shadow
Diocese de Dili > NOTÍCIAS > HOMILIA DO BISPO > HAU SEI HANANU BA NAFATIN NA’I NIA DOMIN (SALMO 88)

HAU SEI HANANU BA NAFATIN NA’I NIA DOMIN (SALMO 88)

Liafuan ida ne’e, husi Salmo Uma Creda iha mundo raiklaran, iha Festa São José nian, hananu hodi hanoin fila fali Na’i Maromak nia fidelidade ba nia promessa nebé ohin Nia halo ho nia atan nebé Nia Fihir, Nia atan nebé Nia Hasanto. Ho liafuan ida ne’e, ita mos bele descreve furak oinsa ho modo nebé especial, personalidade, missão São José ninian, Nia ida nebé ita hanaran Servo Fiel e prudente. Nune’e oinsa mak São José hatudu lia hirak ne’e iha ninia moris. Ita tinan-tinan celebra bebeik São José nia festa, maibé rona menságem sira nebé hanesan, oinsa mak ita koko atu bele hare São José ninia mensagem mai ita ida-idak. Evangelho tane as São José Maria nia kaben nebé mak hatudu duni nia fiar nebé klean no Espírito nebé nobre. Nia simu hola parte iha Maromak nia obra salvação nian, make ita hotu hatene katak fofoun nia conciênte hakraikan sente la soi duni ba missão ida nebé as teb-tebes, missão ida nebé nobre atu tau matan ba Feto ida nebé Na’i Maromak fihir atu sai Maromak Oan nia Inan no tau matan ba Maromak Oan rasik, sai Maromak Oan nia Aman Hakiak. Nia sempre la soi, maibé ho graça Na’i Maromak ninian ikus mai Nia compreende katak laos nia hakarak, maibé Maromak nia vontade. Tan ne’e São José ho hulmildade nia aceita, ho generosidade nia coopera, ho responsabilidade fo An atu realiza Maromak nia plano salvação ninian.

São José mai ita hirak nebé ohin iha ne’e, modelo ema ida justo, ema nebé disponível pronto nafatin ba Maromak nia vontade, ba Maromak nia obra. Ema nebé justo laos tanba nia hatene observa didiak ukunfuan sira nebé hakerek tiha ona, maibé justo hanesan hakerek iha Livro Sabedoria nian nebé dehan: Iha nia ita hare ema ida nebé nakonu ho Espírito ida inteligênte, ema Santo, ema nebé único, penetrante, laiha foer, hadomi buat nebé diak, pronto, livre, belun ho ema hotu, ema nebé tranquilo, laran mos. Iha Livro Sabedoria ninian concidera buat hirak ne’e mak hanesan natureza no propriadade sabedoria ninian. Ho matenek hirak ne’e deit lato’o wainhira laiha sinal ida mai husi Na’i Maroamak selae ita bele halo buat diak barak, maibé laos buat nebé Na’i Maromak hakarak eh buat nebé Maroamak husu, ita halo ita nia projeto pessoal, maibé laos halo Na’i Maromak nia projeto. São José ida nebé tanba ita Na’i Maromak fihir, tanba ita Na’i Maromak hili nia. Nune’e mos ita sarani nebé ohin mai atu hahi São José iha loron ida ne’e, hodi ita nia batismo Na’i Maromak haraik ba ita rahun diak oi-oin isin no klamar ninian. Nune’e mos tanba Cristo nia fihir mos ita husi kedas ona wainhira mundo ne’e hahu atu ita sai nafatin Maromak nia oan hakiak sira.

Ohin opurtunidade mai ita atu hametin liu tan ita nia fidelidade ba Na’i Maromak hanesan ema sarani lato’o deit fiar iha ibun hanesan São Tiago dehan karik; Fiar nebé laiha hahalok Fiar ne’e mamuk. Mai ita aprende husi São José ba nati tuir nia espírito da humildade, disponibilidade, generosidade ninian, laos deit preocupa ho ita ida-idak nia plano, maibé hatene foti matan hodi hare nafatin Na’i Maromak nia plano iha ita ida-idak. Laos preocupa deit ho ita ida-idak nia comunidade, ita ida-idak nia paróquia, maibé Uma Creda Local nia necessidade. Ita nia envolvimento iha Uma Creda iha nia missão. Hanesan São José ita mos preocupa laos atu husu saida mak Uma Creda halo mai hau, maibé saida mak hau “pessoal, nu’udar comunidade, nu’udar Instituição, Organização” hau contribui ba Uma Creda nia diak.

Loron ida ne’e Santa Creda hahi São José nu’udar Virgem Maria nia kaben. Nia vocação mak atu tau matan, atu bali, quida virgem Maria ho Jesus ho fidelidade no simplicidade. Nia besik ba nia kaben iha momento sira ksolok ninian nune mos iha momento sira nebé susar ninian. Nia iha ninia aproximidade ida, intimidade ida forte ho Kosok Oan Jesus no virgem Maria.

Maluk doben sira, festa ohin ninian hanoin kona ba São José nu’udar Nain Feto nia kaben convida ita hotu, maibé liu-liu ba chefe da família sira, ba aman sira iha família atu hare no aprende nafatin husi São José nia fidelidade, São José nia simplicidade. Vertude rua ne’e mak salvaguarda uma kain Nazare nian.

Ohin loron família barak naksobu tanba falta de aproximidade ida ne’e no intimidade ida ne’e nebé forte. Laos deit iha momento ksolok nian, maibé liu-liu iha momento hirak nebé susar. São José mos fo hanoin ba chefe de família liu-liu família católico katak elemento ireimitável atu hakiak harmonia no união inquenfrontável nebé iha família mak Cristo. Cristo mak sai nu’udar elemento nebé fundamental essencial iha família laran. Wainhira Cristo sai centro família iha família ida-idak família ne’e sei metin nafatin.

Maluk doben sira, além de virtude hirak ne’e nebé temi tiha ona São José mos ema nebé servisu nain, ida nebé símples, ema nebé iha capacidade atu halo servisu ho diak ho servisu nebé folin “produtivo”. Ida ne’e mensagem ida nebé desafia mos ita hotu, maibé ohin particularmente ba sira nain 5 nebé tur iha ita hotu nia oin ne’e mak halo loron ida ne’e sai especial liu tan ba Eugenio, Hermenegildo, Carlito, Roberto no Mariano. Semana kotuk wainhira Frater nain 3 husi Diocese Dili nian molok atu ba retiro sira mai hasoru hau no hau husu ba sira nain 3; Imi nia preparação to’o ona iha nebé? Oinsa pronto ona ga sidauk? Sira nia resposta otomática dehan; ami nia Alba suku ona. Hau dehan ba sira nain 3; alba tuan mos imi sei ordena. Laos alba mak determina imi tem que ordena. Hatais tuan mos imi sei bele ordena. Profeta Joel dehan; Laos Les imi nia hatais maibé les mak imi nia fuan. Iha tempo quaresma ida ne’e ita rona bebeik liafuan sagrada ida nebé fanun ita hotu. Hein katak ida ne’e bele sai motivação klean liu tan ba ita nia alin nain 5 ne’e.

Alin doben sira nebé or-oras tan sei simu ordenação no se simu kna’ar ida nebé repete ohin nebé dehan; “fiar buat nebé ó Le hanourin buat nebé ó fiar moris tuir buat nebé ó hanourin” atu fo testamunho ba mundo particularmente Timor-Leste diocese Dili comunidade no paróquia sira nebé imi sei ba hakna’ar-an atu hananu nafatin Na’i nia domin, nebé imi foti mos nu’udar imi nia grupo nia motto ba ordenação diacono niani. Maibé hau nia pergunta ba imi nain 5 mak ida ne’e; oinsa mak imi nain 5 sei hamoris frase ida ne’e nu’udar diacono ida husi ohin ba ohin?

Hanoin fali mensagem amo Papa nian nebé hakerek iha Evanglho Gaudium katak; ida nebé atu haklaken uluk nanain tem que hatene didiak lai Maromak nia liafuan. Lato’o deit hatene aspeto linguístico exigético ninian, ida ne’e necessário, maibé buat ida nebé precisa fo atenção liu precisa hakbesik Maromak nia liafuan ho fuan ida nebé nakloke atu nune’e liafuan hirak ne’e bele tama uluk iha imi nia fuan, penetra uluk iha imi nia neon ho imi nia sentimento mak imi bele halo preparação diak ida molok atu lori mai ema seluk.

Hanoin fali São José, São José laos pregador ida maibé husi nia experiência moris ninian hakarak fo hanoin mai ita hotu liu-liu ba imi nain 5 katak; eficiência imi nia ministério diaconado nian ne’e sei hetan liu iha imi nia união iha imi nia intimidade ida nebé klean, mak ho ida nebé bolu imi atu tuir Nia, bolu imi atu servi. Alin doben nain 5, ho ordenação diaconado nian imi laos deit marca passo ida, maibé ida ne’e kna’ar ida, ida ne’e servisu ida nebé Na’i Maromak bolu ho Espírito de servi no haraik an nian. Tan ne’e, imi tem que aprende husi São José atu sai ema ida nebé hatene servi. Ne’e duni ita hotu nebé ohin maluk, familiares no convidados hotu nebé acompanha ita nia maluk nain 5 ne’e mai ita harohan atu São José bele hanourin ita ida-idak bele moris tuir buka Na’i Maromak nia vontade. Ita harohan atu ita hotu aprende husi São José atu halo ita nia moris hanesan knananuk ida atu ita hahi nafatin Na’i nia domin iha fatin hotu-hotu.

Leave a Reply

Your email address will not be published. Required fields are marked *