shadow
Diocese de Dili > NOTÍCIAS > Notícias > BA HAU MASSACRE HANESAN PONTE IDA ENTRE ITA NIA RESISTÊNCIA BA UKUN AN

BA HAU MASSACRE HANESAN PONTE IDA ENTRE ITA NIA RESISTÊNCIA BA UKUN AN

DCDD-Loron 6 de Abril de 1999 hanesan memória nakukun ba povo Liquiça tamba mosu massacre ida iha residéncia paroquial São João de Brito de Liquiça nian. Iha tinan ne’e Povo Liquiça hodi comemora masacre Liquiça ne’e ba dala XX, hodi hanoin hikas vítima sira ne’ebé mate tamba hakarak ukun rasik an. Presidente Episcopal Timorense atual bispo de Maliana Dom Norberto do Amaral be preside celebração Eucaristia ba comemoração Massacre Liquiça ba dala XX nee iha ninia homilia hateten, “Diak no At ida nee iha ita ema nia moris. Hakarak ou lakohi ita tem que hasoru. Hasoru oinsa? Ida nee mak ita ema tem que neon nain halo abertura ida nebe makas hodi simu buat rua nee; Diak ita simu no At mos ita simu. Diak ita simu hodi hametin nafatin ba oin hodi aperfeçoa ita nia an sai diak liu tan, At ita buka atu ha tene husi at ida nee, nunee ita bele hadia fila fali ita nia moris.”

“Maun alin sira massacre iha Liquiça, Lospalos no Suai, ita bele iha Masaacre oi-oin iha Timor-Leste ida nee, hatudu realidade aat ida husi ita ema ninian, maibe labele haluha mos katak haksumik husi realidade ida nee tanba lialos ida-verdade ida-diak ida nebe povo nee hakarak ninia aspiração nee hodi ukunan. Massacre sira iha 1999 nee, ba hau pessoalmente sai hanesan ponte ida entre ita nia resistência ba ukunan. Atu hakat ba ukunan ida nee mak hari ponte ida nee, ita hotu-hotu hare katak iha Ponte ida nee hari ho ran, tanis no mate. Maibe importante ba ita mak nee; iha ran, tanis no halerik ida nee iha buat diak nebe iha ita nia an ida nee, atu ita mos bele hatetu ita nia an nee iha diak no at ida nee nia laran. Hanesan ema tem que simu realidade rua nee ‘diak no aat’, hamrik iha ponte ida nee hodi hare diak ho aat ida nee atu ita aperfeçoa ita nia an hodi aban bainrua hari timor ida nebe iha prosperidade nia laran. Ida nee depende ba ita ida-idak, diak ita simu-aat mos ita simu atu ita bele buka lição nebe diak ba ita nia moris.

Dom Norberto do Amaral hatutan tan katak, “Sira nebe mate tiha ona, Poético ida ho naran Horácio dehan; ‘é belo e glorioso morrer pela pátria’. Wainhira ita hatur ita nia an nee hodi assume didiak ita nia knar nudar ema nebe lao rai iha mundo raiklaran ida nee hodi hare diak ho aat ida nee hodi desemvolve nia an, hodi aperfeçoa nia an, hodi buka estrategia foun atu bele hasoru futuro ida nebe diak nian, nebe laos favoresse deit ba ema ida deit, maibe ba ema hotu-htu nia diak. Ita reza ba Na’i Maromak hodi haraik bensa mai ita hotu nebe sei moris hodi agradece, agradece ba Heroi sira nebe mate tanba rai ida nee, nebe ohin sira la hela iha ita nia le’et, maibe ita fiar metin katak bainhira ita mate ba buat diak ou verdade ida ita hetan glória iha Maromak nia Futar oin. Sira nee Mártires da Pátria. Hamutuk ho sira nebe iha mundo seluk no ita sira be iha nee atu ita bele neon nain hodi buka nafatin diak ba ita nia povo no diak ba ita nia rain. Ita hein katak ho celebração ida nee ho seminário sira nebe halo ona durante loron tolu liu ba, bele fo fali Espírito foun atu ita renova ita nia an hodi lao hateke ba oin. Nee duni ita harohan dala ida an ba Na’i Maromak atu harai bensa mai ita liu-liu ba ita nia lider sira atu bele neon nain nafatin hodi lori Timor nee tuir povo nia aspiração”. (Ciko)

Leave a Reply

Your email address will not be published. Required fields are marked *