shadow
Diocese de Dili > NOTÍCIAS > LETURA DIÁRIA > Segunda – Feira, II Semana tempo Quaresma (ANO C)

Segunda – Feira, II Semana tempo Quaresma (ANO C)

Primeira Leitura                      Dan. 9. 4b-10

Lia housi Profecia Daniel nian:

Na’i, Maromak boot no hamta’uk nia Hun, Ita laran metin ba Ita aliança, laran-luak ba ema sira nebé hadomi ita no moris tuir lolós Ita nia hanourin. Ami halo sala, ami hala’o tiha hahalok sira bé la lós no áat, ami sai tiha nu’udar ema áat hodi husik tiha Itaboot Nia ukunfuan no lei sira. Ami lakohi rona tiha Profeta sira, be Ita atan, nebé, hodi Ita naran, ko’alia ba liurai sira, ba ami ulun sira, ba ami bei-ala sira no ba povo tomak nação nian. Na’i, iha Itaboot ami hetan justiça, moe nebé ami senti monu iha ami leten. Nune’e, ohin loron mosu ba ema sira Judá nian, ba sira Jerusalém nian no ba Israel tomak, ba sira nebé hela besik no dook, iha nação hotu nebé imi duni ba, tan hahalok áat nebé sira hatudu tiha hasouru Itaboot. Na’i, moe nebé ami senti monu iha ami leten, ami liurai sira leten, ami ulun sira no bei-ala sira leten, tan ami halo sala hasouru Itaboot. Iha Na’i, ami Maromak, ami hetan laran-luak no perdua, basá ami hafunu hasouru Nia. Ami la rona Na’i, ami Maromak Nia lian, nebé haruka ami moris tuir Nia lei sira be hanesan fó sai nanis ona housi Nia atan sira be nu’udar profeta.

Maromak Futar Lia.

 

Salmo Responsorial                                                                                                          Sal. 78(79). 8, 9, 11, 13 (R. Sal. 102. 10ª)

Refrão : Na’i, keta tesi lia tan ami salan!!! Repete-se

Ita keta hanoin hasouru ami,

Tan ami bei-ala sira nia salan;

Ita laran-luak, mai hasouru ami ba,

Tan ami laran áat teb-tebes! Refrão

 

Maromak, ami maksoyn, tulun ami ba tanba

Ita naran nia glória.

Soi ami no perdua ami salan

Tan Ita naran. Refrão

 

To’o Ita oin, sira be terus nia lian;

Tan Ita liman nia kbiit

Hasai housi mate sira be simu mate. Refrão

 

Ami, Ita povo, Ita bibi-mala’e sira,

Ami sei hahi nafatin Itaboot

Housi otas ba otas;

Ami sei hananu Ita nia glória. Refrão

 

Aclamação                                                                                                                                                                         Jo. 6. 63c, 68c

Refrão : Glória ba Ita, Na’i, Maromak Oan be moris!! Repete-se

Itaboot nia liafuan mak espírito no moris.

Ita mak iha liafuan moris rohan laek nian. Refrão

 

Evangelho                                                                                                                                                                               Lc. 6. 36-38

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus dehan ba Nia escolante sira: “Imi buka sai ema laran di’ak hanesan imi Aman laran di’ak. Imi keta hanoin áat ema atu ema la bele hanoin áat imi. Imi keta du’un todan ba ema atu ema la bele du’un todan ba imi. Imi fó perdua, imi mós sei simu perdua. Imi fó, imi mós sei simu. Ema sei tau ba imi liman buat di’ak barak sai naresin, basá, imi halo oinsá ba ema, nune’e mós ema sei halo ba imi”.

Lia Maksoyn.

Leave a Reply

Your email address will not be published. Required fields are marked *