shadow
Diocese de Dili > NOTÍCIAS > REFLEXÃO > IMI LA HAKRIBI KARIK IMI SALAN IMI MOS SEI MATE MOHU HANESAN SIRA

IMI LA HAKRIBI KARIK IMI SALAN IMI MOS SEI MATE MOHU HANESAN SIRA

Maun alin sarani doben sira mak hau hadomi iha ita Nain Jesus Cristo,

Nai ninia liafuan ida nee lori ita ba hatene katak ita ema sala nain duni. Dala barak tebes mak ita hanoin no hare ema seluk sira nia salan facil no lalais liu do que hanoin no hatene ita nia an nundar sala nain ida. Nai Jesus convida no husu ita atu uluk nanain hare ita ninia an, ita niaan nundar ema sala nain sira, hare ita nia salan hodi hadia ita nia moris mak uluk liu, laos hare uluk mak ema seluk ninia salan. Se ita laiha kbiit atu hakribit ita nia salan sira, inutil ita hare no koalia ba maluk sira seluk atu hare sira ninia salan no hakribi sira ninia salan.

 

Maromak ninia futar liafuan ohin nian tulun ita descobre katak ita ninia salan sira nebe boot liu mak primeira leitura dehan “fo terus ba ema hodi halo ema sira la moris livre”. Ema sira nebe terus no la moris livre laos deit mak maluk doben sira nebe tem que cumpre tempo castigo nian iha cadeia, maibe mos la livre ema sira nebe moris hela iha susar ninia laran tamba ita seluk ninia hahalok, moris hela iha opressão nia laran, iha tauk nia laran, iha hamlaha nia laran, iha serviço nundar atan nia laran, ho lian badak ita dehan moris hela iha injustiça nia laran tamba ita sira seluk ninia hahalok.

 

Nai Maromak hatudu ninia laran luak mai ita hotu atu soi ita iha terus nee ninia laran nunee hotu hotu bele hetan moris ida digno lolos nundar ema Maromak ninia oan doben sira. Mai ita sira nebe husi ita ninia hahalok sira fo terus no susar ba ema hodi halo ema la moris livre Maromak husu atu hakribi ita nia salan sira hodi hatudu ita nia laran luak ba maluk sira seluk, liu liu sira nebe moris hela iha terus no susar nia laran tamba ita nia salan. Ba ema sira nebe terus hela no la hetan liberdade iha sira ninia moris Maromak hatudu laran luak hodi intervem atu soi sira nundar ninia halo ba povo israel uluk iha rai Egipto. Maromak ninia hahalok maksoin ka salvador nee ohin loron acontece nafatin no dura nafatin ba nafatin mai ita ema sira hotu husi geração ba geração. Nune mak ita ema salan nain sira atu labele lakon graça salavação nian nee, ita ninia hahalok hakribi salan mos tem que halo nafatin no dura nafatin ba nafatin basa ita ema sala nain nanis.

 

Iha segunda leitura domingo ohin nian São Paulo husu ita atu hakribi ita nia salan sira concretamente iha ita nia salan sira be baibain ita halo no fila fali ita ninia fuan no laran ba Nai Jesus Cristo be nundar fatuk inan we matan maksoin nian hodi halo ita nia moris bele monu los duni ba Maromak ninia laran. Ita ninia salan sira nebe concretamente ita percisa hakribi mak salan “foti an hasoru Maromak hodi foti lia ka murmura hasoru Maroamk”. Nee salan boot no aat. Paulo dehan “Keta kaan buat at hanesan uluk amtuak sira halo. Ibun keta mumú hanesan sira balun uluk halo, no tamba nee Anjo halo sira mate mohu ona”.

 

Maun alin doben sira, salan nebe la kasu halo ita la moris livre lolos nundar Maromak hakarak hodi cria ita ema sira, limita ita ninia liberdade, salan nebe la kasu halo ita lakon moris hakmatek iha mundo nee, halo ita la sente moris ninia folin, halo ita la sente seguro iha moris lolos ida, halo ita lakon paz, ksolok no domin. Ikus mai halo ita lakon mate no lakon moris rohan laek. Nunee los duni ita nundar ema sala nain percisa tebes HAKRIBI duni ita ninia salan sira hahu ho passo haraik-an hodi iha Maromak nia futar oin no iha maun alin sira nia oin reconhece ita-an nundar ema sala nain, buka hatene ita ninia salan sira husi salan kiik too boot no buka hakribi nafatin salan sira ne hotu ho Maromak ninia tulun. Hodi halo nune’e mak ita sei moris livre lolos nundar ema Maromak ninia oan no sei hetan Maksoin lolos be Cristo lori mai ita nafatin ba nafatin iha ita nia moris hahu kedas ona iha mundo nee. Amen.

 

Bidau, III.D.QUARESMA, 24 Março 2019, Pb

Leave a Reply

Your email address will not be published. Required fields are marked *