nakfilak-An) bele considera nudar pausa eh transição ida molok Jesus ho nia escolante sira hiit-an ba Jerusalém atu Jesus simu nia páscoa (terus, mate no moris hias).

Iha Evangelho, São Marcos mos relata katak; Jesus sae ba foho lori ho escolante nain tolu; Pedro, Tiago no João. Sira sae ba foho nee hodi halo oração (reza), teki-tekil Jesus nia oin nakfilak no nia roupa sira sai nabilan. Iha momento nee duni mosu mos Moises ho Elias hodi koalia hela ho Jesus. Buat nebe sira nain tolu koalia dadaun mak kona ba missão Jesus nian iha Jerusalém.

Ita fiar no hanoin bebeik katak; Jesus mai hodi halo completa lei nebe iha ona. Moises representa lei judaica no Elias representa profeta sira. Sira nian rua (Moises & Elias) nia presença hatudu ona katak Jesus mai hodi cumpri eh halo completo moruk tuan ho moruk foun. Ida nee significa katak; buat hotu nebe iha lei judeu nian no livro profeta sira nian sai perfeito (completo) liu tan iha Jesus.

Iha Evangelho mos relata katak; escolante nain tolu nee sente admira tan sira sente seguro horik ho Nai. Pedro ho fiar-an hatete ba Jesus; ”Mestre, diak liu ita hela ona iha nee! Ami halo taka baluk tolu iha nee; ida ba Ita, ida ba Elias, ida ba Moises”

Pedro nia hanoin humano nee sai perfeito (sempurna) liu tan ho lian nebe sai husi kalohan tenik: ”Nee Hau Oan doben: imi rona Nia ba”. Buat nebe dada ita nia atenção mosu iha rohan husi Evangelho nebe relata katak; wainhira sira foti sira nia oin, sira haree Jesus mesmesak iha neba. Moises ho Elias lakon husi Jesus nia futar oin.

Jesus mak buat hotu husi buat hotu (Yesus adalah segalanya). Nia nakfilak-An iha escolante sira oin hodi fo lição simples ida katak; ultra passa tiha terus hotu, Jesus sei moris hias ho glória. No tanba glória ida nee mak ema hotu nia matan foti hodi hateke lesuk ba Jesus mesak deit.

Tempo Quaresma nudar biban diak atu haree los ba Jesus deit hodi rona Nia husi loron ba loron. Ba ida nee, ema budista sira sempre dehan; “wainhira o koalia, o hatete sai buat nebe o hatene ona; maibé, se rona ema seluk koalia, dalaruma o sei hetan buat foun ruma nebe o seidauk hatene”. Tanba nee mak iha lian nebe sai husi kalohan Maromak bolu atenção mai ita hodi dehan; ”Nee Hau Oan doben: imi rona Nia ba!”.

Nunee ita hein ho laran ba Jesus Cristo ita Nai, Salvador nebe sei transforma ita nia isin sai hanesan Nia isin nebe lulik. Tuir Nia kbiit, nia sei conquista  ou ukun buta hothotu. Tanba nee mak São Paulo bolu atenção atu ema hotu hamrik metin iha fiar.

São Paulo nia hanorin, lori ita ba compreende no fiar Jesus Cristo nia moris hias. Tansa ita precisa fiar iha Jesus Cristo nia moris hias? Tan ita precisa hamoris esperança (laran metin) ba Jesus hodi saran-an ba Maromak deit. Ita iha esperança/laran metin ida katak iha loron ikus Nai Jesus sei halo ita moris hias hodi ba horik hamutuk ho Maromak iha lalehan. Iha neba, ita sei goza Glória Maromak Aman, Glóia Jesus nian hamutuk ho Espírito Santo.

Certamente atu atinge ou hakat ba too glória rohan laek hamutuk ho Aman Maromak, ita sempre iha fiar ida katak; Maromak sempre cumpri nia promessa. Basá, Maromak rasik uluk halo promessa ho Abraão nudar ita rona iha primeira leitura.

Iha neba Maromak hatudu criatura hothotu ba Abraão hafoin Maromak promete atu fo ba Abrão nia geração sira. Promessa ou moruk significa iniciativa Maromak nian ba ema liliu tanba nia misericórdia/Domin nebe rohan laek.

Maske iha processo tuir mai, Abraão nia geração sira comete pecado/monu bebeik ba sala, maibé, Maromak fiel nafatin ba nia promessa maske ema mak dala ruma la fiel ba Maromak.

A Quaresma é um tempo favorável à nossa conversão, é um tempo propício para deixarmos o homem velho e revestir-nos do homem novo, identificando-nos com Cristo.
A Transfiguração de Jesus no Monte Tabor, que o Evangelho de hoje nos relata, lembra-nos que, através do esforço e da penitência quaresmal por seguir Cristo na sua Paixão, chegaremos também nós à alegria da sua Ressurreição gloriosa
. Nee mak Hau Oan doben, Imi rona nia ba. Assim Seja e Bem Haja. (Ignas)

Leave a Reply

Your email address will not be published. Required fields are marked *