shadow
Diocese de Dili > NOTÍCIAS > REFLEXÃO > LA BELE HALO SALA TAN!

LA BELE HALO SALA TAN!

Primeira Leitura                       Is. 43. 16-21

Lia housi Livro Profeta Isaías:

Uluk liu, Na’i loke dalan housi tasi, loke luron ida housi wé inan klaran. Na’i halibur kuda no kareta ba funu; halibur mós funu na’in barani; sira ne’e hotu monu ba rai la hamriik tan, sira mate lakon hotu hanesan áhi-oan mate. Na’i lia tun dehan: “Imi keta hanoin tan ona hahalok uluk nian, imi keta hanoin buat uluk nian. Imi haré! Ha’u atu halo buat foun ida, buat foun ne’e mosu daudaun ona, imi la haré? Ha’u sei loke dalan ida iha rai fuik maran. Balada fuik sira – fahi fuik no manu fuik avestruz sira sei hahí hana’i Ha’u, tan Ha’u sei halo wé, suli iha rai-fuik-maran, atu haró ema sira nebé Ha’u rasik fihir ona. Ema sira nebé Ha’u fihir, sira sei hana’i Ha’u naran boot”.

Maromak Futar Lia.

 

Salmo Responsorial                                                                                                                          Sal. 125(126) 1-2ab, 2cd-3, 4-5, 6

Refrão : Na’i halo kmanek oi-oin ba Nia povo!!! Repete-se

Ou         : Na’i, Ita nia ksolok!!! Repete-se

Wainhira Na’i lori fila

ema sira be dadur iha Sião,

hanesan fali ami mehi.

Ibun ami haksolok hamnasa

Ibun ami hawelok hananu. Refrão

 

Ema gentio sira hawelok haklaken:

“Na’i halo kmanek oi-oin ba sira!”

Tebes, iha ami leet, Na’i halo kmanek oi-oin,

Tan ne’e, ami haksolok hawelok. Refresh

 

Na’i fila daudaun ona ami rahun aat ba di’ak,

Nu’udar wé-inan suli iha rai-fuik-maran;

Sê ho kólen tau fini ba rai,

Haksolok hananu hodi sohi. Refrão

 

Nu’u sira tatanis lori mutuk sira fini;

Fila fali ho ksolok hasán rai fulin. Refrão

 

Segunda Leitura                                                                                                                                                                    Flp. 3, 8-14

Lia housi São Paulo nia surat ba sarani sira iha Filipos:

Maun-alin sira: Ha’u haré buat hotu-hotu hanesan folin laek, iha Ha’u Na’i Jesus Cristo Futar Oin. Tan Cristo ha’u simu terus hotu, ha’u haré buat tomak hanesan foér. Ha’u halo ne’e hotu atu manán Cristo, ha’u halo ne’e hotu atu hela iha Cristo, hodi hela laós tan ha’u nia di’ak ruma, nebé mai housi ukun, maibé hodi di’ak nebé mai tuir fiar iha Cristo. Di’ak ne’e mai housi Maromak, tuir ha’u nia fiar. Nune’e, ha’u bele hatene Cristo, ha’u bele hatene kbiit moris hias nian, ha’u bele hatene terus hamutuk ho Nia. Nune’e, ha’u bele mate hanesan Cristo, atu bele hetan moris hias housi mate. Ne’e laós tan ha’u to’o ona di’ak nia rohan eh ha’u hetan ona di’ak hanesan Cristo. Ha’u la’o ba nafatin, atu buka to’o hetan, tan Jesus Cristo mós kaer toman ona ha’u. maun-alin sira: ha’u la hanoin katak ha’u hetan ona di’ak  nia rohan; ha’u hanoin buka buat ida de’it, katak, haluha hodi tau ba kotuk buat uluk nian, atu la’o ba oin nafatin to’o rohan, atu bele hetan prémio nebé Maromak haraik mai ha’u hodi Cristo Jesus.

Maromak Futar Lia.

 

Aclamação

Refrão : Hahí no glória ba Ita Boot Jesus Cristo!! Repete-se

Na’i lia tun dehan:

“Ha’u lakohi ema aat nia mate;

Ha’u hakarak nia fila ba di’ak atu bele moris”. Refrão

 

Evangelho                                                                                                                                                                                   Jo. 8, 1-11

Na’i Jesus Cristo nia Evangelho nu’udar São João haktuir:

Iha tempo nebá, Jesus sa’e ba foho Oliveiras, maibé, rai foin kmaus de’it, Nia mosu fali iha Templo. Tan povo tomak hakbesik Nia, Nia tur, hodi hahú hanourin sira. Ema escrivão no fariseus sira lori mai Jesus feto ida ema toman halo sala ho mane seluk. Sira tau feto ne’e iha ema hotu nia oin, hodi dehan ba Jesus: “Mestre, ema toman feto ne’e halo sala ho mane seluk. Tuir lei, Moisés ami tuda mate feto sira nebé hahalok hanesan ne’e. Ó dehan sá lós?” Sira husu hanesan ne’e, atu tau hani ba Jesus, atu nune’e, sira bele hetan lia ruma hasouru Nia. Maibé Jesus hakru’uk hodi hakerek iha rai ho Nia liman fuan. Tan sira litik nafatin Nia, Nia hamriik hodi dehan ba sira: “Imi ida nebé la iha sala, bele kaer fatuk ida hodi tuda feto ne’e”. Jesus hakru’uk fali hodi hakerek nafatin iha rai. Maibé, rona tiha lia fuan hirak ne’e, sira ida-idak sai daudaun hahú housi katuas sira. Jesus hamriik mai, dehan ba nia: “Sira iha nebé hotu? Ema ida la halo aat ba ó?” Nia hatán: “La iha ema ida Na’i”. Jesus dehan fali ba nia: “Ha’u mós la fó castigo ba ó. La’o ó nia ba! Houri ohin ba oin, keta sala tan”.

Lia Maksoyn.

 

REFLEXÃO:

LA BELE HALO SALA TAN

Ligação leitura sira  Domingo semane nee ho Domingo hirak ba kotuk; nafatin apresenta figura Maromak hanesan Aman nebe laran luak, Aman nebe  perdua nain. Maromak nia sentido perdão nebe luan hanesan Tasi, hatudu momos iha Nia Jesus Cristo. Hahahlok Perdão nebe Jesus hatudu iha Evangelho Domingo semana nee, apresente sentido nebe ita nia kakutak sukat la too.

Iha primeira leitura, descreve momos katak Maromak sempre pronto fo perdão ba ema hotu nebe halo sala (comete pecado) hodi haluha tiha pecao hotu nebe ema halo iha tempo uluk. Maromak deseja ema nia conversão (hakribi salan) significa hadook-an husi salan sira atu ema tama hikas ba situação moris foun conta ho Maromak nia graça.

São Paulo iha nia carta ba sarani Filipenses sira contem partilha de experiência wainhira Paulo conhece Jesus há viagem ba Damasco. Iha dalan ba Damasco, Jesus forma Saulo sai ema foun ho naran Paulo. São Paulo fo aten brani ba sarani Filipenses sira dehan:”Ha’u haré buat hotu-hotu hanesan folin laek, iha ha’u Na’i Jesus Cristo Futar Oin. Tan Cristo ha’u simu terus hotu, ha’u haré buat tomak hanesan foér. Ha’u halo ne’e hotu atu manán Cristo, ha’u halo ne’e hotu atu hela iha Cristo, hodi hela laós tan ha’u nia di’ak ruma, nebé mai housi ukun, maibé hodi di’ak nebé mai tuir fiar iha Cristo. Di’ak ne’e mai housi Maromak, tuir ha’u nia fiar. Nune’e, ha’u bele hatene Cristo, ha’u bele hatene kbiit moris hias nian, ha’u bele hatene terus hamutuk ho Nia”.

Moris iha Cristo, tuir Paulo significa halao moris foun hodi husik moris tuan. Ida nee mos sai hanesan motivação kmanek ida atu ita nobun Cristão (Catolico) koko aplica iha semana ikus tempo Qauresma nian nee. Basá, iha Cristo, lialos mak graça nebe ita hetan tanba fiar. Paulo consciente katak afinal, wainhira conhece ona Jesus, nee kmanek liu fali poder nebé nia hetan nudar ema fariseu be cumpri didi’ak lei mosaica.

Jesus nia apresentação eh comportamente nudar relata iha Evangelho, fo sinal ida katak; Maromak sempre perdua qualquer pecado nebé ema comete wainhira ita koko atu la sala fali tan. Tanba nee mak mak Jesus hameno ba feto nee atu fila no la bele monu tan ba sala no halao moris foun.
Lalok fingido nebe Cruel; Wainhira hanorin dau-daun iha sinagoga, de repente deit ema fariseu ho escriba lubuk boot ida mai hasoru Jesus. Sira lori mos feto ida nebé kaer toman halo sala no sira husu oinsa Jesus nia hanoin ba feto nee.

Afinal sira nia intenção mak atu koko Jesus hodi hamonu no buka dalan oinsa condena Jesus tuir lei judeu nian. Iha relato Evangelho sira, ema fariseu no escriba sira nudar figura religioso nebé sempre sai objecto de fingido wainhira Jesus halo crítica.

Haré deit sira nia aparência, ema considera hanesan ema hirak nebé périto iha assunto religião no lei. Maibé, perante Jesus, sira la bele hasubar sira nia lalaok fingido. Nudar Maromak, Jesus hatene klean liu qualquer ema nia intenção diak no aat.

Iha qualquer momento wainhira sira hasoru Jesus, sira nia intenção principal rua mak importante; 1. Hakarak hatudu-an hanesan ema nebé moos husi pecado, 2. Buka leet hodi hamonu Jesus. Maibé, sira rasik hanoin katak sira nia lalaok rasik mak soe tahu (hafoer/menodai) santidade ema judeu nian.

Iha contexto Timor Leste nian, situação nebé sobresai liu mak situação socio-política halo ema ida-idak mosu iha media-social hodi konta istória. Wainhira cor política la hanesan ema hahú buka dalan hodi hatun malu, buka ema nia istória passada hodi defama ema até que sira haluha katak afinal ita hotu Timor oan nebe maioria hamahan-an iha rai ida deit no particularmente fiar mos ida deit.

Tama ona ba tempo Quaresma nia rohan, ema wain arrepende hodi ba confessa ba nailulik sira. Sexta sexta lalin-an ba tuir via sacra iha fati-fatin, halo ação caritativa hatudu iha media-social.

Entre actividade religiosa hirak nee, ida-idak iha ninia motivação rasik; balu cumpri tanba hatene-an nudar Cristão Católico seluk tuir tan ram-rame deit. Jesus hatene se mak halao tempo quaresma loloos no se mak lae basá, ema la bele habosok Maromak.

Semana nee, Jesus pronuncia rasik perdão ba feto nebé halo sala nee. Jesus la condena maibé, hameno deit atu keta halo sala tan. Wainhira ita ba confessa mos nailulik sempre fo hanoin atu ita keta monu bebeik ba sala (pecado). Maromak nia laran luak (misericórdia) rohan laek hanesan relata ona iha Evangelho Domingo kotuk. Oan nebe estraga buat hotu maibé, wainhira decide atu fila, aman simu nafatin. Por enquanto, husi ita nia parte nudar criatura pecador, depende oinsa ita aproveita Maromak nia misericórida nia ba ita nia moris sarani.

Mensagem principal nebe ita bele foti nudar bukae ba moris sarani basea relato Evangelho Domingo semana nee:

  • Jesus la husu liu tan feto nee halo sala saida basá, Nia hatene ona feto nee. Tanba nee mak Jesus haruka atu feto nee fila no labele halo sala tan.
  • Jesus la condena nem castigo feto nee, maski Nia la iha sala. Jesus consciente lei judaica permite castigo todan ba ema be halo sala maibé, Jesus prefere liu perdão basá, lei nebé todan la garante nem lori ema ba moris santidade. Ema hotu la ses husi sala nunee, povo nebé santo sei la acontece wainhira ita elimina tiha hirak nebe comete pecado. Ema hotu be sala nain, precisa hetan oportunidade hodi hader husi sala.
  • Santidade povo ida nian tuir versão Jesus, sei acontece wainhira ema hotu iha espírito perdão no arrependimento. Critério ba santidade mak povo nebé hahi-adora Maromak, esforsu-an hodi atinge moris santidade liu husi pratica hahalok diak no hatene perdua.
  • Ida nebe principal liu mak; Jesus nia missão hodi lori salvação. Lori ema sala nain hotu ba Maromak. Tanba nee mak iha biban balu Jesus dehan; laos ema diak mak precisa doutor maibé, ema moras mak precisa liu doutor. Atu atinge salvação nee basta cumpri no moris tuir saida mak Jesus haruka. Nia rasik dehan: HAU MAK DALAN LIALOS no MORIS.

ita hakat too ona momento ikus tempo Quaresma nian, além de reflexão hirak iha leten, ita mos precisa reflecte tan quote balu tuir mai:

  • Ser cristão é, antes de mais, aceitar essa proposta de reconciliação que Deus nos faz em Jesus. Significa que Deus, apesar das nossas infidelidades, continua a propor-nos um projecto de comunhão e de amor. Como é que eu respondo a essa oferta de Deus: com uma vida de obediência aos seus projectos e de entrega confiada nas suas mãos, ou com egoísmo, auto-suficiência e fechamento ao Deus da comunhão?
  • Esta parábola alerta-nos também para o sem sentido e a frustração de uma vida vivida longe do amor do “Pai”, no egoísmo, no materialismo, na auto-suficiência. Convida-nos a reconhecer que não é nos bens deste mundo, mas é na comunhão com o “Pai” que encontramos a felicidade, a serenidade e a paz.
  • Esta parábola convida-nos, finalmente, a não nos deixarmos dominar pela lógica do que é “justo” aos olhos do mundo, mas pela “justiça de Deus”, que é misericórdia, compreensão, tolerância, amor. Com que critérios julgamos os nossos irmãos: com os critérios da justiça do mundo, ou com os critérios da misericórdia de Deus? A nossa comunidade é, verdadeiramente, o espaço onde se manifesta a misericórdia de Deus?. Assim Seja e Bem Haja (ignas).

 

Leave a Reply

Your email address will not be published. Required fields are marked *