shadow
Diocese de Dili > NOTÍCIAS > Notícias > Amululik mak Jesus nia Futar Fuan Domin

Amululik mak Jesus nia Futar Fuan Domin

DCDD Iha Celebração Missa Crismal nebe halao iha loron 11 fulan Abril 2019, Amo Bispo hamutuk ho Nailulik sira nebé sura liu atus ida resin, halao celebrção Litúrgica hamutuk ho sarani sira hodi hanoin loron Nailulik sira nian nebé tinan rihun rua resin liu ba, Nai Jesus lori Sacramentos: Órdem no Eucaristia. Presente mos iha Celebração ne’e, representante Encaregado Papa nian ba Timor Leste, Religiosos e Religiosas, Seminaritas no sarani rihun resin. Celebração Missa Crismal Tinan ne’e nian, halao iha Sé Catedral Dili.

Dom Virgílio do Carmo da Silva iha ninia homilia hateten katak, Ita halibur hamutuk atu agradece ba Maromak ba ita nia Sacerdócio. Santa Creda bolu nafatin ita nia atenção atu hare fila fali ba ita nia identidade nudar colaborador Maromak nian nebe Santo, atu halo Santo Maromak nia povo. Ida nee ita bele dehan furak no murak Sacerdócio ninian. Buat nebe ita halo mak hatudu iha ita nia moris no ita nia hahalok nebe santo mak sei hasanto Maromak nia povo. Momento ida nee mak liu-liu Uma Creda iha diocese tem que ser mos sai ita nia comunhão nebe visível no credível. Ho buat hotu nebe mosu no sei iha buat barak nebe sei acontece tan, maibe ita nia comunhão sacerdoral tem que ser mais visível no credível iha ita nia sociadade no diocese. São Bernardo ninia conselho Espiritual ba nia irmão sira nia dehan; “Se ita la ho progresso nee laos dehan katak ita parado, se ita la halo progresso katak ita fila ba kotuk”. Nee katak ita continua ita nia moris precisa nafatin atu renova ita nia an. Tan nee, ita mai ohin laos atu hare malu deit, hasoru malu deit, maibe ita mai ho objetivo ida katak dala ida iha tinan ida atu hafoun ita nia comprimisso sacerdócio ninian.

Liu nee prelado nee dehan, Santo ida nia descreve iha nia vocabulário wainhira koalia kona ba amululik nia dehan; “Amululik mak Jesus nia Futar Fuan Domin”. Amu Papa Francisco wainhira nia sei archebispo nia halo nia descrição kona ba Dom sacerdócio ninian nee, nia descreve ho liafuan ida hanesan nee; “Ita amululik sira wainhira ita celebra Eucaristia, ita tau ita nia kabás leten povo nebe Na’i Maromak entrega ba ita atu lori, sira nia naral hakerek iha ita nia fuan. Ida nee hatudu wainhira ita hatais ita nia Casula” diak mos mai ita atu sente iha ita nia kabás leten no ita nia fuan todan ita nia sarani sira nia ksolok sira nia terus no sira nia moris tomak. Ida nee pessoalmente halo ita atu hanoin fila fali wainhira ba dala uluk ita simu ita nia batina sempre marca ho cerimónia nebe solene. Tanba nee ohin momento ida ba ita atu hare oinsa ita expressa ita nia domin liu husi gesto nebe ita dehan karik la folin buat ida, maibe gesto hirak nee mos hatudu oinsa ita nia besik ba Na’i Maromak. Então fila ba ida nee ita bele husu ba ita nia an; oinsa mak Jesus nia Futar Fuan domin bele sai realidade ida iha ita nia moris amululik ninian ou ita bele dehan oinsa mak hau bele sukat katak hau fo duni sasin ida nebe los no mos.

Prelado diocese nian nee mos fo hanoin fila fali hodi fanun fali sacerdócio sira katak, ohin momento diak ida mai ita atu redescobre fila fali furak no murak vocação ida nee nian. Ita nia vontade atu haburas vocação ida nee iha mundo ohin loron nian. Dalaruma nebe bele uja hadaet murak mean Maromak nian ida nee, ita nia amo Papa nafatin fo hanoin mai ita amululik sira nia dehan; cria ambiente ida acompanhamento Espiritual nian liu-liu ba sarani sira, disponível nafatin atu rona comfissão, la kole atu haklaken Maromak nia Futar Lia basá ohin loron iha ema diak barak nebe buka Maromak. Nee duni wainhira koalia kona ba proximidade dala barak ita hanoin tem que lao ba fatin sira nebe dook, maibe la precisa hanoin ba fatin nebe dook, karik precisa deit sensitividade ida iha ita nia fatin ho ita nia maun-alin sira nebe haleu ita dalaruma precisa ita nia tulun. Iha tinan hirak nee hau hare no rona ita nia amululik no madre sira halo esforço atu sai husi duni ita nia zona de conforto sira tama iha realidade hirak nee. Tan nee ba sira hau hakarak congratula ba amululik no madre sira nebe halo esforço ida nee corágem atu hakbesik ba família sira, grupo, liu-liu ba grupo sira nebe existe ho caráter sira nebe ladun sarani. Dalaruma ita rona liafuan sira ita nia foinsae sira, grupos ruma nebe ho naran nebe estranho ituan, maibe la impede ita atu tama ba iha grupo hirak nee atu rona, koalia ho sira. Ida nee mak ita nia amu Papa hanaran sira nebe iha Periferia.

Molok atu termina ninia homilia iha missa Crismal nee Dom Virgílio nafatin fo hanoin ba amululik sira katak, Maria hanesan ita hotu hatene; Mãe dos Sacerdotes; Nossa Senhora da proximidade nudar Inan diak ida nebe atu lao ho ita, acompanha ita, luta ho ita, nunee hakbesik nafatin ba Maromak nia domin. Nain Feto laos deit besik, laos ita admira kona ba nia prontidão atu hatan no servi, maibe mos iha Nia maneira atu koalia. Ita hare iha festa Kanna tua laiha Nain Feto dehan ba atan sira; halo tuir saida mak Nia dehan ba imi. Nee hatudu oinsa? Nain Feto nia atensão nudar Inan ida nian ba ita hotu nebe ohin particularmente mai ita amululik sira ida-idak ho nia proximidade amizade especial ho Inan Lalehan  ida nee nian. Nee loron ida nee mai ita hafoun hikas ita nia confiansa no husik ita nia Inan doben nee lao hamutuk ho ita iha dalan cruz ninian no hanourin ita hatene hamrik metin nafatin iha cruz hun maske laloran, maske anin boot, maibe ita metin nafatin hamutuk ho Nia ho Nia Oan Jesus. Alin/cycko

Leave a Reply

Your email address will not be published. Required fields are marked *