shadow
Diocese de Dili > NOTÍCIAS > Notícias > ITA MAI LAOS ATU TANIS, MAIBE ATU FO VALOR BA SIRA NIA SACRIFÍCIO

ITA MAI LAOS ATU TANIS, MAIBE ATU FO VALOR BA SIRA NIA SACRIFÍCIO

DCDD – Líder Carismático Kay Rala Xanana Gusmão iha loron Sábado, 6 Abril 2019, participa iha missa comemoração 20 anos Massacre Liquiça iha Igreja Paroquial São João de Brito Liquiça. Iha ninia discurço relaciona ho comemoração 20 anos Massacre Liquiça nee hateten, “Celebração sira hanesan nee mosu hanesan opotunidade ba ita nia geração sira atu husu tanba sa? Saida? Hau hakarak repete fali deit Dom Norberto do Amaral nia liafuan ohin hateten ba Liquiça oan sira katak, Massacre mosu iha fatin barak hanesan iha Liquiça, iha Lospalos, iha Suai hodi fo hatene katak, labele kaer Massacre Liquiça hanesan satu-satunya, maibe parte husi sacrifício boot nebe ita nia povo fo ba ita nia rain. 20 anos massacre no 20 de Maio mai nee ita celebra 17 anos ukunan soe ituan saida mak dudu ita atu hanoin deit ita nia an rasik, soe ituan ba! Liu-liu iha loron nebe sira nebe ita atu venera katak fo honra sira la husu buat ida, sira fo an ba mate, simu terus hirak nee sira la husu buat ida, maibe ho deit sira nia fo an ba mate ida nee atu rai nee bele ukunan. Ita mai iha nee laos atu tanis, se ita mai iha nee atu tanis, nee katak ita la fo valor ba sira nia sacrifício. Ita mai iha nee atu fo honra ba sira, agradece ba sira tanba sira mate maka ita bele hetan ukunan nee”

Líder Carismático Kay Rala Xanana Gusmão reforça tan katak, Jovem sira matenek ituan ikus-ikus nee koalia barak mak ba hau nia direito, direito no direito, maibe dever sira lakohi hatene. Ne’eduni jovem sira iha loron sira reflexão hanesan nee buka hare saida mak imi bele fo ba rai ida ne’e tanba imi sidauk fo buat ida. Imi husu deit iha imi nia an rasik hanesan direito ida. Agora zona iha timor Leste indenpendente. Atu hetan independéncia mak ohin katak fo onra ba sira ne’e. Fo honra ba sira atu hatutan labele haluha tanba iha parte ida nee ita halo sacrifício boot. Tanba nee hau dehan naiulun timoroan tomak loke neon hodi fo valor ba terus ida nee labele hanoin liu ba isin lolon rasik, fo ituan ba povo ida nee. Iha momento reflexão ida nee hau husu Liquiça oan sira pelo menos hahu husi nee took ba. Tanba nee foinsae sira, katuas sira hakasan ba servisu didiak netik ba. Tanba nee Liquiça ho celebração ida nee husu boot Liquiça sei sai Município ida nebe disciplina makas, solidariedade makas, lolo liman ba Maromak mos, hadomi malu ba, maibe democria los. Mas tanba deit democracia ita atu saruntu malu, ita atu tolok malu ida nee ita laos ema ona. Nee duni favor boot ho comemoração ida nebe ohin ita halo ho Maromak nia tulun ita hotu husu ba Liquiça oan sira hadomi malu ba, fo liman ba malu atu foti Liquiça atu fatin seluk sei hare dehan imi hanoin ho saida mak imi atu halo laos husu deit. Matenek barak ona. Tanba nee husu ba Liquiça oan sira imi iha saida atu dezemvolve. Ita halo buat sira nee hotu laos ba ita nian deit maibe atu fo honra tanba sira mate, sira fo sira nia an ba ita nia rain hodi ita meresse buka hanoin, buka servisu, buka halao saida mak ita bele”. (Alin Soares/Gelson Soares)

Leave a Reply

Your email address will not be published. Required fields are marked *