shadow
Diocese de Dili > NOTÍCIAS > LETURA DIÁRIA > IV Domingo Tempo Quaresma (ANO C)

IV Domingo Tempo Quaresma (ANO C)

Primeira Leitura               Jos. 5, 9a, 10-12

Lia housi Livro Josué:

Iha loron hirak nebá, Na’i lia tun ba Josué, dehan: “Ohina Ha’u hasai Egipto nia todan housi imi”. Israel oan sira harí ai-hun iha Guigal, hafoin, sira halo festa Páscoa iha loron sanulu resin haat fulan uluk nian loraik, iha rai tetuk Jericó nian. Iha loron festa Páscoa, katak: pão la tau fermento ho terigo musan sona de’it. Iha loron ne’e duni tuir páscoa, maná la monu tan ona, tan sira hahú han ai-han rai nebá ninian. Israel oan sira la koko tan ona maná; maibé hahú iha tinan ne’e, sira han ai-han hasai housi rai Canaã”.

Maromak Futar Lia.

 

Salmo Responsorial Sal.                                                                                                                                         34(33), 2-3. 4-5. 6-7

Refrão : Ema hotu hatene: Maromak di’ak tebes!!! Repete-se

Hana’i nafatin ha’u Na’in;

Ha’u ibun hahí kalan loron.

Maromak ha’ nia kbiit,

Ki’ak sira ksolok rona Nia. Refrão

 

Ita haklaken Na’i nia beran,

Hamutuk hawelok nia naran.

Ha’u buka, Maromak rona ha’u,

Sadia ha’u housi susar laran. Refrão

 

Hahí Maromak, imi sei haksolok;

Imi neon sei la susar.

Ki’ak ba buka, nia sei hetan tulun,

Hetan tulun ba nia susar. Refrão

 

 

Segunda Leitura                                                                                                                                                              2 Cor. 5, 17-21

Lia housi São Paulo nia surat ba sarani sira iha Corinto:

Maun-alin sira: Ema nebé moris ho Cristo, ema ne’e ema foun duni. Buat uluk nian liu ona: buat hotu hola ilas foun ona. Buat hotu mai housi Maromak. Hodi Cristo, Maromak badame malu ho ita; Nia haruka mai hala’o knar dame malu nian. Tan hodi Cristo, Maromak badame malu ona ho mundo, Nia la hanoin tan ema sira nia salan; Nia haruka duni ami tatoli lia dame malu nian. Tan ne’e, ami Cristo nia saseluk, basá, hodi ami, Maromak lia tun ba ema sira. Hodi Cristo nia naran, ami husu buat ida ne’e ba imi: katak, badame malu ho Maromak ba! Cristo maski sala laek, tan ita, Maromak halo Nia nu’udar maksalak, atu housi Nia, ita bele sai santo iha Maromak futar oin”.

Maromak Futar Lia.

 

 

Aclamação                                                                                                                                                                                   Lc. 15, 18

Refrão : Glória ba Ita Boot Cristo Maromak Futar lia!! Repete-se

Ha’u ba ona, Ha’u ba hamutuk ho Ha’u Aman,

Hodi dehan ba Nia. “Aman, ha’u sala hasouru

Lalehan, ha’u sala hasouru Ita”. Refrão

 

Evangelho                                                                                                                                                                       Lc. 15, 1-3. 11-31

Na’i Jesus Cristo nia Evangelho nu’udar São Lucas haktuir:

Iha tempo nebá, ema publlicano sira no maksalak sira, hakbesik hotu ba Jesus, atu rona Nia. Maibé, ema Fariseu no ema Escriba sira ibun botu-botu ba malu, hodi dehan: “Ema ne’e simu maksalak sira, hodi han hamutuk ho sira”. Tan ne’e, Jesus haktuir aiknanoik ida ne’e ba sira: “Ema ida iha oan mane na’in rua. Ida kiik dehan ba nia aman: ‘Aman, fo ona riku-soi nebé kona mai ha’u’. Aman ne’e fahe riku-soi ba oan sira. Liu tiha loron ruma, oan mane kiik ne’e, halibur tiha nia riku-soi hotu, nia la’o ba rai ida dook teb-tebes. Iha nebá, nia halo nabén hotu nia soin, hodi moris aat liu. Halakon tiha hotu nia soin, rai hamlaha boot. Nia hahú hamlaha. Tan ne’e, nia ba husu serviço ba ema rai na’in ida, nebé haruka nia ba hein fali nia toos. Nia kan teb-tebes atu han fahi-etun, maibé, ema ida la fo. Tan ne’e, nia hanoin iha nia laran, hodi dehan: ‘Atan sira iha ha’u aman nia uman, la susar ba ai-han, maibé ha’u iha ne’e, mate ba hamlaha! Ha’u sei hamriik ba ko’alia ho ha’u aman, hodi dehan: ‘Apá, ha’u sala hasouru lalehan, ha’u sala hasouru ita. Ha’u la soin ona, atu ita haré ha’u nu’udar oan. Haré hanesan atan ida’. Nia hamriik duni ba buka nia aman. Sei dook hela, nia aman haré tiha ona nia; nia aman hanoin nia teb-tebes, halai ba hakoak tiha hodi re’in nia. Nia dehan: ‘Ha’u aman, ha’u sala hasouru lalehan, ha’u sala hasouru ita. Ha’u la soin ona ita bolu ha’u oan’. Maibé, nia aman dehan ba atan sira: ‘Imi lori lalais mai, unuk ida kmanek liu, atu fo hatais nia. Tau kadeli ida ba nia liman, tau mos sandáilas ba nia ain. Ba hola karau oan bokur ida, lori mai oho. Ita han, hodi halo festa ida, basá, ha’u oan ida ne’e mate tiha foin moris fali, nia lakon tiha, foin hetan fali’. Sira hahú daudaun halo festa. Maibé, oan mane boot iha hela toos. Wainhira nia fila mai, nia rona ema hananu hodi hakse’ek. Nia bolu atan ida hodi husu kona ba hakse’ek ne’e. Atan ne’e dehan: ‘Ó nia alin fila fali mai ona; ó nia aman haruka oho karau oan bokur, tan ó alin fila ho isin di’ak’. Nia laran nakali, lakohi tama ba uman. Nia aman sai mai liur hamaus nia, atu tama. Nia hatán dehan: ‘Tinan hira ona ha’u serbí ba ita, ha’u halo tuir nafatin ita hakaran, maibé, ita la fo bibi oan ida atu haksolok ho ha’u belun sira. Maibé, ita oan ida ne’e to’o mai, oan nebé halo nabén nia soin ho feto aat sira, ita oho kedas karau oan bokur ida ba nia. ‘Nia aman dehan: ‘Oan, ó hela nafatin ho ha’u, buat hotu nebé ha’u nian, ó nian. Maibé, ita sei halo duni festa ida hodi haksolok, basá, ó nia alin ida ne’e mate tiha moris fali, lakon tiha hetan fali’.

Lia Maksoyn.

Leave a Reply

Your email address will not be published. Required fields are marked *