shadow
Diocese de Dili > NOTÍCIAS > LETURA DIÁRIA > Segunda-Feira, III Semana Tempo Quaresma (ANO C)

Segunda-Feira, III Semana Tempo Quaresma (ANO C)

Anunciação do Senhor

Solenidade

 

Primeira Leitura               Is. 7. 10-14, 8. 10

Lia housi livro Isaías nian:

Iha loron hirak neba, Na’i lia tun ba Acaz, ghodi dehan nune’e: “Husu ba Na’i, ó nia Marmak, sinal ida husi matebian sira nia fatin okos liu eh husi fatin leten áas ba”. Acaz simu: “Ha’u sei husu ida ne’e, ha’u sei la koko Na’i Maromak”. Isaías hatan fali: “Rona mai David nia uma kain: imi babilan ema seidauk to’o, imi hakarak mós babilan ha’u nia Maromak? Tan ne’e, Na’i Maromak rasik sei fó sinal ida ba imi: fetoran ida sei ko’us no tur-Ahi oan mane ida, nebe nia sei hanaran ‘ Emanuel’, katak, ‘Maromak hamutuk ho ita’.

Maromak Futar Lia.

 

Salmo responsorial                                                                                                  Sal. 39(40). 7-8ª, 8b-9, 10, 11 ,(R. cf. 8ª e 9ª)

Refrão: Na’i, ha’u mai atu halo tuir ita nia hakaran!!! Repete-se

 

Ita boot la kohi sacrificio no buat-karan,

Maibe loke ha’u tilun atu rona.

Ita la husu buat-karan eh na’an maten,

Tan ne’e ha’u dehan: “Ha’u mak ne’e!”  Refrão

 

Iha livro lei nian, hakerek nanis ona,

Saida ha’u atu halo tuir.

Ida ne’e mak ha’u hakarak, ha’u Maromak,

Ita ukunfuan iha ha’u fuan laran.  Refrão

 

Ha’u sei haklaken ita justiça ba ema lubun boot.

Na’i, ita hatene katak ha’u la taka ha’u ibun.  Refrão

 

Ha’u la subar ita nia justiça iha ha’u fuan okos;

Ha’u haklaken ita nia fidelidade no maksoin.

Ha’u la subar netik iha povo tomak sira nia oin,

Ita nia laran di’ak no ita nia lialos. Refrão

 

Segunda Leitura                                                                                 Heb. 10. 4-10

Lia housi surat ba Hebreu sira:

Maun alin sira: Basá karau aman no bibi timur nia ran la bele kasu sala. Nune’e, wainhira Cristo mai iha mundo, Nia dehan: “ Ita lakohi sacrificio ka buat karan sira; maibe ita prepara isin mai ha’u. Ita la haksolok ho buat karan sunu nian ka sacrificio ba sala sira, no Ha’u dehan, ‘Maromak, Ha’u mak ne’e! Ha’u mai atu halo tuir ita nia hakarak’, nu’udar hakerek nanis konaba ha’u iha livro. Waimhira nia dehan: “ita lakohi no la haksolok ho sacrificio no buat karan siras, no buat sunu no sacrificio ba sala sira nian”. Nebe ukunfuan haruka hasa’e,tuir mai nia dehan tan: “Ha’u mak ne’e! Ha’u mai atu halo tuir ita nia hakarak”. Nia halakon ida uluk nian atu hari fali ida ikus nian. Ho nia hakarak ne’e mak ita sai santo housi nia isin nebe Jesus Cristo hasa’e tan ba ita, dala ida de’it ba nafatin.

Maromak Futar Lia.

 

Aclamação                                                                                                                                                                                  Jo.1. 14ab

Refrão : Hahi hana’i ba ita boot, Jeseus Cristo,ami Na’in!! Repete-se

Lianfuan halo-an ba ema no hôrik iha ita leet.

Ami haré nia gloria. Refrão

 

Evangelho                                                                                                                                                                               Lc. 1. 26-38

Na’i Jesus Cristo nia Evangelho tuir São Lucas:

Iha fual neen, Maromak haruka Anjo Gabriel ba knua ida Galileia nian, naran Nazaré, ba fetoran ida nebe hakotu tiha ona ba mane ida naran José, housi David nia uma kain; fetora ne’e naran Maria. Tama tiha iha uma, anjo dehan: “ Rahun di’ak feto kamek wa’in tebes! Na’i ho ita!” Rona tiha lia ne’e, nia laran taridu hodi husu ba nia-an rasik cumprimentu ne’e katak sá los. Anjo dehan ba nia: “Keta tauk, Maria; basá o hetan rahun diak tebes iha Maromak futar oin. Ó sei hanaran nia Jesus. Nia sei sai ema boot; ema sei hanaran nia Na’i as liu hotu nia oan. Na’i Maromak sei haraik ba  Nia nia aman David nia ukun. Nia sei ukun Jacob nia uma kain ba nafatin; Nia ukun sei rohan la’ek”. Maria husu ba Anjo: “Ne’e sei sai oinsá lós, basá ha’u la hola mane? Anjo hatan ba nia dehan: “Espírito santo sei tun ba ó no Na’i áas liu hotu nia biit sei hamahan ó. Tan ne’e, Santo nebe atu moris sei hanaran an ‘ Maromak nia Oan’. Ó nia feto maluk Isabel mós sei kô’us tiha oan mane ida, maski ferik ona. Ida nebe ema dehan la kô’us, nia kô’us fulan neen ona; basá, ba Maromak. Buat ida la susar”. Maria dehan: “Ne’e sá, Na’i atan oan mak ne’e, halo tuir ita liafaun ba!” Hafoin Anjo husik nia.

Lia Maksoyn.

Leave a Reply

Your email address will not be published. Required fields are marked *