shadow
Diocese de Dili > NOTÍCIAS > LETURA DIÁRIA > III Domingo Tempo Quaresma (ANO C)

III Domingo Tempo Quaresma (ANO C)

Primeira Leitura               Ex. 3, 1-8ª. 13-15

Lia housi Livro Exodo:

Iha loron hirak nebá, Moisés hein hela bibi, nia banin mane Jetro, nai’lulik iha rai Madiã ninian. Iha loron ida, nia lori bibi sira ba iha rai fuik maran nia sorin balu ba, nia to’o iha Maromak nia foho Horeb. Na’i nia Anjo mosu ba nia hanesan ahi-klaak moris iha áhi-klobor oan ida. Moisés hanoin iha nia laran nune’e: “Ha’u ba besik, hodi haré took buat foun sá ne’e?” Na’i haré nia hakbesik ba ai-klobor ne’e, Na’i bolu nia housi ai-klobor ne’e: “Moisés! Moisés!” Moisés hatán: “Ha’u mak ne’e!” Maromak dehan teni: “Ó keta besik mai. Hasai tiha sandailas housi ó ain, basá, fatin ó sama dau-daun ne’e, rai lulik ida.” Maromak lia tun dehan teni: “Ha’u ó aman nia Maromak, Abraão nia Maromak, Isaac nia Maromak, Jacob nia Maromak”. Moisés taka tiha oin, basá, nia ta’uk hateke ba Maromak. Hafoin Na’i dehan tan: “Ha’u haré Ha’u nia povo terus iha rai Egipto; Ha’u rona ms nia lian, tan guarda sira fó terus ba nia. Ha’u hatene nia terus. Ha’u tun mai atu hasai nia housi ema Egipto sira liman, atu lori nia housi rai ne’e ba rai di’ak, rai luan, rai ida nebé suli susu-wén no wani-wén”. Moisés hasa’e lia ba Maromak: “Ne’e sá, ha’u ba buka Israel oan sira, hodi dehan ba sira: ‘Imi nia amtuak sira nia Maromak haruka ha’u mai’. Maibé, sira husu karik Ita naran mai ha’u, ha’u dehan lós sá ida?” Maromak lia tun ba Moisé: “Ha’u mak Ha’u duni!” Maromak dehan tan: “Ó sei hateten ba Israel oan sira nune’e: Ida be naran “Ha’u mak Ha’u”, Nia haruka ha’u mai imi”. Hafoin, Maromak lia tun ba Moisés: “Na’i, imi nia amtuak sira nia Maromak, Abraão nia Maromak, Isaac nia Maromak, Jacob nia Maromak, haruka ha’u mai imi”. Ne’e mak Ha’u nia nafatin ba nafatin, naran nebé sei hela da’et nafatin housi oan ba bei-oan.

Maromak Futar Lia.

 

Salmo Resposorial                                                                                                                             Sal. 102(103), 1-2. 3-4, 6-7, 8, 11

Refrão : Na’i laran luak, Nia hadomi, Nia perdua!!! Repete-se

Ha’u klamar hahí Na’i,

Ha’u isin no klamar hahí Nia naran santo.

Ha’u klamar hahí Na’i,

la haluha nia tulun. Refrão

 

Nia haraik perdua ba ó salan sira hotu,

Nia hanoin ó terus sira hotu.

Nia la husik ó mate,

Nia halo ó laran nakonu ho graça no domin. Refrão

 

Na’i halo tuir justiça,

Nia tahan ema sira be ki’ak, ema sira be terus.

Nia hatudu nia dalan ba Moisés,

Nia hatudu nia kbiit ba Israel oan sira. Refrão

 

Na’i laran luak, hadomi, perdua,

La rai hirus, laran maus.

Hanesan rai, dook housi lalehan, nune’e mós,

Na’i laran luak ba sira nebé hadomi Nia. Refrão

 

Segunda Leitura                                                                                                                                                    1 Cor. 10, 1-6. 10-12

Lia housi São Paulo nia sura ba sarani sira iha Corinto:

Maun-alin sira: ha’u lakohi imi la hatene ida ne’e: ita nia amtuak sira hotu la’o iha kalohan nia okos, hotu-hotu hakur tasi, hotu-hotu simu baptismo housi Moisés, iha kalohan no iha tasi, hotu-hotu han ai-han lalehan ida de’it, hotu-hotu hemu wé lalehan ida de’it. Sira hemu wé sai housi fatuk inan ida de’it, nebé hamutuk nafatin ho sira: fatuk inan ne’e mak Cristo. Maibé, sira barak liu mak la monu ba Maromak nia laran, sira ne’e mate hotu ona iha rai fuik maran. Buat hirak ne’e mosu, atu hanourin ita, keta kaan buat aat, hanesan amtuak sira halo. Ibun keta mumú hanesan sira balun uluk halo; tan ne’e, Anjo halo sira mate mohu ona. Ne’e hotu mosu atu hanourin ita; ne’e hotu ema hakerek atu fó hatene ita, ita sira be moris tempo ikus nian. Nune’e, ema nebé hanoin katak nia sama rai metin haré be keta monu.

Maromak Futar Lia.

 

Aclamação                                                                                                                                                                                  Lc. 13, 1-9

Refrão : Liura kbiit wa’in, ami hahí ita!! Repete-se

Na’i lia tun dehan: Hakribit imi salan,

Reino lalehan besik daudaun. Refrão

 

Evangelho                                                                                                                                                                                   Lc. 13, 1-9

Na’i Jesus Cristo nia Evangelho nu’udar São Lucas haktuir:

Iha tempo nebá, ema mai fó hatene lia ne’e ba Jesus: Pilatos haruka oho ema Galileu ba hamutuk ho balada hirak nebé sira oho hodi hasa’e ba lulik. Jesus lia tun ba sira, dehan: “Imi hanoin katak ema Galileu sira ne’e tan sira terus nune’e, sira ema maksalak boot liu sira seluk? Ha’u dehan ba imi katak lae. Imi la hakribit karik imi salan, imi mós sei mate hotu hanesan sira. Imi hanoin katak na’in sanulu resin walu, nebé ema Siloé hanehan mate, mate, tan sira ema maksalak liu ema sira seluk iha Jerusalém? Ha’u dehan ba imi katak lae. Imi la hakribit karik imi salan. Imi mós sei mate hanesan sira”. Jesus dehan tan aiknanoik ida ne’e: “Ema ida kuda ai figueira iha nia toos. Loron ida, nia ba buka ai figueira nia fuan, maibé la hetan. Tan ne’e, nia hateten ba toos atan: ‘tinan tolu ona ha’u kole buka ai-fuan iha ai-hun ne’e, maibé la hetan fuan ida: tesi tiha nia. Tan sá husik nia susu leet rai bokur?” Maibé, toos-atan dehan: ‘Na’i, husik tan lai tinan ida ne’e; ha’u ke’e lai rai hadulas nia hun, hodi tau mós rai metan. Aban-bain-rua nia sei nia sei fó fuan karik. Nia la fuan ba, mak sei tesi tiha nia’.

Lia Maksoyn.

Leave a Reply

Your email address will not be published. Required fields are marked *