shadow
Diocese de Dili > NOTÍCIAS > Notícias > DALAN NARUK ATU HETAN JUSTIÇA NO PREZERVA VALORES PATRIÓTICOS E NACIONALISMO

DALAN NARUK ATU HETAN JUSTIÇA NO PREZERVA VALORES PATRIÓTICOS E NACIONALISMO

DCDD – Fulan 6 de Abril de 1999 hanesan memoria nakukun ba povo Liquica tamba mosu masacre ida iha residencia paroquia São João de Brito de Liquiça nian, tamba ne’e hodi comemora masacre ne’e ba dala XX hodi hanoin hikas vitima sira ne’ebé mate tamba hakarak ukun rasik an.  Tamba ne’e relaciona ho comemoração ne’e comissão ogranisadora hamutuk ho autoridade Igreja paroquia nian halao atividade seminario nacional ida ho ninia tema “Dalan Naruk Atu Hetan Justiça no Prezerva Valores Patrióticos e Nacionalismo” ne’ebé sei halao iha loron 3-5 de Abril de 2019.

Iha descurso abertura nian Presidente da Republica, liuhusi chefe Militar Colonel António Soares da Silva Maukalu hateten “ho laran haksolok ha’u simu convite husi comissão organizadora hodi loke seminario ida ne’ebé hodi hanoin loron ne’ebé tama mos iha ita nia história libertação nacional nian”. 

 Ba ema hirak ne’ebé lakon familia uma laran, belun no colega sira iha Abril 1999, no moris ohin loron ho laran tarido no trauma presidente da Republica hatoo ninia hakuak boot ho estado no povo Timor Leste nia naran.

Liutan ne’e Presidente da Republica mos iha ninia mensagem temi kona ba sasin importante maktoban Pe. Rafael dos Santos.  Presidente da Republica mos mensiona kona ba esforço sira ne’ebé estado sei halo hodi hamenus vitima sira ninia halerik no contribui ba sira ninia moris hakmatek iha tempo ukun rasik an ne’e.

Iha biban hanesan Sr. Dr. Hugo Fernandes husi Comissão Nacional Chega nian ne’ebé foca liu ba knar serviço Chega nian hodi apio no tau matan ba sobrevivente sira. Pontos principal husi Diretor Nacional CNC nian mak haree liu ba intrumento tolu iha lei Internacional nian“ Lei direitos Humanos Internacional, Lei Humanitaria Internacional no Lei Criminal Internacional no lei tolu ne’e koalia kona ba vitima funu nian ho ninia base legal atu oinsa ema ida ou grupo ida concidera hanesan vitima depois de conflito”.   Lei diretos humanos internacional mensiona vitima sira husi violação sira ne’e maibé aplica de’it responsabilidade ba estado la aplica ba individo ne’ebé comete crime, Sr. Hugo clarifica.

Kona ba responsabilidade individo sira ne’ebé comete crime Diretor CNC ne’e explica “Lei Criminal Internacional no Lei Humanitaria Internacional fo biban ida ne’e atu husu responsabilidade pessoal nian ba crime ne’ebé acontece”.

Iha ninia lia taka ba seminario ne’e Diretor CNC ne’e dehan “ se ita la hakerek participação popular sira ita nia narativa história ne’e  dominado husi ema eminente sira (maun boot deit, bin boot deit), laos participação baibain ema nian, ita hakarak halo balanço atu geração sira tuir mai hatene katak luta popular ida ne’e ema hotu contribui, laos ema ida mesak nian de’it”.

Semanario loron dahuluk nian ne’e, iha mos mensagem gravado husi Bispo emerito Dom Carlos Filipe Ximenes Belo,  SDB nian husi portugal ne’ebé dehan “ sira la’os vitima maibé asuwain”.

Participantes iha seminario nacional iha comemoração dos 20 anos do massacre  Liquiça ne’e mai husi orgão titular soberano sira, ex-titular, Administrador Municipio, representante Igreja nian, representante ONG sira, estudantes escolas Basico, Secundaria catolica, geral no escola tecnica vocacional, sasin sira, joventude no comunidade tomak municipio Liquiça nian.

Comemoração masacre Liquica nian ne’e sei remata ho celebração eucaristia ne’ebé seipreside husi Bispo de Maliana iha loron 6 de Abril de 2019.   (Alin & Marvel Olive)

Leave a Reply

Your email address will not be published. Required fields are marked *