shadow
Diocese de Dili > NOTÍCIAS > REFLEXÃO > SE MAK LA SALA NIA MAK KAER FATUK TUDA ULUK FETO ADULTEIRA NEE-HAU LA CONDENA O, BA NO KETA HALO SALA TAN

SE MAK LA SALA NIA MAK KAER FATUK TUDA ULUK FETO ADULTEIRA NEE-HAU LA CONDENA O, BA NO KETA HALO SALA TAN

V DOMINGO QUARESMA ANO C-2019.

 

Maun alin sarani doben sira nebe hau hadomi iha ita Nain Jesus Cristo,

Ita ema sira nee SER ida nebe pecador maibe ao mesmo tempo santo. Ita ema pecador tamba ita nia kbiit laek sira no ita ema santo tamba hakarak diak sira be iha ita niaan no tamba justiça ka kbiit Maromak nian be halo mai ita. Iha buat rua nee ita sempre hakarak liu mak ida los ka justo ka santo nee, Sai ema diak, ema los no ema santo. Ema hotu hakarak mak ida nee. Hahu kedas husi ema ida começa hatene ninia-an, hatene ema seluk, no hatene mundo ho buat tomak be iha mundo nia laran laiha ema nebe hakarak sai ema at, ema sempre hakarak sai diak deit. Mas que nune tamba kbiit laek nebe iha halo ema sira dala barak halo buat sira nebe contrario husi ninia hakarak diak sira. Nune mak ikus mai ema sira monu ba salan.

Leitura sira domingo ohin nian convida ita atu reflete kona ba ita nia moris iha realidade rua nee. Hahu kedas iha primeira leitura Maromak hatudu an mai ita nundar Maksoin be bele halo hotu hotu hodi soi ninia emar sira husi susar laran: susar hamalaha hamrok ba hahan, ba ambiente be la suportavel, ba buat barak tebes nebe miseravel. Ita rona haktuir mai ita Maromak ninia hahalok kmanek sira be hatudu iha “Maromak loke dalan iha tasi laran ba ninia povo sira atu hakur liu hodi livre husi ema at sira liman, hamosu dalan no we iha raifuk maran atu ninia povo sira bele lao liu diak no hemu we naresin”. Maromak ninia hahalok maksoin nee hahalok justiça nian, hahalok nebe lori diak ba ema sira, halo ema sira hetan diak, hetan moris ida digno lolos hanesan ema nebe nia rasik mak halo moris. Maromak restaura fila fali iha ema sira moris digno nebe hori hahu kedas mai Nia tau iha ema sira nia-an no Nia hakarak ita ema sira moris ba.

Maun alin doben sarani sira, Nai Maromak ninia hahalok Maksoin ka justiça nee halo nafatin ba nafatin iha momento no iha tempo hotu hotu. Nune mak Nia halo mos mai ita sira nee ninia moris iha acontecemento no realidade sira ita ida idak ninia moris hori uluk kedas, oras nee no sei ba nafatin.Maromak ninia hahalok ida nee fo laran metin nafatin mai ita atu moris no atu luta nafatin ba moris nee mas que ita hatene katak ita ema sala nain tebes. Los duni ita tem que hatene an nundar ema sala nain, hodi hatene an nune mak ita foin bele hakribi no hadia ita nia salan sira, oinseluk ita sei hela nafatin iha sala laran no Nai Maromak ninia graça, Maromak nia Maksoin sei la too mai ita. Se ida nee mak acontece ita sei hetan mak condenação eterna laos perdão, laos justiça, moris rohan laek tan lae liu kedas.

Evangelho ohin nian haktuir momos no completo los kona ba ita ema sira nia hahalok foti-an hanesan ema los hodi condena ema seluk nebe monu ba sala no kona ba Maromak ninia laran luak, Maromak ninia justiça no Maromak ninia Maksoin ba ema nebe haraik-an no hatene-an nundar ema sala nain. Hanesan exemplo haktuir mai ita kona ba ema judeu sira iha sira nia lisan no lei ida nebe hanorin katak ema se mak halo sala adulterio tem que lori ba halo julgamento publico no fo condenação ida ba nia ho castigo ‘tuda mate ho fatuk deit’ ema be halo sala adulteiro nee.Tuir lisan no justiça ema judeu sira nian ida nee bele maibe tuir ukunfuan Maromak nian nebe labele tamba hahalok nee la justo ka la los. Ema nia justiça la fo opportunidade ba ema atu hakribi sala hatene mak condena deit, la halo ho misericordia, la halo ho perdão tamba ida nee mak sala, maibe Maromak ninia justiça fo perdão no fo opportunidade ba ema atu hakribi sala hodi moris los fila fali, halo ho misericordia incondicional no infinita tamba ida nee mak los. Ida nee ita hetan iha Jesus Cristo ninia hahalok nebe halo ba feto adulterio nee hodi ikus mai dehan HAU LA CONDENA O, BA NO KETA HALO SALA TAN.

Maun alin doben sira, Jesus Cristo ninia apello ida ikus nee fundamental tebes mai ita, MAROMAK FO ONA PERDUA, BA NO HAKAS-AN BA ATU KETA SALA TAN. Katak ita hakasan atu la fo tan possibilidade, la cria tan situação no ambiente nebe bele halo ita monu ba sala, ao contrário luta nafatin atu la monu tan ba salan hahu kedas husi hahalok reconhece ita an nundar ema sala nain ida, ita so bele sai los ho Maromak ninia tulun. La facil atu halo ida nee, sala ita ema mesak sala nain deit, hatene an hanesan ema sala nain ema hotu hatene, maibe atu reconhece salan sira nebe ita hotu halo no ita ida idak halo nee mak laos ema hotu hotu reconhece. São João Paulo II hateten no nia hateten los duni katak “SALAN BOOT LIU HOTU HUSI EMA OHIN LORON NIAN MAK EMA HALAKON TIHA SENTIDO SALA NIAN”, hodi halo nune’e ema hare buat hotu los no diak deit, ema hare buat hotu hanesan moda ida deit, ema hare buat hotu hanesan iha ita nia leet dala barak dehan NORMAL. Nune mosu buat foun iha ita nia sociedade nia leet hanesan ita hatene hotu kona ba ADULTERIO be buaras iha ita nia leet, sai pior liu tan wainhira sala ADULTERIO NEE ohin loron iha ita nia sociedade nia leet barak husi ita mak bolu fali ADULTERIO nee ho naran seluk dehan SELINGKUH. ADULTERIO NEE ADULTERIO, SELINGKUH NEE SELINGKUH, Rua nee salah hotu no salan boot liu mak ADULTERIO.

Maun alin sarani doben sira, hau hanoin ema lakon SENTIDO SALA NIAN tamba nia lakon ona sentido no FIAR kona ba Maromak. Wainhira hanesan nee ona katak nia lakon Maksoin ba ninia moris nebe mos katak lakon moris lolos nian.

São Paulo iha segunda leitura hanorin atu oinsa mak ita ema sira tem que halao moris nee hodi labele LAKON SENTIDO SALAN KA PECADO nian hodi bele mos FIAR METIN lolos ba Maromak atu ikus mai manan premio boot liu hotu nebe hanaran MORIS ROHAN LAEK. Nia dehan ema sarani iha ninia moris loro-loron ninia moris tem que “buka conhece no moris tuir nafatin Cristo be nia fiar”. Ida nee katak sarani ida nia moris loro lorn nian tem que kesi-an metin nafatin ba iha Cristo, labele haketak-an husi Cristo iha buat hotu nebe nia hanoin, koalia no halo. Hodi halo nunee sarani nia moris sei sai justo lolos basa fiar no moris tuir Cristo nee sai roman ida nebe sei lakan leno nafatin ninia moris iha ninia moris ba too moris rohan laek iha Maromak ho maun alin sira hotu. Tuir São Paulo ida nee mak buat diak liu hotu no premio boot liu hotu iha ema ida nia moris.

Maun alin sarani doben sira mai ita buka hakasan atu iha ita ninia moris loro loron sai justo no los tuir nafatin Maromak ninia hanorin no Cristo ninia Evangelho be hakonu an ho HARAIK-AN, PERÃO, MISERICORDIA NO DOMIN, laos FOTI-AN, laos ODIO, laos LARAN HIRUS NO CONDENAÇÃO. Amen.

RTK, Maloa 04-04-19

Pb.

Leave a Reply

Your email address will not be published. Required fields are marked *