shadow
Diocese de Dili > NOTÍCIAS > Notícias > DOM VIRGÍLIO ORDENA FRATER NAIN 5 BA GRAU DIACONADO NIAN

DOM VIRGÍLIO ORDENA FRATER NAIN 5 BA GRAU DIACONADO NIAN

DCDD – Terça-Feira, 19 de Março de 2019, Iha solenidade São José nian iha mos ordenação diácono sira hanesan: Fr. Carlito Tetilaca, Fr. Eugenio Redentor,  Fr. Hermenegildo Sarmento, OFM. Cap, Fr. Mariano Maia no Fr. Roberto Lafu, OFM. Cap. HA’U SEI HANANU BA NAFATN NA’I NIA DOMIN (SALMO 88) sai nu’udar motto nebé Frater Nain 5, Fr. Carlito, Fr. Eugenio, Fr. Hermenegildo, Fr. Mariano no Fr. Roberto, hili iha sira ninia ordenação diaconado nian, nebé celebra iha Sé Catedral Diocese de Dili nian. Celebração ne’e preside husi Bispo Diocese de Dili Dom Virgilio do Carmo da Silva, SDB. Nebé concelebra husi encaregado nunciatura nian iha Timor-Leste nomos presbítero tomak Diocese Dili nian e religioso sira. Celebração ne’e hetan participação husi: Religiosos/as, Seminaristas, autoridades, convidados,famíliahusi Diacono nain tolu nian, colegas no sarani sira. Além ne’e mos, Bispo Diocese de Dili Dom Virgilio do Carmo da Silva, SDB comemora 3a aniversário nu’udar bispo de Dili.

Iha homilia Dom Virgílio hateten, Ohin opurtunidade mai ita atu hametin liu tan ita nia fidelidade ba Na’i Maromak hanesan ema sarani lato’o deit fiar iha ibun hanesan São Tiago dehan; Fiar nebé laiha hahalok Fiar ne’e mamuk. Mai ita aprende husi São José banati tuir nia espírito da humildade, disponibilidade, generosidade ninian, laos deit preocupa ho ita ida-idak nia plano, maibé hatene foti matan hodi hare nafatin Na’i Maromak nia plano iha ita ida-idak. Laos preocupa deit ho ita ida-idak nia comunidade, ita ida-idak nia paróquia, maibé Uma Creda Local nia necessidade. Ita nia envolvimento iha Uma Creda iha nia missão. Hanesan São José ita mos preocupa laos atu husu saida mak Uma Creda halo mai ha’u, maibé saida mak ha’u “pessoal, nu’udar comunidade, nu’udar Instituição, Organização” ha’u contribui ba Uma Creda nia diak.

Dom Virgílio haktuir tan katak, Loron ida ne’e Santa Creda hahi São José nu’udar Virgem Maria nia kaben. Nia vocação mak atu tau matan, atu bali, quida virgem Maria ho Jesus ho fidelidade no simplicidade. Nia besik ba nia kaben iha momento sira ksolok ninian nune mos iha momento sira nebé susar ninian. Nia iha ninia aproximidade ida, intimidade ida forte ho Kosok Oan Jesus no virgem Maria. Festa ohin ninian hanoin kona ba São José nu’udar Nain Feto nia kaben convida ita hotu, maibé liu-liu ba chefe da família sira, ba aman sira iha família atu hare no aprende nafatin husi São José nia fidelidade, São José nia simplicidade. Vertude rua ne’e mak salvaguarda uma kain Nazare nian.

Ohin particularmente ba sira nain 5 ne’e mak halo loron ida ne’e sai especial liu tan ba Eugenio, Hermenegildo, Carlito, Roberto no Mariano. Semana kotuk wainhira Frater nain 3 husi Diocese Dili nian molok atu ba retiro sira mai hasoru ha’u no ha’u husu ba sira nain 3; Imi nia preparação to’o ona iha nebé? Oinsa pronto ona ga seidauk? Sira nia resposta otomática dehan; ami nia Alba suku ona. Ha’u dehan ba sira nain 3; alba tuan mos imi sei ordena. Laos alba mak determina imi tem que ordena. Hatais tuan mos imi sei bele ordena. Profeta Joel dehan; Laos Les imi nia hatais maibé les mak imi nia fuan. Iha tempo quaresma ida ne’e ita rona bebeik liafuan sagrada ida nebé fanu ita hotu. Hein katak ida ne’e bele sai motivação klean liu tan ba ita nia alin nain 5 ne’e.

Dom Virgílio hato’o nia mensagem ba Frater nain 5 nebé atu simu ordenação ba grau diaconado nian hodi dehan; Alin doben sira nebé oras-oras tan sei simu ordenação no sei simu knar ida nebé repete ohin nebé dehan; “fiar buat nebé ó Le hanourin buat nebé ó fiar moris tuir buat nebé ó hanourin” atu fo testamunho ba mundo particularmente Timor-Leste diocese Dili comunidade no paróquia sira nebé imi sei ba haknar-an atu hananu nafatin Na’i nia domin, nebé imi foti mos nu’udar imi nia grupo nia motto ba ordenação diacono nian. Maibé ha’u nia pergunta ba imi nain 5 mak ida ne’e; oinsa mak imi nain 5 sei hamoris frase ida ne’e nu’udar diacono ida husi ohin ba ohin?

Hanoin fali mensagem amo Papa nian nebé hakerek iha Evangelho Gaudium katak; ida nebé atu haklaken uluk nanain tem que hatene didiak lai Maromak nia liafuan. Lato’o deit hatene aspeto linguístico exigético ninian, ida ne’e necessário, maibé buat ida nebé precisa fo atenção liu precisa hakbesik Maromak nia liafuan ho fuan ida nebé nakloke atu nune’e liafuan hirak ne’e bele tama uluk iha imi nia fuan, penetra uluk iha imi nia neon ho imi nia sentimento mak imi bele halo preparação diak ida molok atu lori mai ema seluk.

Hanoin fali São José, São José laos pregador ida maibé husi nia experiência moris ninian hakarak fo hanoin mai ita hotu liu-liu ba imi nain 5 katak; eficiência imi nia ministério diaconado nian ne’e sei hetan liu iha imi nia união iha imi nia intimidade ida nebé klean, mak ho ida nebé bolu imi atu tuir Nia, bolu imi atu servi. Alin doben nain 5, ho ordenação diaconado nian imi laos deit marca passo ida, maibé ida ne’e knar ida, ida ne’e servisu ida nebé Na’i Maromak bolu ho Espírito de servi no haraik an nian. Tan ne’e, imi tem que aprende husi São José atu sai ema ida nebé hatene servi. Ne’e duni ita hotu nebé ohin maluk, familiares no convidados hotu nebé acompanha ita nia maluk nain 5 ne’e mai ita harohan atu São José bele hanourin ita ida-idak bele moris tuir buka Na’i Maromak nia vontade. Ita harohan atu ita hotu aprende husi São José atu halo ita nia moris hanesan knananuk ida atu ita hahi nafatin Na’i nia domin iha fatin hotu-hotu. (Alin)

Leave a Reply

Your email address will not be published. Required fields are marked *